Read Мукъаддес Китап къырымтатар тилинде, Икметли сёзлер 7 Bible Online

Икметли сёзлер 7 - Мукъаддес Китап къырымтатар тилинде, bible

Икметли сёзлер 7

¹Огълум, айткъанларымны акъылынъда тут, эмирлеримни унутма.

²Эмирлеримни тут ве яша, огреткенлеримни, козь бебеги киби сакъла.

³Оларны пармакъларынъа багъла, таш устюнде киби юрегинънинъ устюне яз.

⁴Икметке: «Сен — меним татамсынъ!», акъылгъа да: «Сой-акърабамсынъ!» — айт.

⁵Олар сени башкъасынынъ апайындан, татлы-татлы лаф эткен биревнинъ апайындан къорчаласынлар.

⁶Куньлерден бири пенджеремден тышары, пенджере пармакълыгъындан сокъакъкъа бакътым.

⁷Саде адамларнынъ, яш огъланларнынъ арасында бир акъылдан эксик огъланны корьдим.

⁸[8-9] О огълан акъшам устю, кунь баткъанда, гедже къаранлыгъы тюшкен вакъытта, бир апай отургъан сокъакъ бою, онынъ эвине тараф кете эди.

¹⁰Иште, онынъ къаршысына апай чыкъты, къара юрекли, устюнде — ороспу урбасы.

¹¹Шаматаджы ве инат бу апай, бир дакъкъа биле эвде отурып оламаз.

¹²Де сокъакъта, де мейданда, эр кошеде авлап отургъан апай.

¹³Япышып тутты, опьти огъланны, утанмаз бетинен онъа бойле деди:

¹⁴«Аманлыкъ къурбанларымны чалдым, адагъымны мен бугунь ерине кетирдим.

¹⁵Онынъ ичюн огюнъе чыкътым, къыдырдым сени ве таптым!

¹⁶Тёшегиме дюльбер орьтюлерни, тюрлю ренкте олгъан Мысыр басмаларыны тёшедим.

¹⁷Яткъан еримни мюр, алоэ ве тарчиннен къокъулаттым.

¹⁸Кель, сабагъадже бир-биримизни тойгъандже севейик, севгиден зевкъ алайыкъ.

¹⁹Акъайым эвде ёкъ, узакъ ёлгъа кетти,

²⁰акъчасы олгъан кисени де янына алды, Ай толмагъандже эвге къайтмаз».

²¹Чокъ назик сёзлернен оны къандырды, татлы лафынен артындан алып кетти.

²²Шу дакъкъа кетти огълан онынъ пешинден. Бойле шекильде де бугъа — бойнагъа ве сыгъын — къапкъангъа кете,

²³анда атылгъан окъ джигерини ура. Бойле де джаныны гъайып этеджегинден хабери олмагъан, учкъан къуш тузакъкъа кете.

²⁴Демек, балалар, динъленъиз мени, сёзлериме дикъкъат этинъиз:

²⁵сакъын о къадынгъа юрегинъ айланмасын, онынъ ёлларындан юрменъиз.

²⁶Чокъ адам яраланып онъа ола гъайып олдылар, чокъ адамларны о йыкътырды.

²⁷Онынъ эви — о бир дюньягъа алып кеткен ёлдыр, олюм эвининъ одаларына тюшкен ёлдыр.