Read Мукъаддес Китап къырымтатар тилинде, Икметли сёзлер 27 Bible Online

Икметли сёзлер 27 - Мукъаддес Китап къырымтатар тилинде, bible

Икметли сёзлер 27

¹Ярынки куннен макътанма, чюнки не кетиреджегинден хаберинъ ёкъ.

²Озь тилинъ дегиль — башкъасынынъ тили, озь дудакъларынъ дегиль — чет дудакълар сени макътасын.

³Таш — бир юктир, къум — енгиль дегиль, ахмакънынъ агъырткъаны исе экисинден агъыр.

⁴Гъазап мераметсиз, афакъанны баш эталмазсынъ, лякин куньджюликке ким даянып олур?

⁵Ачыкъ бир опьке сакълы севгиден яхшыдыр.

⁶Севген адамдан кельген яралары, нефретленген адамнынъ чокъ опюшинден яхшыдыр.

⁷Токъ адамнынъ джаны солакъ балны истемез, ач адамгъа исе аджджы шей биле татлы келир.

⁸Тувгъан ерини къалдыргъан адам ювасындан узакъ учкъан къуш кибидир.

⁹Гузель ягълар ве къокъулар юрекни къувандыра, достнынъ джан-юректен берген насиаты да татлы келе.

¹⁰Эм озюнънинъ достларынъны, эм бабанънынъ достларыны къалдырма, башынъа беля тюшкенде, сой-соп къыдырма, якъын къомшу узакъ сойдан яхшыдыр.

¹¹Огълум, икметли ол ве бойле юрегимни къувандыр, сонъ мени опькелегенлерге мен джевап берип олурым.

¹²Зекялы адам беляны корьгенинен сакъланыр, саде адамлар исе чыкъып джезаланыр.

¹³Ал онынъ урбасыны, чюнки о, ябанджы ичюн кефиль олды, ве чет адам ичюн залог ал.

¹⁴Саба танъда достны кучьлю сеснен макътагъан адамны къаргъагъан инсан киби саярлар.

¹⁵Къавгъаджы апай — ягъмурлы куньде токътамайып тамлагъан сув кибидир;

¹⁶бойле апайны тынчландырмакъ — ельни тутмакъ я да ягъны авучнен алмакъ кибидир.

¹⁷Демирни демир къайрай, адамгъа исе башкъа адам акъыл огретир.

¹⁸Инджир терегини бакъкъан адам мейвасындан ашар, эфендисини къорчалагъан исе шурет къазаныр.

¹⁹Адамнынъ бети сувда корюнгени киби, адамнынъ юреги де башкъа адамнынъ юрегинде корюнир.

²⁰О бир дюнья ве эляк дияры адамгъа тоймаз, бойле де адамнынъ козю бакъмагъа ёрулмаз.

²¹Алтын — оджакъта, кумюш — иритильгенде сыналыр, адам исе макъталып сыналыр.

²²Ахмакъны аванда богъдайнен берабер аван токъмагъынен тюйсенъ биле, онынъ ахмакълыгъы ондан айырылмаз.

²³Къой-эчкилеринъни яхшы бакъ, сюрюлеринъе мукъайт ол,

²⁴чюнки байлыкъ омюрлик дегильдир, тадж да эр вакъыт несильден-несильге кечмез.

²⁵От солгъанынен тазе ешиллик пейда олур, дагълардаки отлар да джыйылыр;

²⁶къойлар сени кийиндирир, текелер де тарланынъ фиятыны котерир;

²⁷эчкилеринънинъ сютю санъа да ашамагъа етер, эвдекилеринънен, хызметчи къызларынъны да тойдурыр.