Read Мукъаддес Китап къырымтатар тилинде, Икметли сёзлер 26 Bible Online

Икметли сёзлер 26 - Мукъаддес Китап къырымтатар тилинде, bible

Икметли сёзлер 26

¹Язгъа — къар, оракъ вакътына — ягъмур киби, акъылсызгъа да ойле шурет ярашмаз.

²Къуш учар, къарылгъач кетер, акъсыз къаргъыш да бойле тутмаз.

³Аткъа — къамчы, эшекке — юген, акъылсызнынъ сыртына да — сопа.

⁴Акъылсызгъа ахмакълыгъына коре джевап къайтарма, ёкъса сен де о киби ахмакъ олурсынъ.

⁵Акъылсыз озюни акъыллы деп саймамакъ ичюн, онъа ахмакъча джевап къайтар.

⁶Хабер еткизмекни акъылсызгъа буюргъан озь-озюни аякътан кесер, озюне зарар кетирир.

⁷Акъылсызнынъ агъзындан чыкъкъан икметли сёз топал адамнынъ юрюшине ошар.

⁸Акъылсызны шуретлемек — яйгъа окъны багъламакъ кибидир.

⁹Акъылсызнынъ агъзындан чыкъкъан икметли сёз саргъушнынъ къолундаки когемлик киби.

¹⁰Адамларны акъылсызджа аткъан окъчу киби, ёлдан кечкенни я да акъылсызны ишке алгъан адам да ойледир.

¹¹Къускъагъына къайткъан копек киби, ахмакълыгъында инатлангъан акъылсыз адам да ойледир.

¹²Озюни икметли деп туткъан адамны корьдинъми? Акъылсыз биле ондан ишанчлыдыр.

¹³Тенбель: «Ёлда арслан бар! Мейданларда джанавар юре!» — дер.

¹⁴Къапу ильмеклерде саллана, тенбель де тёшегинде бир янындан башкъа янына айлана.

¹⁵Тенбель ашкъа узангъан къолуны агъзына къайтармагъа биле эринир.

¹⁶Тенбель озюни, тюшюнип джевап къайтаргъан еди адамдан икметли саяр.

¹⁷Башкъасынынъ къавгъасына киришкен адам кеткен копекни къулагъындан тарткъан адамгъа ошар.

¹⁸Атешли окълар ве ольдюриджи силя аткъан дели киби,

¹⁹башкъа адамны алдатып, сонъундан: «Шакъа эттим!» — деген адам да ойледир.

²⁰Одун олмаса — атеш сёнер, ошекчи олмаса — къавгъа битер.

²¹Къор ичюн — комюр, атеш ичюн — одун, къавгъаны да алевлендирмек ичюн — ошекчи керек.

²²Ошекчининъ лафы — пек лезетли тилимлер кибидир, олар адамнынъ ичине тез кирелер.

²³Къара юрекли адамнынъ татлы сёзлери балчыкътан япылгъан, кумюшке къошулгъан айырмалардан къаплангъан савуткъа ошар.

²⁴Душман лафларынен разылыкъ бере, ичинде исе хиянетликни тюшюне;

²⁵онынъ назик сесине биле инанма, чюнки юрегинде еди нефретли шей бардыр;

²⁶алдавнен нефретини сакъласа да, яманлыгъы джемаат арасында ачылыр.

²⁷Чукъур къазгъан адам ичине озю тюшер, ташны юварлаткъан инсан тюбюне озю огърар.

²⁸Яланджы тиль ынджынгъан адамлардан нефрет эте, ялтакълангъан агъыз эляк азырлай.