Read Мукъаддес Китап къырымтатар тилинде, Икметли сёзлер 20 Bible Online

Икметли сёзлер 20 - Мукъаддес Китап къырымтатар тилинде, bible

Икметли сёзлер 20

¹Шарап мыскъыллай, ички кучьлю сеснен къычыра, оларнынъ артындан эр бир кеткен адам икметли дегиль!

²Падишанынъ гъазабы арсланнынъ окюригине ошай, оны ачувлаткъан озь джанына зарар кетире.

³Къавгъадан къачынмакъ адам ичюн шуреттир, эр ахмакъ исе тартышмагъа азырдыр.

⁴Тенбель озь вакътында сюрмей, оракъ вакъты кене кельгенде, бир шей тапмай.

⁵Адамнынъ ниетлери онынъ юрегинде терен сувлар киби, лякин анълагъан адам оларны ондан чекип чыкъарыр.

⁶Чокъ адам озь садыкълыгъы акъкъында къопайып айта, лякин керчектен ишанчлы адамны ким тапып олур?

⁷Инсафлы адам къусурсыз яшай, онынъ огъуллары бахтлыдыр!

⁸Макеме тахтында отургъан падиша козьлеринен эр бир яман шейни бир къачырмай корер.

⁹«Юрегимни темизледим, гуналарымдан арындым», — ким айтып олур?

¹⁰РАББИ эм ялан теразеден, эм догъру олмагъан ташлардан, — экисинден нефрет эте.

¹¹Япкъанлары темизми, догърумы олгъанына коре, йигит эткен ишлеринден белли олур.

¹²Эм эшиткен къулакъны, эм корьген козьни — экисини яраткъан РАББИдир!

¹³Юкъу севсенъ — ёкъсул олурсынъ, козь юммасанъ — ашынъ бол олур.

¹⁴Сатын алгъан адам: «Бир шейге ярамаз, бир шейге ярамаз», — айтар, лякин алып кеткен сонъ макътаныр.

¹⁵Дюньяда алтын ве чокътан-чокъ къыйметли ташлар бардыр, лякин бильгили агъыз олардан паалыдыр.

¹⁶Ал онынъ урбасыны, чюнки о, ябанджы ичюн кефиль олды, чет адам ичюн залог ал.

¹⁷Алдавнен къазанылгъан отьмек башта адамгъа татлы корюнир, лякин сонъундан о, агъзында ташчыкъларгъа айланыр.

¹⁸Акъыл танышкъанда ниетлер ерине келир, бойлеликнен, насиатны динълеп, дженк эт.

¹⁹Ошек ташыгъан адам сыр ачар, бошбогъаздан узакъ тур.

²⁰Ана-бабасыны къаргъагъан адамнынъ чырагъы гедже къаранлыгъынен сёнер.

²¹Тез алынгъан мирас сонъундан берекетли олмаз.

²²«Япкъан яманлыкъны къайтарырым», — деме, РАББИге ташла, о, сени къорчалар.

²³РАББИ ялан ташлардан нефрет эте, ялан теразе де — яхшы дегиль.

²⁴Адамнынъ адымларыны РАББИ догърулта, ойле олса, туткъан ёлуны адам насыл анълап олур?

²⁵Ашыкъып этильген ант ве тюшюнмейип берильген адакъ — адам ичюн къапкъандыр.

²⁶Икметли падиша яман адамларны савурыр, оларны арман копчегинен эзип ташлар.

²⁷Адамнынъ руху — РАББИнинъ нурудыр, о, юрекнинъ теренликлерини сынай.

²⁸Мерамет ве садыкълыкъ падишаны къорчалай, акъикъатнен о, таджыны тута.

²⁹Яш огъланларнынъ шурети — кучьте, къарт адамларнынъ шерефи — чаларгъан сачта.

³⁰Котек ашагъан адамнынъ яралары яманлыкътан арындырыр, ве домпузлама юрекнинъ теренликлерини тюзетир.