Read Мукъаддес Китап къырымтатар тилинде, Икметли сёзлер 21 Bible Online

Икметли сёзлер 21 - Мукъаддес Китап къырымтатар тилинде, bible

Икметли сёзлер 21

¹Падишанынъ юреги РАББИнинъ элиндедир, акъымдаки сув киби, оны истегени киби чевирир.

²Адам озюнинъ эр алгъан ёлуны догъру саяр, амма РАББИ адамларнынъ юреклерини сынар.

³Инсафлы ве адалетли шейлерни япмакъ РАББИнинъ огюнде къурбандан яхшыдыр.

⁴Козьлернинъ кибирлиги, юрекнинъ магърурлыгъы, яманларнынъ нуру — гунадыр.

⁵Ишкир адамнынъ тюшюнгени оны боллукъкъа алып кетирир, эр бир ашыкъыш исе адамны ёкъсул этер.

⁶Ялан тильнен къазанылгъан байлыкъ — тез гъайып олгъан думан, олюм тузагъыдыр.

⁷Яман адамларнынъ зорбалыгъы оларны гъайып этер, чюнки олар адалетни ред эттилер.

⁸Къабаатлы адамнынъ ёлу къыйыш, къабаатсызнынъ япкъанлары исе дос-догърудыр.

⁹Таваннынъ бир кошечигинде отурмакъ къавгъаджы апайнен эвде яшамакътан яхшыдыр.

¹⁰Яман адамнынъ джан истеги — яманлыкътыр, досту биле онынъ козюнде мерамет тапамаз.

¹¹Мыскъылджыны джезаласалар, саде адам икмет топлай, акъыл-ферасетли адамгъа бир шей анълатсалар, о, бильгини джыя.

¹²Инсафлы адам яманларнынъ эвине анълайышнен бакъа ве оларнынъ белягъа тюшкенини коре.

¹³Фукъаренинъ къыяметине къулакъ къапаткъан, бир кунь ола озю къыямет къопарыр, лякин онъа кимсе джевап бермез.

¹⁴Гизли берильген бахшыш — гъазапны, къоюнгъа сокъулгъан къапар исе — къызгъын ачувны ятыштыра.

¹⁵Адалет ерине кельсе — инсафлы адам къуваныр, яман адам исе дешет тюбюне къалыр.

¹⁶Акъыл-ферасет ёлундан узакълашкъан адам олюлернинъ топлашувында тынчлыкъ тапар.

¹⁷Шенълик севген ёкъсуллыкъ корер, шарапнен зейтюн ягъыны севген зенгин олмаз.

¹⁸Догъру адам ичюн одеме — яман адам, догърусыны айткъан адам ичюн одеме — къара юрекли адам.

¹⁹Сахрада отурмакъ джарис ве къавгъаджы апайнен яшамакътан яхшыдыр.

²⁰Икметли адамнынъ эви паалы шейлерге ве зейтюн ягъына толудыр, акъылсыз исе бутюн малыны тез юта.

²¹Инсафлыкъкъа ве садыкълыкъкъа ынтылгъан адам яшайыш, инсафлыкъ ве шурет тапар.

²²Икметли адам къараманларнынъ шеэрине кире, олар ишангъан къалени йыкъа.

²³Агъзыны ве тилини туткъан адам башыны белядан къуртара.

²⁴Кибирли ве магърурлы адамнынъ ады — мыскъылджы, къызгъын кибирлигинде арекет эте.

²⁵Тенбельнинъ нефисхорлыгъы оны ольдюрир, чюнки къоллары чалышмагъа истемез.

²⁶Кунь-куньден истеклеринден джаны яна, инсафлы адам исе аджымайып бере.

²⁷Яман адамларнынъ чалгъан къурбаны пистир, къара ниетнен чалынгъан къурбан ондан бетердир.

²⁸Ялан айткъан шаат ёкъ олур, дикъкъатнен динълеген адамнынъ айткъаны исе олур.

²⁹Яман адам озюни кибир тута, догъру адам исе озь ёлунда къатты тура.

³⁰Адамларнынъ икмети, анълайышы, насиаты — РАББИнинъ огюнде бош ер.

³¹Атны дженк ичюн азырларлар, гъалебе исе РАББИдендир.