Read Мукъаддес Китап къырымтатар тилинде, Икметли сёзлер 5 Bible Online

Икметли сёзлер 5 - Мукъаддес Китап къырымтатар тилинде, bible

Икметли сёзлер 5

¹Огълум, икметиме дикъкъат эт, фикириме къулакъ ас.

²Сонъ сен ферасетни сакълап къалырсынъ, дудакъларынъ да — бильгини сакълар.

³Башкъасынынъ апайынынъ агъзындан бал тамлай, онынъ лафы да — эльвадан татлы.

⁴Онынъ сонъу исе о, юшан оту киби аджджы, эки агъызлы къылыч киби кескин.

⁵Аякълары олюмге алып баралар, табанлары о бир дюньягъа догъру кетелер.

⁶Яшайыш ёлуны о ич тюшюнмей, ёллары насыл саллангъаныны о озю бильмей.

⁷Балаларым, мени динъленъиз! Айткъанларымны ред этменъиз!

⁸Шу апайдан узакъ тур, эвининъ къапусына якъын барма!

⁹Ёкъса, сагълыгъынъны башкъасына берип, йылларынъны да шефкъатсыз адамларгъа масраф этерсинъ,

¹⁰кучюнъден ят адамлар такъатланырлар, япкъанларынъ да — башкъасынынъ эви ичюн олур.

¹¹Омрюнънинъ сонъки куньлеринде исе, беденинъ азып-тозып, инъильдемеге башларсынъ:

¹²«Ах, не ичюн огютни кореджек козюм олмады? Юрегим де не ичюн опькелерни бир шей ерине корьмеди?

¹³Оджаларымнынъ сёзлерини динълемедим, мени огреткенлернинъ айткъанларына да къулакъ асмадым!

¹⁴Джемаат ве топлашувнынъ козю огюнде аз къалдым, масхара олмагъа!»

¹⁵Сувны озь хавузынъдан, озь къуюнъдан ич.

¹⁶Сувларынъны сокъакълар бою, сув акъымларынъны мейданларда акъызма.

¹⁷Олар тек сенинъ олсунлар, башкъаларынен пайлашма.

¹⁸Чешменъ берекетли олсун, яшлыгъынъда эвленген апайынънен бахтлы ол.

¹⁹Севимли ала кийик, назик бир къараджа о — кокюслери даима сени мемнюн этсин, онъа олгъан севгинъден эр вакъыт зевкъ ал.

²⁰Огълум, санъа башкъасынынъ апайынен кейф чатмагъа, бирев апайынынъ белине сарылмагъа не керек?

²¹Адамнынъ ёллары — РАББИнинъ козю огюндедир, эр баскъан адымны О биле.

²²Ярамайны озь яманлыкълары сарып аладжакъ, озь гуналарынынъ къапкъаны оны тутып багълайджакъ.

²³Огют эксиклиги оны гъайып этер, буюк акъылсызлыгъы оны ёлдан урар.