Read Мукъаддес Китап къырымтатар тилинде, Икметли сёзлер 3 Bible Online

Икметли сёзлер 3 - Мукъаддес Китап къырымтатар тилинде, bible

Икметли сёзлер 3

¹Огълум, огреткенлеримни унутма, эмирлеримни юрегинъде сакъла,

²чюнки олар омрюнънинъ куньлерини ве йылларыны узатаджакълар, санъа муаббетлик кетиреджеклер.

³Мерамет ве садыкълыкъ сени къалдырмасын: оларны бойнунъа сар, пиляки таш устюне киби юрегинънинъ устюне яз.

⁴Сонъ Алланынъ ве адамларнынъ козьлери огюнде санъа хайыр ве акъыл-ферасет оладжакълар.

⁵РАББИге джан-юректен ишан, озь акъылынъа таянма.

⁶Эписи ёлларынъда РАББИни бильмеге тырыш, ве О, сенинъ ёлларынъны догъру япаджакъ.

⁷Озюнъни икметли сайма, амма РАББИден къоркъ ве яманлыкътан узакъ тур.

⁸Бу, беденинъе — сагълыкъ, кемиклеринъе де — къувет олур.

⁹Мал-мулькюнъден ве эр бир ишинънинъ биринджи берекетинъден РАББИге пай айырып, Оны урьмет эт.

¹⁰Сонъ анбарларынъны мал басар, фычыларынъ да яш шарапнен толып ташар.

¹¹Огълум, РАББИнинъ огютини ред этме ве опькесинден нефретленме,

¹²чюнки баба севимли огълуны джезалагъаны киби, РАББИ де кимни севе, оны да джезалай.

¹³Икметке иришкен адам, анълайышкъа саип олгъан адам не бахтлыдыр!

¹⁴Чюнки оны къазангъаны кумюш къазангъанындан яхшыдыр, онынъ келири алтындан олгъан келирден берекетлидир,

¹⁵о, дегерли ташлардан паалыдыр, бутюн истегенлеринъден ич бир шей онъа тенъ олмаз.

¹⁶Онынъ онъ къолунда — узакъ омюр, сол къолунда исе — байлыкъ ве шурет.

¹⁷Онынъ ёллары — гузель ёллардыр, ве эписи ёлчыкълары — муаббетликтир.

¹⁸Икметни тапып алгъан адам ичюн, о — омюр терегидир, оны къатты туткъан — бахтлыдыр!

¹⁹РАББИ ернинъ темелини икметнен къойды, усталыкънен коклерни ерлештирди.

²⁰Онынъ бильгиси теренликлер яра ве булутлардан чыкъ тюшюре.

²¹Огълум, буны козь огюнъден къачырма, идракъ ве ферасетинъни даима сакъла.

²²Олар джанынъ ичюн — омюр, бойнунъ ичюн — хайырлы ильван олур.

²³О вакъыт ёлунъ хавфсыз олур, аягъынъ да абынмаз.

²⁴Юкъламагъа къоркъусыз ятарсынъ, юкълап къалгъанынъдан сонъ да юкъунъ татлы олур.

²⁵Апансыз белядан ве ярамайларгъа кельген къазадан къоркъма,

²⁶чюнки РАББИ сенинъ ишанчынъ оладжакъ, аягъынъны къапкъандан О сакълайджакъ.

²⁷Элинъден кельсе, адамнынъ акъкъыны бермектен къачынма.

²⁸Янынъда олып да, башкъа адамгъа: «Кет, ярын келирсинъ, о вакъыт беририм», — деме.

²⁹Сенден хавф беклемеген къомшугъа къаршы бир яманлыкъ япмагъа тюшюнме.

³⁰Санъа яманлыкъ этмеген адамнен бош ерде къавгъа этме.

³¹Зорбалыкъ эткен адамны пахыллама, онынъ ёлларындан ич бирини сайлама,

³²чюнки РАББИ къара юрекли адамдан нефретлене, догъру адамларгъа исе О ишана.

³³Гунахкярнынъ эвини РАББИ къаргъай, инсафлы адамларнынъ эвини исе багъышлай!

³⁴Мыскъылджыларны О мыскъыллайджакъ, алчакъгонъюллилерге исе хайыр береджек.

³⁵Икмет саиплери мирас оларакъ шурет аладжакълар, акъылсызлар исе — масхаралыкъ.