Read Мукъаддес Китап къырымтатар тилинде, Икметли сёзлер 18 Bible Online

Икметли сёзлер 18 - Мукъаддес Китап къырымтатар тилинде, bible

Икметли сёзлер 18

¹Озь истегини къыдыргъан адам башкъаларындан айырыла, эр бир акъыл-идракълы шейге къаршы чыкъа.

²Акъылсыз адам бир шейни анъламакътан озюни акъыллы этип косьтермеге бегенир.

³Яманлыкънынъ артындан — нефрет, айыпнынъ артындан — масхаралыкъ келир.

⁴Адамнынъ агъзындан чыкъкъан сёз — терен сув, икметнинъ чокърагъы — сув акъымы.

⁵Яман адамгъа яхшы бакъмакъ да, инсафлы адамгъа адалетни бермемек де ямандыр!

⁶Акъылсызнынъ тили къавгъагъа ёл ача, дудакълары да котек чагъыра.

⁷Акъылсызнынъ агъзы — онынъ элягы, дудакълары да — джанына къапкъан.

⁸Ошекчининъ лафы — пек лезетли тилимлер кибидир, олар адамнынъ ичине тез кирелер.

⁹Тенбель йыкъыджы адамгъа къардаштыр.

¹⁰РАББИнинъ ады — къатты къаледир, инсафлы адам онъа чапа ве онда хавфсызлыкъта тура.

¹¹Байнынъ малы-мулькю — онынъ пекитильген къалеси, тасавурында юксек дивар киби корюне.

¹²Йыкъылмакътан эвель кибирли юрек озюни юксельте, алчакъгонъюллик артындан исе шурет келе.

¹³Динълемезден джевап бермек — акъылсызлыкъ ве масхаралыкътыр!

¹⁴Адамнынъ руху хасталыкъкъа даянар, руху сёнюк олса эгер, оны насыл кечирир?

¹⁵Анълагъан акъыл-бильги топлай, икметлининъ къулагъы да бильги къыдыра.

¹⁶Берильген бахшыш адамгъа ёл ачар ве буюк инсанларнынъ огюне алып барар.

¹⁷Давада биринджи айткъан акълы корюнир, лякин башкъасы келип оны сынар.

¹⁸Атылгъан джереп даваны токътатыр ве кучьлю адамларнынъ къавгъасыны чезер.

¹⁹Ынджытылгъан къардаш пекитильген шеэрден къавийдир, къавгъа да къаледе къапу мандалы кибидир.

²⁰Агъзындан чыкъкъан лафынен адам къурсагъыны тойдурыр, тилинен не къазанса, оны ашар.

²¹Эм олюм, эм яшайыш тильге бойсунар, оны севген махсулындан ашар.

²²Апайны тапкъан яхшылыкъ тапа ве РАББИнинъ разылыгъыны къазана.

²³Ёкъсул ялварып сорай, бай исе къаба джевап къайтара.

²⁴Досту чокъ олгъан адам эляк олур, амма бир достнынъ севгиси къардашнынъ севгисинден къавий ола.