Read Мукъаддес Китап къырымтатар тилинде, Икметли сёзлер 30 Bible Online

Икметли сёзлер 30 - Мукъаддес Китап къырымтатар тилинде, bible

Икметли сёзлер 30

¹Массадан олгъан Яке огълу Агъурнынъ сёзлери. Агъур оларны Итиэлге, Итиэлге ве Укъалгъа айтты.

²Керчектен де, мен эписи адамлардан будалам, менде адам акъылы ёкъ.

³Икметке де огренмедим, мукъаддес бильгиге де малик олмадым.

⁴Ким коклерге чыкъып, андан энди? Ким ельни авучларына топлады? Сувларны урбасына ким сарып алды? Ернинъ сынъырларыны ким къойды? Ады недир? Огълунынъ ады недир? Билесинъми?

⁵Алланынъ эр сёзю темиз, онъа ишангъан адамлар ичюн О — къалкъандыр.

⁶Онынъ сёзлерине бир сёз къошма, ёкъса О сени утандырыр, яланджы чыкъарсынъ.

⁷Сенден сорагъаным эки шейдир, сагъ олгъанымда, манъа «ёкъ» деме.

⁸Бош шейлерни ве яланны менден узакълаштыр, мени не фукъаре, не де зенгин эт, тек керек олгъан ашны бер манъа.

⁹Ёкъса боллукъ корип, мен: «Кимдир о РАББИ?» — айтарым да, Сенден ред этерим, я да фукъарелешип, хырсызлыкъкъа урулырым ве Алламнынъ адыны лекелерим.

¹⁰Къулны эфендисининъ огюнде яманлама, ёкъса о сени къаргъар да, сен къабаатлы чыкъарсынъ.

¹¹Ойле несиль бар ки, бабасыны къаргъар, озь анасына да яхшылыкъ тилемез.

¹²Ойле несиль бар ки, озюни тер-темиз саяр, лякин озь арамлыгъындан элялланмагъан.

¹³Ойле несиль бар ки, озьлерини эр кестен устюн тутар, эр кеске тёпеден бакъар.

¹⁴Ойле несиль бар ки, тишлери — къылыч, ченгелери — пычакътыр, олар ер юзюндеки заваллы ве адамларнынъ фукъарелерини ютып ёкъ этерлер.

¹⁵Нефисхорлыкънынъ эки къызы бар, адлары «Бер!» ве «Бер!» Учь шей ич тоймаз, дёрт шей: «Етер!» — айтмаз:

¹⁶о бир дюнья, бала тапып оламагъан къурсакъ, сувгъа тойып оламагъан топракъ ве ич бир вакъыт «Етер!» айтмагъан атеш.

¹⁷Бабасыны мыскъыллагъан ве анасынынъ сёзюни динълемеген адамнынъ козюни вадийдеки къаргъалар чокъуп чыкъараджакъ, о, къартал балаларына аш олур.

¹⁸Учь шейге акъылым етмей, дёрт шейни анъламайым:

¹⁹къарталнынъ кокте учкъан ёлуны, йыланнынъ къая устюнде сюйрекленип юрген ёлуны, гемининъ денъизде къалдыргъан ёлуны ве акъайнынъ къызгъа туткъан ёлуны.

²⁰Фаише апайнынъ ёлу бойледир: ашар, агъзыны сюртер, сонъундан да: «Ич бир яман шей япмадым», — дер.

²¹Учь шейден ер юзю сарсылыр, чыдап оламагъан дёрт шейи бардыр:

²²падиша олгъан къул, тойгъандже ашагъан будала,

²³акъайгъа чыкъкъан ороспу, эфенди-ханымнынъ ерине кечкен хызметчи къыз.

²⁴Ер юзюнде дёрт уфакъ махлюкъ бардыр, лякин олар икметлилерден де икметлидир:

²⁵къырмыскъалар — кучьлю олмагъан бир халкътыр, лякин ашларыны яздан башлап азырлайлар;

²⁶дагъ сычанлары да — кучьсюз бир халкътыр, лякин яшагъан ерлерини къая чатлакъларында япалар;

²⁷сарынчкъанынъ падишасы олмаса да, лякин сыра-сыра адымлайлар;

²⁸кесерткини къолнен тутмакъ мумкюн лякин о, падиша сарайларында булуна.

²⁹Мына учевининъ юрюши гузель, дёртю де дюльбер адымлагъан сою:

³⁰айванларнынъ падишасы олгъан, кимсеге ёл бермеген арслан,

³¹хораз, теке ве ордусынынъ башында кеткен падиша.

³²Эгер сен акъылсызланып озюнъни юксельткен олсанъ, я да яманлыкъ тюшюнген олсанъ, къолнен агъзынъны къапат!

³³Чюнки сютни атлагъанда ягъ ола, бурунгъа яндыргъанда къан чыкъа, гъазап къозгъагъанында къавгъа чыкъа.