Read Мукъаддес Китап къырымтатар тилинде, Икметли сёзлер 4 Bible Online

Икметли сёзлер 4 - Мукъаддес Китап къырымтатар тилинде, bible

Икметли сёзлер 4

¹Балалар, бабанъызнынъ огютини динъленъиз, акъыллы олмакъ ичюн, къулакъ асынъыз,

²чюнки сизге яхшы акъыл огретем. Огреткенлеримни унутманъыз.

³Мен бабамнынъ севимли огълу эдим, анамнынъ бирден-бир баласы.

⁴Бабам мени огретип, манъа бойле айта эди: «Айткъанларымны юрегинъе къой, эмирлеримни тутып яша.

⁵Икметке саип ол, акъылгъа малик ол! Айткъанларымны унутма, олардан четке чекильме.

⁶Икметни къалдырма — о сени къорчалайджакъ, оны сев — о сени сакълайджакъ.

⁷Башы — икмет! Икметке саип ол! Бутюн мал-мулькюнънинъ устюнден акъылгъа саип ол!

⁸Оны баш устюнде тут — о да сени юксельтеджек, онъа япышсанъ — о сени шуретлейджек.

⁹О, башынъа хайырлы чембер къояджакъ, аджайип таджны санъа кийдиреджек».

¹⁰Динъле, огълум, ве айткъанларымны къабул эт, сонъ омрюнънинъ йыллары узаныр.

¹¹Мен санъа икмет ёлуны косьтеририм, догъру ёлларнен алып кетерим.

¹²Ёлдан кеткенде, аякъларынъа ич бир шей кедер этмейджек, чапкъанда, абынмазсынъ.

¹³Огютни къатты тут, оны йиберме, сакъла оны, о — сенинъ яшайышынъ.

¹⁴Ярамайларнынъ ёлуна аякъ басма, яманларнынъ ёлундан да юрме.

¹⁵О ёлны ташла, ондан кетме, ондан четке чекиль, янындан кеч.

¹⁶Чюнки яман адамлар яманлыкъ япмагъандже юкълап оламайлар, биревни ёлдан урмагъандже, оларнынъ козюне юкъу кирмей.

¹⁷Олар отьмек ерине яманлыкъ ашайлар, шарап ерине — зорбалыкъ ичелер.

¹⁸Инсафлы адамларнынъ ёлу — нур сачкъан ярыкъ киби, уйле маали келеята — о эп парлакъ ола.

¹⁹Ярамайларнынъ ёлу исе — зифт къаранлыкъ киби, олар неге сюрюнеджеклерини бильмейлер.

²⁰Огълум, сёзлериме дикъкъат эт, айткъанларыма къулакъ ас.

²¹Акъылынъдан чыкъмасын олар, юрегинъде сакъла сен оларны.

²²Чюнки оларны тапкъан адам ичюн олар — яшайыш, бутюн бедени ичюн — шифадыр.

²³Эр шейден зияде юрегинъе мукъайт ол, чюнки яшайыш чокъракълары ондандыр.

²⁴Агъзынъдан ялан сёзлер чыкъмасын, айнеджиликни узакъ ташла.

²⁵Козьлеринъ дос-догъру бакъсын, бакъышынъ да огге догърулсын.

²⁶Кетеджек ёлунъны яхшы этип тюшюн, сонъ эписи ёлларынъ онъундан келир.

²⁷Сагъгъа-солгъа урулма, аягъынъны яман ёлдан узакъ тут.