Read Мукъаддес Китап къырымтатар тилинде, Чыкъыш 9 Bible Online

Чыкъыш 9 - Мукъаддес Китап къырымтатар тилинде, bible

Чыкъыш 9

¹РАББИ Мусагъа бойле деди: — Фыравунгъа барып, бойле айт: «РАББИ, еудийлернинъ Алласы, бойле деп айта: “Манъа къурбан чалмакъ ичюн, Меним халкъымны йибер”.

²Эгер сен оларны йибермеге истемесенъ ве оларны даа тутсанъ,

³мына РАББИ тарладаки айванларынъны, атларны, эшеклерни, девелерни, сыгъырларны, бугъаларны ве къой-эчкилерни джезалар: баягъы агъыр хасталыкъ олур.

⁴Амма РАББИ исраиллилернинъ айванларыны мысырлыларнынъ айванларындан айырар, ве Исраиль огъулларынынъ бутюн айванларындан исе бири ольмез.

⁵РАББИ вакътыны бильдирип: “Бу мемлекетте Мен буны ярын этеджегим”, — деди».

⁶Айланыр куню РАББИ буны да япты, ве мысырлыларнынъ эписи айванлары олип кеттилер, Исраиль огъулларынынъ айванларындан исе бири ольмеди.

⁷Фыравун бильмек ичюн адамларны ёллады, ве, иште, Исраиль огъулларынынъ бутюн айванларындан бири ольмегенини бильди. Лякин фыравуннынъ юреги таш киби эди, ве о, исраиллилерни йибермеди.

⁸Сонъ РАББИ Мусанен Харунгъа бойле деди: — Собадан бирер толу авуч куль алынъыз да, Муса оны фыравуннынъ козю огюнде кокке сепсин.

⁹Бутюн Мысыр топрагъында тоз котерилир, ве бутюн Мысыр топрагъындаки адамларнынъ ве айванларнынъ устьлеринде иринлеген чибанлар пейда олур.

¹⁰Олар, собадан куль алып, фыравуннынъ козю огюне кельдилер. Муса оны кокке септи, ве адамларнынъ, айванларнынъ устьлеринде иринлеген чибанлар пейда олды.

¹¹Тылсымджылар чибанлар ичюн Мусагъа къаршы турып оламадылар, чюнки эписи мысырлыларнен тылсымджыларда чибанлар бар эди.

¹²Лякин РАББИ фыравуннынъ юрегини таш киби этти, ве о, РАББИ айткъаны киби, Мусанен Харунны динълемеди.

¹³Сонъ РАББИ Мусагъа бойле деди: — Ярын саба эрте турып, фыравуннынъ козю огюне бар да, онъа бойле деп айт: «РАББИ, еудийлернинъ Алласы, бойле деп айта: “Манъа ибадет этмек ичюн, Меним халкъымны йибер.

¹⁴Йибермесенъ эгер, бутюн дюньяда Манъа ошагъан кимсе олмагъаныны биль деп, бу сефер Мен сенинъ, хызметчилеринъ ве халкъынъ башына эписи беляларны ёлларым.

¹⁵Къудретимни косьтерип, сенинъ ве халкъынънынъ устюне дешетли белямны йибермеге истеген олсам, сен чокътан берли ер юзюнден ёкъ олур эдинъ.

¹⁶Лякин санъа къудретим корюнсин деп ве бутюн ер юзюнде Меним адым намлы олсун деп, Мен сени сакълап къалдырдым.

¹⁷Сен исе, даа Меним халкъымны йибермейип, онъа къаршы турасын.

¹⁸Бунынъ ичюн, Мен ярын, тамам бу вакъыт, Мысыр дюньягъа кельген вакъыттан берли шимдигедже, анда олмагъан баягъы къоркъунчлы бурчакъ ёлларым.

¹⁹Шимди сюрюлеринъни ве тарлада олгъан эписини джыймакъ ичюн адамларны ёлла. Эвге джыйылмайып, тарлада къалгъан эписи адамларнен айванларгъа исе бурчакъ тюшер, ве олар олерлер”».

²⁰Фыравуннынъ хызметчилеринден базылары, РАББИнинъ сёзлеринден къоркъып, озь сюрюлеринен къулларыны ашыкъып эвлерине джыйдылар.

²¹РАББИнинъ сёзлерине къулакъ асмагъан адамлар исе сюрюлеринен къулларыны тарлада къалдырдылар.

²²РАББИ Мусагъа бойле деп айтты: — Къолунъны кокке тараф узат, ве бутюн Мысыр топрагъына: адамларгъа, айванларгъа ве Мысырдаки ашлыкънынъ бутюнине бурчакъ тюшер.

²³Муса озь таягъыны кокке тараф котерди. РАББИ кок гурюльтисинен бурчакъны йиберди, ве ер юзю бою атеш даркъала эди. Бойле шекильде РАББИ Мысыр топрагъына бурчакъны ягъдырды.

²⁴Бурчакъ тюше эди, ве бурчакъ арасында атеш де анда, де мында алевлене эди. Мысыр мемлекети пейда олгъан вакъыттан берли олмагъан, бутюн Мысыр топрагъында бойле баягъы къоркъунчлы бурчакъ эди.

²⁵Бутюн Мысыр топрагъы бою, тарлаларда олгъан бутюнини: адамдан башлап айвангъадже, — бурчакъ къырды. Тарлада оськен эписи осюмликлерни урды, тарлада оськен эписи тереклерни де бурчакъ сындырды.

²⁶Тек Исраиль огъуллары отургъан Гошен виляетинде бурчакъ олмады.

²⁷Фыравун, адамларны ёллап, Мусанен Харунны чагъыртты ве оларгъа: — Бу сефери мен гуна къазандым. РАББИ — адалетлидир, меннен халкъым исе къабаатлымыз.

²⁸Меним ичюн РАББИге дуа этинъиз, Алланынъ гурюльтилери ве бурчакъ токътасынлар, ве мен сизлерни артыкъ тутмайып йиберерим, — деп айтты.

²⁹Муса онъа бойле джевап къайтарды: — Мен шеэрден чыкъып, къолларымны котерип, РАББИге дуа этеджегим. Ер юзю — РАББИнинъ мулькю олгъаныны биль деп, кок гурюльтилери токътар ве бурчакъ башкъа олмаз.

³⁰Лякин мен билем ки, сен ве сенинъ хызметчилеринъ аля даа РАББИ-Таалядан къоркъмайсынъыз.

³¹Бурчакъ кетенни ве арпаны урды, чюнки арпа энди баш тёкти, кетен исе чичеклеп башлады.

³²Богъдайны ве къызыл богъдайны исе урмады, чюнки олар кечче етише эдилер.

³³Муса, фыравундан кетип, шеэрден чыкъты ве къолларыны РАББИге тараф узатты, ве аман кок гурюльтисинен бурчакъ токътады, ягъмур да ер юзюне ягъмакъны токътатты.

³⁴Ягъмур, кок гурюльтиси ве бурчакънынъ токътагъанларыны корип, фыравун хызметчилеринен эп инатланып, бир даа гуна къазанды.

³⁵Фыравуннынъ юреги таш киби къатты эди, ве о, РАББИ Муса ярдымынен айткъаны киби, Исраиль огъулларыны йибермеди.