Read Мукъаддес Китап къырымтатар тилинде, Икметли сёзлер 25 Bible Online

Икметли сёзлер 25 - Мукъаддес Китап къырымтатар тилинде, bible

Икметли сёзлер 25

¹Мына Сулейманнынъ башкъа икметли сёзлери. Оларны Ехуда падишасы Хизкиянынъ адамлары топлады.

²Шейлерни гизлеген Аллагъа шан-шурет! Гизли шейлерни ачкъан падишаларгъа да шан-шурет!

³Кокнинъ юксеклиги, ернинъ теренлиги, падишанынъ юрегинде не олгъаны да билинмез.

⁴Кумюшке къошулгъаныны айыр, ве къуюмджы бир савут япар.

⁵Падишанынъ янындан яманларны узакълаштыр, ве падишанынъ тахты акъикъатта темеллешир.

⁶Падишанынъ огюнде озюнъни юксек тутма, буюк адамларнынъ еринде де турма,

⁷чюнки сен корьген мырзаларнынъ огюнде ашаланмакътан, санъа: «Якъынджа келип отур», — дегенлери яхшыдыр.

⁸Макемеге даванъны еткизмеге ашыкъма, чюнки сонъунда башкъасы сени масхара этсе, не япаджакъсынъ?

⁹Башкъа адамнен даванъны юзьме-юзь чез ве башкъасынынъ сырларыны ачма.

¹⁰Ёкъса буны эшиткен сени утандырыр, ве яман намдан къуртулып оламазсынъ.

¹¹Еринде айтылгъан сёз кумюш оймаларында алтын алма кибидир.

¹²Динълеген къулакъ ичюн икметли адамнынъ опькеси — алтын купе, темиз алтындан япылгъан ильван кибидир.

¹³Ишанчлы эльчи оны ёллагъан саиби ичюн — оракъ вакътында къар салкъыны киби, эфендисининъ джанына о кучь-къувет къайтара.

¹⁴Ягъмурсыз булутнен ель насыл олса, «бахшыш беририм» деп макътангъан, амма бермеген адам да ойледир.

¹⁵Сабырнен укюмдарны да къандырмакъ мумкюн, йымшакъ тиль кемикни де сындырыр.

¹⁶Бал тапсанъ, къарарынен аша, арткъач ашасанъ, къусарсынъ.

¹⁷Достунънынъ эвине сыкъ-сыкъ барма, ёкъса сенден безер ве сени кореджек козю олмаз.

¹⁸Башкъа адамгъа къаршы ялан шаатлыкъ эткен адам — чокъмар, къылыч ве сюйрю окъ кибидир.

¹⁹Агъыр кунюнъде ишанчсыз адамгъа ишанч — чюрюк тиш я да сакъат аякъ кибидир.

²⁰Юреги агълагъан адамгъа тюркю айтмагъа — сувукъ авада урбаны чыкъармакъ, я да содагъа сирке къоймакъ кибидир.

²¹Душманынъ ач олса, онъа аш бер, сувсагъан олса, сув бер.

²²Бойле япып сен онынъ башына янгъан куллер топларсынъ, РАББИ исе санъа къайтарыр.

²³Шимальден эскен ель ягъмур кетиргени киби, ошекчининъ тили де ачувлы бакъышларгъа ёл ачар.

²⁴Таваннынъ бир кошечигинде отурмакъ къавгъаджы апайнен эвде яшамакътан яхшыдыр.

²⁵Узакъ мемлекеттен кельген яхшы хабер пек сувсагъан джан ичюн салкъын сув кибидир.

²⁶Яман адамнынъ огюнде къалтырагъан инсафлы адам — суву булангъан чокъракъ, кирленген чешме кибидир.

²⁷Пек чокъ бал ашамакъ — яхшы дегиль, шанлы адамларнынъ шуретини къыдырмакъ да ойледир.

²⁸Озюни тутып оламагъан адам — диварсыз, йыкътырылгъан шеэр кибидир.