Read Мукъаддес Китап къырымтатар тилинде, Икметли сёзлер 22 Bible Online

Икметли сёзлер 22 - Мукъаддес Китап къырымтатар тилинде, bible

Икметли сёзлер 22

¹Яхшы ад — буюк байлыкътан, урьмет де — кумюш ве алтындан яхшыдыр.

²Зенгин ве ёкъсул ян-янаша туралар: экисини РАББИ яратты.

³Зекялы адам келеяткъан беляны коре ве сакълана, саде исе, огге атылып, зарарлана.

⁴Алчакъгонъюлликнинъ ве РАББИ къоркъусынынъ пешинден зенгинлик, шурет ве яшайыш келир.

⁵Къара юрекли адамнынъ ёлу тикен ве къапкъан толудыр, джанына мукъайт олгъан адам ондан узакълашыр.

⁶Огъланны башындан догъру ёлгъа къой, къартайгъан сонъ да ондан таймаз.

⁷Зенгин адам фукъаренинъ саиби олур, борджкъа алгъан — борджкъа бергеннинъ къулу олур.

⁸Адалетсизлик сачкъан — беля джыяр, онынъ гъазабындан бир шей биле къалмаз.

⁹Джумерт адам яхшы бахшышлар алыр, чюнки о, отьмегинден фукъареге узата.

¹⁰Мыскъылджыны къуваласанъ, къавгъа битер, даванен сёгюнч де сонъуна етер.

¹¹Юрек темизлигини севген адам гузель лаф эте ве падишанынъ достлугъыны къазаныр.

¹²РАББИ бильгини къорчалар, къара юреклининъ сёзлерини исе силип ташлар.

¹³«Тышарыда арслан бар! Сокъакъкъа чыкъсам, мени парчалар!» — дей тенбель.

¹⁴Башкъасынынъ апайынынъ агъзы — тюпсюз чукъур, РАББИнинъ гъазабына огърагъан анда тюшер.

¹⁵Огъланнынъ юреги ахмакълыкъкъа толу, амма тербие таягъы оны узакъ къувар.

¹⁶Байлыгъыны арттырмакъ ичюн фукъаренинъ джаныны агъырткъан да, зенгин адамгъа бахшыш берген адам да ахыр-сонъу ёкъсуллыкъта олур.

¹⁷Къулакъ асып, икметли адамларнынъ сёзлерини динъле, юрегинъ бильгиме дикъкъат этсин.

¹⁸Айткъанларымны ичинъде сакъласанъ, бахтлы олурсынъ, олар эр вакъыт агъзынъда азыр олурлар.

¹⁹Сен РАББИге ишанар деп, мен бугунь оларны санъа огретем.

²⁰[20-21] Акъикъатны бильдирмек ичюн, мен санъа насиаткъа ве бильгиге толу отуз ибаре яздым. Сонъ сен сени ёллагъанларгъа догъру джевап кетире билирсинъ.

²²Ёкъсулны, фукъаре олгъаны ичюн, сыдырма, шеэрнинъ араба къапусы янында заваллынынъ джаныны агъырттырма,

²³чюнки РАББИ оларнынъ давасыны чезер ве оларгъа залым эткен адамларнынъ джаныны алыр.

²⁴Ачувлы адамнен дост олма, тез къызгъан адамгъа ёлдаш олма.

²⁵Ёкъса оларнынъ ёлуна тюшип, джанынъа къапкъан къоярсынъ.

²⁶Башкъасынынъ борджу ичюн къол берип, кефиль олмакътан къачын.

²⁷Борджны къайтармакъ ичюн акъчанъ олмаса, яткъан тёшегинъни биле тартып чыкъарырлар.

²⁸Баба-деделеринъ кечирген эски сынъырнынъ ерини денъиштирме.

²⁹Ишини усталыкънен эткен адамны корьдинъми? О, адий адамлар огюнде турмаз, падишаларнынъ огюнде турар.