Read Мукъаддес Китап къырымтатар тилинде, Икметли сёзлер 6 Bible Online

Икметли сёзлер 6 - Мукъаддес Китап къырымтатар тилинде, bible

Икметли сёзлер 6

¹Огълум! Эгер сен башкъа адам ичюн кефиль олсанъ, ябанджы адам ичюн «Келиштик!» деген олсанъ,

²озь агъзынъдан чыкъкъан лафларынъ къапкъангъа тюшюрди сени, озь айткъанларынъ сени якъалады.

³Башкъа адамнынъ къолуна тюштинъ сен, огълум! Озюнъни къуртармакъ ичюн, буны яп: бар да, о адамнынъ аякъларына сарылып, онъа ялвар.

⁴Козюнъе юкъу кирмесин, козь къапакъларынъ агъырлашмасын.

⁵Авджынынъ элинден джейран киби, къушчунынъ къолундан къуш киби озюнъни къуртар.

⁶Эй, дембель, бар да, къырмыскъагъа бакъ, онынъ ёлларыны корип, икметли ол.

⁷Онынъ не башлыгъы, не незаретчиси, не де укюмдары бар.

⁸Лякин о, ашыны язда азырлап къоя, ашлыкъны оракъ вакътында топлай.

⁹Эй, дембель! Сен не вакъыткъадже ятаджакъсынъ? Юкъунъдан не заман уянаджакъсынъ?

¹⁰Азачыкъ юкъласанъ, бир дирем юкъусырасанъ, бираз да къол къавуштырып ятсанъ, —

¹¹санъа быралкъы киби ёкълукъ, силялы айдут киби — ёкъсуллыкъ келир.

¹²Ярамай адам — беля кетирген, ялан айткъан адамдыр.

¹³О козюни къыпа, аякъларынен бельгилей, пармакъларынен ишаретлер япа.

¹⁴Онынъ юрегинде хаинлик яшай, о эр вакъыт яманлыкъны тюшюне, къавгъа чыкъара.

¹⁵Бунынъ ичюн беля онъа апансыздан келир, оны бирден къырып ёкъ этер, — арткъа ёлу олмаз.

¹⁶РАББИ алты шейден нефрет эте, еди шей Онынъ козюнде пистир:

¹⁷гъурурлы бакъыш, ялан айткъан тиль, къабаатсыз къанны тёккен къоллар,

¹⁸къара фикир эткен юрек, яманлыкъкъа тез чапкъан аякълар,

¹⁹ялан айткъан яланджы шаат ве агъа-къардашларнынъ арасыны бозгъан адам.

²⁰Огълум, бабанънынъ буюргъаныны тут, ананънынъ огреткенини ташлама.

²¹Оларны юрегинъе эбедиен багъла, такъ оларны бойнунъа.

²²Ёлда олгъанда, олар санъа мукъайт олурлар, юкъламагъа яткъанда — къорчаларлар, уянгъанда исе — сеннен лакъырды этерлер.

²³Чюнки эмирлер санъа — лампат, огретювлер — ярыкъ, ве опькели огют — яшайышкъа ёл.

²⁴Олар сени яман къадындан, башкъасынынъ апайынынъ татлы тилинден къорчалайджакъ.

²⁵Бойле апайларнынъ дюльберлиги сени ёлдан урмасын, бакъышлары сени тутмасынлар,

²⁶чюнки ороспу апайнынъ фияты — бир тилим отьмек, башкъасынынъ апайы исе къыйметли джанынъны авлай.

²⁷Адам къойнуна атеш алып, урбасыны якъмазмы?

²⁸Къорлар устюнде юрип, аякъларыны якъмазмы?

²⁹Башкъасынынъ апайынен яткъан адамгъа тамам ойле олур — онъа токъунгъан бирев къабаатсыз къалмаз.

³⁰Ач хырсыз къурсагъыны тойдурмакъ ичюн хырсызласа, оны къатты укюм этмезлер,

³¹лякин эгер оны тутсалар, еди къат тёлер, бутюн мал-мулькюни берир.

³²Зина эткен адам акъылдан эксик, буны япкъан адам озь джаныны гъайып эте.

³³Масхаралыкъ ве котек ашар, намуссызлыкъ — онынъ омюрбилля къысметидир.

³⁴Чюнки куньджюлик акъайны якъып-куйдюрир, ахтыманыны алгъанда о, аджымаз.

³⁵Бир одемеге разы олмаз, дюньяны бахшыш этсенъ биле, гонълюни аламазсынъ.