Read Мукъаддес Китап къырымтатар тилинде, Икметли сёзлер 31 Bible Online

Икметли сёзлер 31 - Мукъаддес Китап къырымтатар тилинде, bible

Икметли сёзлер 31

¹Массанынъ падишасы Лемуэлнинъ сёзлери, онъа анасы берген огютлер.

²«Не, огълум? Не, къарным огълу? Не, адакъларымнынъ огълу?

³Кучюнъни къадынларгъа берме, падишаларны ольдюрген къадынларгъа ёлларынъны ачма.

⁴Падишаларгъа ярашмаз, эй, Лемуэл! Шарап ичмек падишаларгъа ярашмаз! Башлыкъларгъа да ички къыдырмакъ келишмез.

⁵Ёкъса ичип-саргъушланып, олар къанунны унутырлар да, эписи ёкъсулларнынъ акъларыны ашарлар.

⁶Ичкини харап олаяткъан адамгъа беринъиз, шарапны — юреги агълагъангъа.

⁷Ичсин де, фукъарелигини унутсын, чеккен азабы да акъылына кельмесин.

⁸Айтып оламагъан адамны ве эписи бичарелерни къорчаламакъ ичюн сен айт!

⁹Акъикъатны къорумакъ ве заваллынен фукъаренинъ акъларыны къорчаламакъ ичюн айт!»

¹⁰Яхшы апайны ким тапып олур? Онынъ фияты къыйметли ташлардан чокъ паалыдыр.

¹¹Акъайы онъа чокъ ишана, онен берабер о, къытлыкъны бильмез.

¹²Омюрбилля шу апай акъайына яманлыкънен дегиль де, яхшылыкънен къайтара.

¹³Юнь ве кетен тапып, оларны къолларынен усталыкънен ишлей.

¹⁴О, базиргянларнынъ гемилери киби, озь ашыны узакътан кетире.

¹⁵Танъ атмагъанындан эвель тура, эвдекилерине аш азырлай, хызметчи къызларына да буйрукълар бере.

¹⁶Тарланы алмагъа тюшюнип, оны сатын ала, озь эллеринен ишлеп-къазанып чаресини тапып, юзюм багъыны осьтюре.

¹⁷Онынъ аякълары къудретлидир, къоллары да кучьке толудыр.

¹⁸Иши яхшы келир кетиргенини корер де, чырагъыны геджеде сёндюрмез.

¹⁹Къолларынен орекени тутар, пармакълары да урчукъны йибермез.

²⁰Заваллы ичюн эли ачыкъ, фукъареге де къол узатыр.

²¹Къыш сувугъында о, эвдекилери ичюн къоркъмаз, чюнки эписининъ эки къат урбасы бардыр.

²²О, тёшек устюне орьтюлер токъуй, озю исе индже ишленген кетенден ве мор юньден урбалар кийип юре.

²³Шеэрнинъ араба къапусы янында отургъан топракънынъ акъсакъаллары арасында онынъ акъайы белли адамдыр.

²⁴О, кетен урбалар япып сатар, Ханаан базиргянларына да къушакълар ясар.

²⁵Кучь ве шереф — онынъ урбасыдыр, келеджекке де къуванчнен бакъар.

²⁶Онынъ айткъан лафы икметлидир, огреткенлери де ишанчлы.

²⁷О, эв халкъынынъ ишини козетир, тенбеллик де не олгъаныны бильмез.

²⁸Балалары онынъ огюнде турып, оны шуретлер, акъайы да даима оны макътар:

²⁹«Яхшы апай чокъ, лякин санъа еткен ёкъ!»

³⁰Гузеллик яланджыдыр, дюльберлик де боштыр, лякин РАББИден къоркъкъан апай макътавгъа ляйыкътыр!

³¹Онынъ акъкъыны бер онъа, шеэрнинъ араба къапусы янында онынъ ишлери оны макътасын.