Read Мукъаддес Китап къырымтатар тилинде, Икметли сёзлер 29 Bible Online

Икметли сёзлер 29 - Мукъаддес Китап къырымтатар тилинде, bible

Икметли сёзлер 29

¹Сыкъ опькени эшитип, юрегини инатландыргъан адам апансыздан эляк олур, — арткъа ёлу олмаз.

²Инсафлы адамлар чокълашса, халкъ къуваныр, яман адамлар акимдарлыкъ этсе, халкъ инъильдер.

³Икметни севген адам бабасыны къувандырыр, фаишелернен юрген исе байлыгъыны кокке савурыр.

⁴Адалетли акимдарлыкъ эткен падиша мемлекетини къавийлештирир, къапар севген падиша исе топрагъыны гъайып этер.

⁵Башкъасына ялтакълангъан адам онъа къапкъан къояр.

⁶Яман адамнынъ гунасы — онъа къапкъан, инсафлы адам исе шенъленип къуваныр.

⁷Инсафлы адам ёкъсулларнынъ давасыны акъылнен чезер, яман адамнынъ исе бойле къасевети ёкъ.

⁸Мыскъылджылар шеэрни биле ёлдан урар, икметли адамлар исе афакъанны ятыштырыр.

⁹Икметли адам ахмакънен давалашкъанда, ачувланса да, кульсе де, — раат олмаз.

¹⁰Къанназ адамлар къусурсызлардан нефретленелер ве догъру адамларны ольдюрмеге къыдыралар.

¹¹Акъылсыз гъазабыны тутмаз, икметли исе оны ятыштырыр.

¹²Акимдар ялан лафкъа къулакъ асса, эписи везирлери де яман олур.

¹³Ёкъсул ве залым эткен адам ян-янаша тура: экисининъ козьлерине РАББИ ярыкъ бере.

¹⁴Эгер падиша ёкъсулларнынъ давасыны акъикъатлы чезсе, онынъ тахты эбедий олур.

¹⁵Таякъ ве опьке икмет берир, озь алына къалдырылгъан бала исе анасынынъ масхаралыгъы олур.

¹⁶Яман адамлар чокълашкъан ерде акъсызлыкъ да чокълашыр, лякин инсафлы адамлар оларнынъ ёкъ олгъанларыны корер.

¹⁷Огълунъны тербиелесенъ, о, сени раат этер джанынъны да къувандырыр.

¹⁸Коктен берильген ёлланма олмаса, халкъ башсыз олур, къанунны кутькен исе не бахтлы олур!

¹⁹Къул сёзнен тербие этильмез, айткъан лафынъны анъласа да, къулакъ асмаз.

²⁰Лаф этмеге ашыкъкъан адамны корьдинъми? Акъылсыз биле ондан ишанчлыдыр.

²¹Эгер къулны балалыгъындан эркелесенъ, хайырыны корьмезсинъ.

²²Ачувлы адам къавгъа чыкъара, гъазаплы да чокъ акъсызлыкъ япа.

²³Кибирлик адамны ашалай, алчакъгонъюлли исе шурет къазаныр.

²⁴Хырсызгъа ортакъ олгъан адам — озь-озюне душман, къаргъышны о эшитсе биле, бир шей айтмаз.

²⁵Адамлардан къоркъмакъ — озюнъе къапкъан къоймакъ, лякин РАББИге ишангъан — сарсылмаз.

²⁶Чокъ адамлар акимдарнынъ козюне кирмеге истер, лякин адамгъа адалет РАББИден келе.

²⁷Инсафлы адамлар адалетсизлерден нефрет этер, яман адамлар исе догъру ёлда юргенлерге кин беслер.