Read Мукъаддес Китап къырымтатар тилинде, Икметли сёзлер 12 Bible Online

Икметли сёзлер 12 - Мукъаддес Китап къырымтатар тилинде, bible

Икметли сёзлер 12

¹Огютни севген — бильгини севе, опькеден нефретленген — ахмакъ.

²Яхшы адам РАББИнинъ огюнде разылыкъ къазана, яман ниетлери олгъан адамны исе РАББИ укюм этер.

³Ич бир адам яманлыгъында къатты турмаз, инсафлы адамларнынъ темеллери йыкъылмаз.

⁴Яхшы апай — акъайынынъ башына тадждыр, масхаралыкъ кетирген апай исе — кемиклеринде чюрюк киби.

⁵Инсафлы адамлар адалет акъкъында тюшюне, яман адамларнынъ насиаты исе алдата.

⁶Яман адамнынъ сёзлери — олюм къапкъаныдыр, догъруларнынъ айткъанлары исе озьлерини олюмден къуртара.

⁷Яман адам йыкъыла ве ёкъ ола, инсафлы адамларнынъ эви исе йыкъылмайып тура.

⁸Адамны акъыл-ферасетине коре макътайлар, къара юрекли адамгъа исе нефретнен бакъалар.

⁹Чокъ урьмет къазанмагъан, амма бир къулу олгъан адам озюни бай сайып, отьмекке мухтадж олгъан адамдан яхшыдыр.

¹⁰Инсафлы адам айванларынынъ да къасеветини чекер, лякин яман адамнынъ мерамети биле — зулум.

¹¹Топрагъыны ишлеген адамнынъ ашы бол олур, бош шейлернинъ пешинден чапкъан адам исе акъылдан эксик.

¹²Яман адам яман сачмаларынен тутмагъа истей, инсафлы адамларнынъ тамыры исе махсул осьтюре.

¹³Яман адам ялан лафларынынъ къапкъанына тюше, инсафлы адам исе белядан къуртула.

¹⁴Айткъан лафына коре адам яхшылыкъ тапа, япкъан ишлери онъа мукяфатнен къайта.

¹⁵Ахмакънынъ ёлу озюне коре догърудыр, насиаткъа къулакъ аскъан адам исе икметлидир.

¹⁶Ахмакъ гъазабыны бирден ача, зекялы адам исе джаны агъыргъаныны сакълай.

¹⁷Намуслы адам догърусыны айта, ялан шаатлыкъ эткен адам алдата.

¹⁸Бошбогъазнынъ тили — къылыч киби кескиндир, икметли адамнынъ тили исе — дертке дерман.

¹⁹Керчек сёзлернинъ омрю узакъ, ялан лафнынъ исе — къыскъа.

²⁰Яманлыкъны тюшюнген адамнынъ юреги къара, яхшылыкъ эткен адамнынъ юрегинде исе къуванч толып-ташар.

²¹Догъру адамгъа бир зарар олмаз, яман адамнынъ башы исе белядан къуртулмаз.

²²РАББИ ялан айткъан дудакълардан нефретлене, догърусыны айткъан адамлардан исе разы къала.

²³Зекялы адам бильгисини сакълай, акъылсызнынъ юреги исе ахмакълыгъыны косьтере.

²⁴Ишкир къол падишалыкъ этер, тенбель къол исе салым берир.

²⁵Къасевет адамнынъ юрегини къырар, гузель сёз исе оны къувандырыр.

²⁶Инсафлы адам башкъасына ёл косьтере [1] яманларнынъ туткъан ёлу исе оларны адаштыра.

²⁷Тенбель къазан къайнатмаз, ишкирнинъ къысмети къыт олмаз.

²⁸Инсафлыкъ ёлу — яшайыштыр, ёлларында олюм ёкъ.