Read Мукъаддес Китап къырымтатар тилинде, Икметли сёзлер 19 Bible Online

Икметли сёзлер 19 - Мукъаддес Китап къырымтатар тилинде, bible

Икметли сёзлер 19

¹Къусурсыз яшагъан фукъаре яланджы акъылсыздан яхшыдыр.

²Адамгъа бильгисиз олмагъа яхшы дегиль, ашыкъкъан аякълар ёлдан урулырлар.

³Адамнынъ ахмакълыгъы онынъ ёлуны къыйыш эте, юреги де РАББИге къаршы гъазаплана.

⁴Зенгинлик чокъ дост къоша, фукъарени исе бир досту биле ташлай.

⁵Яланджы шаат джезасыз къалмаз, ялан айткъан адам да къуртулып оламаз.

⁶Чокъ адам мырзаларнынъ мераметини къыдыра, ве бахшыш берген адамнынъ досту олмагъа эр кес тырыша.

⁷Фукъареден эписи агъа-къардашлары нефрет эте, достлары да олардан бетер ондан узакълаша. Оларнен лаф этмеге фукъаре ашыкъа, лякин оларнынъ эсери биле къалмады.

⁸Акъыл къыдыргъан адам джаныны севе, анъламагъа тырышкъан яхшылыкъ тапа.

⁹Яланджы шаат джезасыз къалмаз, ялан айткъан да ёкъ олур.

¹⁰Акъылсызгъа гузель яшамагъа яхшы дегиль, къулгъа башлыкъларгъа укюм этмек ондан да бетер.

¹¹Акъыл-ферасет адамгъа тез ачувланмагъа бермей, башкъасынынъ къабаатыны багъышламакъ исе онъа шурет кетире.

¹²Падишанынъ гъазабы арсланнынъ окюригине ошай, онынъ разылыгъы исе отнынъ устюнде чыкъ кибидир.

¹³Акъылсыз огълан — бабасынынъ башына беля, къавгъаджы апай исе токътамайып тамлагъан сув кибидир.

¹⁴Эв ве байлыкъ — ана-бабадан мирастыр, акъыл-ферасетли апай исе — РАББИдендир.

¹⁵Тенбеллик терен юкъугъа далдыра, иштен къачкъан адам да ач къала.

¹⁶Эмирлерни туткъан адам джаныны къорчалар, кеткен ёлуны тюшюнмеген исе ёкъ олур.

¹⁷Фукъарени аджыгъан адам РАББИге борджкъа бере, РАББИ де онынъ яхшылыгъыны къайтарыр.

¹⁸Умют олгъаны къадар огълунъны тербиеле, амма онынъ олюмини истеме.

¹⁹Тез гъазаплангъан адам джезасыны чексин, оны бир кере къуртарсанъ, кене шуны япмагъа керек олурсынъ.

²⁰Акъыл огреткенлерине къулакъ ас, огютни къабул эт ве сонъра икметли олурсынъ.

²¹Адамнынъ юрегинде чокъ ниет бар, лякин РАББИнинъ мурады ерине келир.

²²Адамнынъ садыкълыгъы пек къыйметлидир, фукъаре де яланджыдан яхшыдыр.

²³РАББИден къоркъкъан адам омюрни ала, тойып ашай ве раат юкълай, яманлыкъ онъа кельмей.

²⁴Тенбель ашкъа батыргъан къолуны агъзына къайтармагъа биле эринир.

²⁵Мыскъылджыны джезаласанъ, саде адамлар зекялы олур, анълагъан адамны опькелесенъ исе, о, бильгисини арттырыр.

²⁶Бабасына къол котерген ве анасыны эвден къувгъан огълан — къоранта ичюн айып ве масхаралыкътыр.

²⁷Огълум! Огютни динълемесенъ, бильги сёзлеринден узакълашырсынъ.

²⁸Ярамай шаат адалетни мыскъыллай, яманларнынъ агъзы исе яланны юта.

²⁹Мыскъылджылар ичюн джезалар, акъылсызларнынъ сырты ичюн котек азырдыр.