Read Мукъаддес Китап къырымтатар тилинде, Икметли сёзлер 15 Bible Online

Икметли сёзлер 15 - Мукъаддес Китап къырымтатар тилинде, bible

Икметли сёзлер 15

¹Йымшакъ джевап гъазапны ятыштырыр, акъаретли сёз исе ачув къозгъар.

²Икметли адамнынъ тили бильги айтар, акъылсызнынъ агъзындан исе тек ахмакълыкъ чыкъар.

³РАББИнинъ козю эр бир ерни корер, эм яхшы, эм яман адамны.

⁴Юваш тиль — омюр тереги, алдатыджы сёз — рухнынъ элягы.

⁵Ахмакъ бабасынынъ огютини урьмет этмез, опькеге къулакъ аскъан исе зекялы олур.

⁶Инсафлы адамнынъ эвинде буюк байлыкъ, яман адамнынъ келири исе беля кетире.

⁷Икметлининъ тили бильги даркъатар, акъылсызлар исе ойле япмаз.

⁸Яман адамларнынъ къурбанындан РАББИ нефретленир, догъру адамларнынъ дуасындан исе разы къалыр.

⁹Яман адамнынъ ёлундан РАББИ нефретленир, инсафлыкъ ёлуны туткъан адамны исе север.

¹⁰Ёлны къалдыргъангъа — къатты джеза, опькеден нефрет эткен олер.

¹¹О бир дюнья ве эляк дияры — РАББИнинъ огюнде ачыкъ, адамнынъ юреги Онынъ ичюн сыр олурмы?

¹²Мыскъылджы оны опькелегенлерни севмей, икметли адамларгъа о бармаз.

¹³Юрек къуванчы адамнынъ бетини ачар, юрек дерди исе рух сёндюрир.

¹⁴Акъыллы юрек бильги къыдырар, акъылсыз исе ахмакълыкънен бесленир.

¹⁵Заваллынынъ эр куню — гъам-къасевет, бахтлыда исе эр заман той-зияфет.

¹⁶Факъыр олып да, РАББИден къоркъмакъ, бай олып да, къайгъы-къасевет ичине яшамакътан яхшыдыр.

¹⁷Севги толу емиш ашы, нефрет толу семиз бузав этинден яхшыдыр.

¹⁸Тез ачувлангъан адам ара бозар, сабырлы исе къавгъаны ятыштырыр.

¹⁹Тенбельнинъ ёлу тикен толудыр, догъру адамнынъ ёлу исе кениш ве тер-тегиздир.

²⁰Икметли огълан бабасыны къувандырыр, акъылсыз огълан исе анасыны саймаз.

²¹Акъылдан эксик адам ахмакълыгъына къуваныр, анълагъан адам исе догъру ёлдан кетер.

²²Адам акъыл танышмаса — иши фена чыкъар, акъыл огреткенлерге къулакъ асса эгер — мурадына етер.

²³Джевап берип олгъан адам къуваныр, вакътында айтылгъан сёз пек гузельдир.

²⁴Омюр ёлу акъыл-ферасетли адамны юкъарыгъа алып кете ве о бир дюньядан узакълаштыра.

²⁵РАББИ кибирлилернинъ эвини харап этер, тул апайнынъ сынъырыны исе къуветлендирир.

²⁶Яманнынъ фикиринден РАББИ нефретленир, темиз юрекли адамларнынъ сёзлеринден исе разы къалыр.

²⁷Акъчагъа ачкозьленген эвини йыкъар, къапарлардан нефретленген исе раат яшар.

²⁸Инсафлы адам джевап акъкъында тюшюнир, яман адамнынъ агъзы исе яманлыкъ сачар.

²⁹Яман адамлардан РАББИ пек узакътыр, инсафлыларнынъ дуаларыны исе эшитир.

³⁰Ярыкъ козьлер юрек къувандырыр, хайырлы хабер де кемиклерни къавий этер.

³¹Омюрнинъ тербиесине къулакъ аскъан адам икметли адамларнынъ арасында олур.

³²Огютни ред эткен адам джанына зарар кетирир, опькеге къулакъ аскъан акъыл къазаныр.

³³РАББИ къоркъусы икметке огретир, ве шуретнинъ огюнден алчакъгонъюллик келир.