Read Мукъаддес Китап къырымтатар тилинде, Икметли сёзлер 17 Bible Online

Икметли сёзлер 17 - Мукъаддес Китап къырымтатар тилинде, bible

Икметли сёзлер 17

¹Тынчлыкъ ичинде бир къаткъан тилим отьмек, къавгъа-дава ичинде буюк тойгъа толу эвден яхшыдыр.

²Акъыл-ферасетли къул эфендисининъ масхаралыкъ япкъан огълуна эфендилик этер, онынъ агъа-къардашларынен берабер мирастан пай алыр.

³Алтын — оджакъта, кумюш — иритильгенде сыналыр, юрекни сынагъан исе — РАББИдир.

⁴Яман адам яман лафкъа къулакъ аса, яланджы йыкъыджы лафларны динълей.

⁵Фукъарени ашалагъан онынъ Яратыджысыны акъаретлей, белянынъ устюнден кульген джезасыз къалмаз.

⁶Къарт адамларнынъ таджы — торунларыдыр, балаларнынъ шурети — ана-бабаларыдыр.

⁷Будалагъа гузель лафлар ярашмаз, ондан бетер мырзагъа — ялан лафлар.

⁸Къапар берген адам ичюн онынъ бахшышы — тылсымлы таш кибидир, къайда айланмаса — эр ерде о онъар.

⁹Севги къыдыргъан къабаатны багъышлар, оны кене хатырлагъан исе достуны узакълаштырыр.

¹⁰Анълагъан адамны опькелемек, акъылсызгъа юз таякъ урмакътан яхшыдыр.

¹¹Арабозар тек яманлыкъ къыдыра, онъа къаршы мераметсиз мелек ёлланыр.

¹²Яврусындан айырылгъан аювны расткетирмек, акъылсызны ахмакълыгъында расткетирмектен яхшыдыр.

¹³Эгер адам яхшылыкъкъа яманлыкъ къайтарса, онынъ эви белядан къуртулмаз.

¹⁴Къавгъанынъ башланувы сув акъувына ошай. Беля чыкъмаздан эвель, къавгъаны токътат.

¹⁵Эм яманны акълагъан, эм инсафлыны къабаатлагъан адамдан РАББИ нефретлене.

¹⁶Акъылсызгъа хазинеден не файда? Икметни акъчагъа сатын алмагъа онынъ акъылы ёкътыр.

¹⁷Дост эр вакъыт севе, беля заманында ярдым этмек ичюн агъа-къардаш догъа.

¹⁸Акъылдан эксик адам къол узатып, башкъа адам ичюн кефиль ола.

¹⁹Исьянны севген къавгъаны север, къапусыны юксек къургъан адам йыкъылмагъа къыдыра.

²⁰Къара юрек яхшылыкъ тапмаз, яланджы тиль де белягъа огърар.

²¹Акъылсыз огъланны тапкъан ана кунь корьмез, будаланынъ бабасы да къуванмаз.

²²Юрек къуванчы — гузель шифа, тюшкюн рух исе беденни къурутыр.

²³Яман адам гизлиден къапар ала ве адалетнинъ ёлуны боза.

²⁴Акъыллы адам икметтен козюни алмаз, акъылсыз исе бакъышыны дюньянынъ эр ерине ташлар.

²⁵Акъылсыз огълан — бабасынынъ дерди, оны догъгъан ананынъ да кедери.

²⁶Эм къабаатсыз адамны къабаатламакъ, эм мырзаны, догърусыны айткъаны ичюн, урмакъ — яхшы дегильдир.

²⁷Бильгили адам бошуна лаф сатмаз, анълагъан адам да тынч юреклидир.

²⁸Ахмакъ биле индемегенде икметли сайылмагъа мумкюн, агъзыны къапаткъан да анълагъан олып корюнир.