Read Мукъаддес Китап къырымтатар тилинде, Икметли сёзлер 11 Bible Online

Икметли сёзлер 11 - Мукъаддес Китап къырымтатар тилинде, bible

Икметли сёзлер 11

¹Ялан теразеден РАББИ нефрет эте, догъру таштан исе разы къала.

²Къопайлыкъ артындан — масхаралыкъ келе, алчакъ гонъюль иле — икмет.

³Догъру адамларнынъ къусурсызлыгъы оларгъа ёл косьтере, къара юреклилернинъ айнеджилиги исе башларына ете.

⁴Гъазап Куню байлыкъ ярдым этмез, инсафлыкъ исе олюмден къуртарыр.

⁵Къусурсыз адамнынъ инсафлыгъы ёлуны тегизлей, яман адам исе яманлыгъындан йыкъылып тюшер.

⁶Догъру адамнынъ инсафлыгъы оны къуртара, къара юрекли адамларны исе яман истеклери къолгъа ала.

⁷Яман адам олер — умюти де кесилир, фена адамнынъ беклегенлери де гъайып олур.

⁸Инсафлы адам белядан къуртула, онынъ ерине беля яман адамнынъ башына тюше.

⁹Аллагъа инанмагъан адам озь тилинен башкъа адамны гъайып этер, инсафлы адамларны исе бильги къуртарыр.

¹⁰Инсафлы адамнынъ ишлери онъундан кельгенде — шеэр шенълене, яман адам гъайып олгъанда — адамлар къуванчнен къычыра.

¹¹Догъру адамларнынъ эйилиги шеэрни къура, яман адамларнынъ лафлары оны йыкъа.

¹²Акъылдан эксик адам башкъа адамны ашалай, анълагъан адам исе сусып тура.

¹³Ошек ташыгъан адам башкъасынынъ сырларыны ача, ишанчлы адам исе сырдаш ола.

¹⁴Яхшы насиат эксик олса — халкъ гъайып олур, чокъ насиат олса исе — къуртурылыр.

¹⁵Ябанджы адам ичюн кефиль олгъан адам озюне зарар кетире, «Келиштик!» демектен къачынгъан адам исе эсен-аман яшар.

¹⁶Яхшы табиатлы апай шурет къазана, шефкъатсызлар исе байлыкъ алалар.

¹⁷Мераметли адам озюнинъ джанына файда кетире, мераметсиз адам исе — зарар.

¹⁸Яман адамнынъ къазанчы яландыр, акъикъатны сачкъан адам исе ишанчлы мукяфатны джыя.

¹⁹Акъикъатен, инсафлыкъ — яшайыштыр, яманлыкъ этмеге ашыкъкъан адам исе олюмге ашыкъа.

²⁰Къара юрекли адамлардан РАББИ нефрет эте, ёллары къусурсыз адамлардан исе разы къала.

²¹Керчектен, яман адам джезасыз къалмайджагъына баш бермек мумкюн, инсафлы адамларнынъ эвлятлары исе сагъ къуртурылыр.

²²Акъыл-ферасеттен эксик апайнынъ дюльберлиги — домуз бурнундаки алтын алкъа.

²³Инсафлы адамларнынъ истеклери яхшылыкънен бите, яман адамларнынъ умюти исе — Алланынъ гъазабынен.

²⁴Джан-юректен берген джумерт адамгъа даа чокъ бериле, ачкозь адамгъа исе ёкъсуллыкъ келе.

²⁵Джумерт адам боллукъта яшар, башкъасына сув ичирген адам сувсуз къалмаз.

²⁶Ашлыгъыны сакълап къойгъан адамны халкъ къаргъай, ашлыгъыны саткъанны исе — макътай.

²⁷Яхшылыкъкъа ынтылгъан разылыкъ къыдыра, яман къыдыргъаннынъ башына исе яманлыкъ тюшер.

²⁸Байлыгъына ишангъан йыкъылыр, инсафлы адамлар исе япракъ киби ешерир.

²⁹Къорантасыны йыкъкъан адамнынъ къысмети ель олур, ве ахмакъ — икметли адамнынъ къулу олур.

³⁰Инсафлы адамнынъ махсулы — омюр терегидир, икметли адам адамларнынъ юреклерини къазана.

³¹Бу дюньяда инсафлы адам биле джезаланса, яман адам ве гунахкяр исе ондан бетер джезаланыр.