Read Мукъаддес Китап къырымтатар тилинде, Икметли сёзлер 23 Bible Online

Икметли сёзлер 23 - Мукъаддес Китап къырымтатар тилинде, bible

Икметли сёзлер 23

¹Акимдарнен ашамагъа отургъанда, огюнъде олгъанына дикъкъат эт.

²Буюк нефисинъ олса, агъзынъа сынъыр къой.

³Онынъ лезетли аш-сувларыны истеме, чюнки о — алдатыджы аш.

⁴Нефисхор олып зенгинликни топлама, ойле тюшюнме биле.

⁵Энди байлыкъ корьдим дегенде — о ёкъ олур, чюнки къанатланып, къартал киби, кокке учар.

⁶Къытмыр адамнынъ софрасындан ашама, онынъ лезетли ашларыны истеме,

⁷чюнки онынъ озю, тюшюнджелери киби, къарадыр. «Аша, ич», — айтыр санъа, лякин юреги сеннен дегильдир.

⁸Ашагъан кесекни къусарсынъ, гузель сёзлеринъ де бошуна кетер.

⁹Акъылсызнен лаф этме, чюнки о, сенинъ акъыллы сёзлеринъни бир шей ерине корьмез.

¹⁰Эвельде кечирильген сынъырларнынъ ерини денъиштирме, оксюзлернинъ тарлаларына да кирме.

¹¹Чюнки оларнынъ Къоруйыджысы кучьлюдир, ве оларнынъ давасыны санъа къаршы О, чезер.

¹²Огютке юрегинънен янаш, акъыллы сёзлерге де къулакъ ас.

¹³Огъланны тербиесиз къалдырма, оны таякънен котеклесенъ, о ольмез.

¹⁴Оны таякънен урсанъ да, джаныны о бир дюньядан къуртарырсынъ.

¹⁵Огълум, эгер юрегинъ икметли олса, меним юрегим де къуваныр.

¹⁶Дудакъларынъ догърулыкъ айткъанда, джан-юректен севинирим.

¹⁷Юрегинъ гунахкярларны пахылламасын, амма даима РАББИден къоркъсун,

¹⁸чюнки керчектен де, бир келеджегинъ бар, умютинъ де кесильмез.

¹⁹Огълум, динъле ве икметли ол, юрегинъни догъру ёлгъа къой.

²⁰Шарап севген ичкиджилернинъ ве этке къарарсыз быкъкъанларнынъ арасында олма,

²¹чюнки саргъушларнен ачкозьлер ёкъсуллашыр, тенбеллик де адамнынъ устюне йыртыкъ урба кийдирир.

²²Санъа омюр берген бабанъны динъле, ананъ къартайгъан сонъ, оны унутма.

²³Акъикъатны сатын ал да, икметни, огютни, акъылны сатма.

²⁴Инсафлы адамнынъ бабасы пек къуваныр, икметлиге омюр берген адам да шенъленир!

²⁵Ана-бабанъ къувансын, сени тапкъан ананъ севинсин!

²⁶Огълум! Мени бутюн юрегинъден динъле, кеткен ёлумдан козюнъни алма.

²⁷Фаише — терен чукъурдыр, башкъасынынъ апайы — тар къуюдыр.

²⁸О, бир айдут киби сакъланып отура да, адамларнынъ арасында къара юреклилернинъ сайысыны арттыра.

²⁹Ах-вах чеккен ким? Къавгъалашкъан ве шикяетленген ким? Бош ерде яралангъан ким? Козю къангъа толгъан ким?

³⁰Шарап башына отурып ичип-шишленген адам, чешит-тюрлю къокъулы шарапларны къыдыргъан инсан!

³¹Шарапнынъ къырмызы ренкине, онынъ къаде ичинде ойнагъанына, богъаздан ашагъы енгиль кеткенине бакъма.

³²Сонъунда йылан киби тишлер, зеэрли йылан киби чакъар,

³³козьлеринъ де башкъаларынынъ апайларына бакъмагъа башлар, акъылынъа да куфюр шейлер келип башлар,

³⁴денъизнинъ ортасында яткъан киби, геми дирегининъ тёпесинде юкълагъан киби олурсынъ.

³⁵«Мени урдылар, — дерсинъ, — агъры олмады, домпузладылар мени — ич бир шейни дуймадым! Уянгъандан сонъ, кене ичмеге къыдыраджагъым».