Read Мукъаддес Китап къырымтатар тилинде, Икметли сёзлер 28 Bible Online

Икметли сёзлер 28 - Мукъаддес Китап къырымтатар тилинде, bible

Икметли сёзлер 28

¹Яман адамнынъ пешинден кимсе къуваламаса биле, чапар, инсафлы адам исе арслан киби тынчтыр.

²Исьян толу мемлекетте чокъ башлыкъ олур, лякин анълагъан, бильгили акимдарнен мемлекет чокъ вакъыт турар.

³Фукъарелерни хорлагъан ёкъсул адам ашлыкъны хараплагъан сагъанакъ ягъмур кибидир.

⁴Къанундан четке чыкъкъан адамлар яманларны макътар, къанунны туткъан адамлар исе оларгъа къаршы чыкъар.

⁵Яман адамлар адалетни анъламаз, РАББИни къыдыргъанлар исе оны бутюнлей анълар.

⁶Къусурсыз яшагъан фукъаре къыйыш ёлда юрген зенгин адамдан яхшыдыр.

⁷Къанунны кутькен огъул акъыллыдыр, ярамай адамларнен достлукъ эткен исе бабасыны утандырыр.

⁸Фаиз ичюн акъча берген ве бойле байлыгъыны арттыргъан адам зенгинлигини фукъарелерни аджыгъан адам ичюн топлар.

⁹Къанунгъа къулакъ асмагъан адамнынъ дуасы да пистир.

¹⁰Догъру адамларны яман ёлгъа ургъанлар къазгъан чукъурларына озю тюшер, къусурсыз адамлар исе яхшы мирас алыр.

¹¹Зенгин адам озюни икметли саяр, лякин акъыллы ёкъсул оны не олгъаныны корер.

¹²Инсафлы адамлар байрам япкъанда, эр кес къуваныр, яман адамлар юксельгенде исе, эр кес сакъланыр.

¹³Гуналарыны гизлеген адам хайырыны корьмез, тёвбе этип оларны ташлагъангъа исе мерамет этерлер.

¹⁴Эр бир заман РАББИден къоркъкъан адам бахтлыдыр, инатлангъан адамнынъ башына исе беля тюшер.

¹⁵Заваллы халкънынъ яман акимдары — окюрген арслан, адамгъа атылгъан аюв кибидир.

¹⁶Анълайыштан эксик акимдар халкъны чокъ къыйнар, намуссыз келирден нефретленген исе яшайышны узатыр.

¹⁷Адам къаныны тёккен адам ольгендже къачып юреджектир, онъа кимсе ярдым этмесин.

¹⁸Къусурсыз яшагъан къуртарылыр, къыйыш ёллардан юрген исе бир ёлунда йыкъылыр.

¹⁹Топрагъыны ишлеген адамнынъ ашы бол олур, бошлукъны къувалагъан исе ёкъсуллыкъкъа тояр.

²⁰Садыкъ адам чокъ бахшыш алыр, бай олмагъа ашыкъкъан исе белядан къуртулмаз.

²¹Экиюзьли олмакъ — яхшы дегиль, адам бир тилим отьмек ичюн адалетсизлик япар.

²²Ачкозь адам байлыкъкъа ашыкъып, фукъаре оладжагъындан хабери ёкъ.

²³Башкъасыны опькелеген адам сонъунда тильнен ялтакълангъан адамдан буюк разылыкъ тапар.

²⁴Ана-бабасыны союндырып, «Бу — гуна дегиль», — деген адам айдутларнынъ достудыр.

²⁵Нефисхор адам къавгъа чыкъарыр, РАББИге ишангъан исе онъар.

²⁶Озюне ишангъан — акъылсыздыр, икмет ёлунда юрген исе къуртурылыр.

²⁷Фукъареге берген ёкъсул олмаз, козьлерини юмгъан исе къаргъышларыны арттырыр.

²⁸Яман адамлар юксельгенде, эр кес сакъланыр, олар ёкъ олгъан сонъ исе, инсафлы адамлар чокълашыр.