Read Мукъаддес Китап къырымтатар тилинде, Икметли сёзлер 2 Bible Online

Икметли сёзлер 2 - Мукъаддес Китап къырымтатар тилинде, bible

Икметли сёзлер 2

¹Огълум, эгер айткъанларымны къабул этип, эмирлеримни акъылынъда тутсанъ,

²икметке къулакъ асып, юрегинъни анълайыш тарафкъа чевирсенъ,

³акъылны чагъырып, анълайышкъа ынтылсанъ,

⁴кумюш пара киби оны къыдырсанъ, сакълангъан хазине киби оны тапмагъа тырышсанъ,

⁵о заман РАББИ къоркъусыны анълап, Алла акъкъында бильгини тапарсынъ.

⁶Чюнки РАББИ икметни бере, бильгинен анълайыш да Онынъ агъзындан чыкъалар.

⁷Догъру адамлар ичюн — Онда енъиш бар, къусурсыз яшагъанлар ичюн — къалкъан.

⁸О, адалет ёлуны къорчалай, садыкъ олгъанларнынъ ёлларыны сакълай.

⁹О заман сен инсафлыкъ, адалет, догърулыкъ, эр бир яхшылыкънынъ ёлуны анъларсынъ,

¹⁰чюнки юрегинъе икмет киреджек, джанынъ ичюн бильги гузель оладжакъ.

¹¹Ферасет сени сакълайджакъ, акъыл сени къорчалайджакъ.

¹²Олар сени яман ёлдан, ялан сёзлер айткъан адамдан къуртараджакъ,

¹³къаранлыкъ ёлдан юрмек ичюн догъру ёлны ташлагъан адамлардан,

¹⁴яманлыкъ япып къувангъан, яман куфюрликтен кейф чаткъан адамлардан,

¹⁵къыйыш ёлларда юрген, ёлларыны шашыргъан адамлардан къорчалайджакъ.

¹⁶Олар да сени башкъасынынъ апайындан, эвли олгъан, сёзлерини татлы-татлы айткъан къадындан,

¹⁷яшлыгъынынъ омюр-къардашыны ташлагъан, озь Алласынынъ васиетини унуткъан апайдан къуртараджакълар.

¹⁸Онынъ эви — олюм къапкъаныдыр, юрген ёлу да — олюлернинъ дюньясына алып баргъан ёлдыр.

¹⁹Онъа кирген эр ким арткъа къайтмайджакъ, яшайышкъа алып баргъан ёлгъа иришип оламайджакъ.

²⁰Бунынъ ичюн яхшы адамларнынъ ёлундан юр, инсафлыларнынъ ёлларыны тут.

²¹Догъру адамлар — ер юзюнде яшайджакъ, къусурсызлар — онынъ устюнде къаладжакълар.

²²Ярамазлар исе ер юзюнден ред этиледжек, къара юрекли олгъанлар ондан къырыладжакълар.