Read Мукъаддес Китап къырымтатар тилинде, Икметли сёзлер 14 Bible Online

Икметли сёзлер 14 - Мукъаддес Китап къырымтатар тилинде, bible

Икметли сёзлер 14

¹Икметли апай эвини къура, Ахмакъ апай исе эвини озь къолунен урып йыкъа.

²Догъру ёлдан кеткен адам РАББИден къоркъа, къыйыш ёлдан кеткен исе Ондан нефрет эте.

³Ахмакънынъ агъзында гъурур къамчысыдыр, икметлининъ тили исе икметлини къорчалай.

⁴Огюз олмаса, анбарлар бош къалыр, амма берекет кучьлю огюзлерден пейда олур.

⁵Ишанчлы шаат ялан айтмаз, яланджы шаат исе дюнья ялан уйдурыр.

⁶Мыскъылджы икметни къыдырса да, тапалмаз, акъыллы адам ичюн исе бильги къазанмакъ къолай.

⁷Акъылсыз адамдан узакъ ол, онынъ агъзында бильги тапалмазсынъ.

⁸Зекялы адамнынъ икмети — ёлуны анъламакътыр, акъылсызларнынъ ахмакълыгъы исе — алданмакътыр.

⁹Ахмакълар гунанынъ устюнден кулелер, РАББИнинъ разылыгъы исе — догъру адамларнен.

¹⁰Адамнынъ гъамыны тек юреги билир, озь къуванчыны да башкъасынен больмез.

¹¹Яман адамларнынъ эви харап олур, догъру адамларнынъ чадыры исе боллукъкъа толур.

¹²Базы ёл адамгъа догъру киби корюне, амма онынъ сонъу — олюмдир.

¹³Шакъылдап кульгенде биле юрек сызламакъ мумкюн, ве къуванчтан сонъ гъам кельмек мумкюн.

¹⁴Ярамаз адам — туткъан ёлундан, яхшы адам да — озь ёлундан тояр.

¹⁵Саде адам эр бир сёзге инаныр, зекялы адам исе эр аткъан адымына мукъайт олур.

¹⁶Икметли адам мукъайт олып, яманлыкътан узакъ турар, акъылсыз исе гъафлетсиз алда хоразланыр.

¹⁷Тез ачувлангъан адам ахмакълыкъ япмакъ мумкюн, лякин яман ниетлери олгъан адамдан эр кес нефрет эте.

¹⁸Саде адамларнынъ мирасы — ахмакълыкътыр, зекялы адамларнынъ таджы исе — бильгидир.

¹⁹Ярамай адамлар — яхшы адамларнынъ огюнде, яман адамлар — инсафлы адамларнынъ араба къапусы огюнде баш эгерлер.

²⁰Фукъареден досту биле нефрет эте, бай адамны исе чокъ адам севе.

²¹Башкъа адамны ашалагъан гуна къазаныр, фукъареге мераметли олгъан исе бахтлы олур.

²²Яманлыкъ япмагъа тюшюнген адам ёлдан урулыр, амма яхшылыкъ япмагъа тюшюнген адамнен мерамет ве садыкълыкъ олур.

²³Эр бир агъыр иш келир кетире, амма бошбогъазлыкъ — тек ёкъсуллыкъны!

²⁴Икметлилернинъ таджы — оларнынъ байлыгъы, амма акъылсызларнынъ ахмакълыгъы — тек ахмакълыкъ!

²⁵Ишанчлы шаат джан къуртара, яланджы шаат исе хиянетлик эте.

²⁶РАББИден къоркъу — акъикъий къорчалавдыр, Озюнинъ балаларына О — яхшы къоралангъан ердир.

²⁷РАББИден къоркъу — омюр чокърагъыдыр, о, адамны олюм къапкъанларындан къуртара.

²⁸Халкънынъ чокълугъы — падишанынъ шуретидир, халкъы ёкъ олса эгер, укюмдаргъа белядыр.

²⁹Чокъ сабырлы адам чокъ анълагъандыр, тез ачувлангъан исе ахмакълыгъыны косьтере.

³⁰Джан раатлыгъы — беден сагълыгъыдыр, пахыллыкъ исе — кемиклернинъ чюрюклигидир.

³¹Фукъарени къыйнагъан адам Яратыджыгъа къаршы чыкъа, Алланы севип-сайгъан исе ёкъсулгъа къол узата.

³²Яман адамнынъ башына озь яманлыгъы тюшер, инсафлы адамнынъ исе ольгенде биле сыгъынаджакъ ери бар.

³³Икмет анълагъан адамнынъ юрегинде яшай, акъылсызларнынъ арасында биле оны билелер.

³⁴Инсафлыкъ миллетни юксельте, гуналар исе оны масхара эте.

³⁵Акъыл-ферасетли къулунен падишанынъ разылыгъы, масхаралыкъ япкъан къулгъа исе — онынъ гъазабы.