Read Мукъаддес Китап къырымтатар тилинде, Икметли сёзлер 10 Bible Online

Икметли сёзлер 10 - Мукъаддес Китап къырымтатар тилинде, bible

Икметли сёзлер 10

¹Сулейманнынъ икметли сёзлери. Икметли огълан — бабасына къуванчтыр, акъылсыз огълан — анасына беля!

²Адалетсиз къазанылгъан байлыкътан файда ёкъ, инсафлыкъ исе олюмден къуртара.

³РАББИ инсафлы адамны ач къалдырмаз, яман адамнынъ истегини исе бош чыкъарыр.

⁴Тенбель къол адамны фукъаре эте, амма чалышкъан къол зенгин эте.

⁵Язда махсул джыйгъан огъул акъыл-ферасетлидир, оракъ вакъытта юкълагъан огъул исе — къорантасынынъ масхарасыдыр.

⁶Яхшы бахшышлар инсафлы адамларнынъ башына ягъа, яман адамнынъ агъзы исе зорбалыкъларыны гизлей.

⁷Инсафлы адамны макътавнен хатырларлар, яман адамнынъ ады исе гъайып олур.

⁸Икметли юрек эмирлерни къабул эте, ахмакънынъ тили исе — онынъ башына беля.

⁹Ким къусурсызлыкъта юре, хавфсызлыкъта яшай, къыйыш ёлдан юргеннинъ исе тюшюнгенлери ачылыр.

¹⁰Козь къыпкъан адам къасевет кетире, ахмакънынъ тили исе — онынъ башына беля.

¹¹Инсафлы адамнынъ агъзы — яшайыш чокърагъыдыр, яман адамнынъ агъзы исе зорбалыкъларыны гизлей.

¹²Нефрет къавгъаларны къозгъай, севги исе эписи къабаатларны багъышлай.

¹³Акъыллы адамнынъ агъзында икмет яшай, акъылсызнынъ аркъасында исе — таякъ.

¹⁴Икметли адамлар бильгини сакълай, ахмакънынъ тили исе башына беля кетире.

¹⁵Байнынъ малы-мулькю — онынъ пекитильген къалеси, фукъаренинъ ёкъсуллыгъы исе — онынъ белясы.

¹⁶Инсафлы адамнынъ чалышкъаны яшайышкъадыр, яман адамнынъ келири исе — гунагъадыр.

¹⁷Огютни сакълагъан адам омюр ёлундадыр, опькеге къулакъ асмагъан исе ёлуны шашыра.

¹⁸Яланджы тиль нефретни гизлей, ошек ташыгъан — акъылсыздыр.

¹⁹Чокъ лафнынъ сонъу — гунадыр, акъыл-ферасетли адам исе тилини тута.

²⁰Инсафлы адамнынъ тили темиз кумюш кибидир, яман адамнынъ юреги исе — бир капиктир.

²¹Инсафлы адамнынъ тили чобан киби чокъ адамны бакъа, ахмакълар исе акъыл эксиклиги ичюн олелер.

²²РАББИнинъ бахшышлары бай эте, онен берабер О, гъам бермей.

²³Акъылсыз адам яманлыкъ япкъанындан зевкъ ала, анълагъан адам исе — икметтен.

²⁴Яман адамнынъ къоркъкъаны башына келир, инсафлы адамнынъ истеги исе ерине келир.

²⁵Къасыргъа келир — яман адамны ёкъ этер, инсафлы адамнынъ темели исе — эр вакъыт къавийдир.

²⁶Тишлер ичюн — сирке киби, козьлер ичюн — тютюн киби, дембель де онъа иш бергенлер ичюн — тамам ойледир.

²⁷РАББИден къоркъмакъ — куньлерни арттырмакъ, яман адамларнынъ йыллары исе къыскъадыр.

²⁸Инсафлы адамларнынъ умюти — къуванчтыр, яман адамларнынъ беклегенлери исе харап олур.

²⁹РАББИнинъ ёлу къусурсыз адам ичюн — сыгъынувдыр, джинаетчи ичюн исе — дешеттир.

³⁰Инсафлы адам ич бир вакъыт сарсылмаз, яманлар исе ер юзюнде яшамаз.

³¹Инсафлы адамнынъ тили икмет айта, яланджы тиль исе кесилир.

³²Инсафлы адамнынъ дудакълары хош лаф айта, яман адамнынъ агъзы исе — ялан.