Read Мукъаддес Китап къырымтатар тилинде, Джемаат башы 10 Bible Online

Джемаат башы 10 - Мукъаддес Китап къырымтатар тилинде, bible

Джемаат башы 10

¹Ольген чибинлер къыйметли майларнынъ мис къокъусыны агъыр къокъугъа чевирир. Бираз ахмакълыкъ да икмет ве шуретликтен устюн келе.

²Акъыллынынъ юреги догърулыкъкъа ынтылыр, ахмакънынъ юреги исе яманлыкъкъа.

³Ахмакъ насыл ёлнен кетсе де, акъылы етмез, озь ахмакълыгъыны эписине косьтерир.

⁴Башлыгъынъ санъа къаршы гъазапланса, еринъден кетме, чюнки сувукъкъанлыкъ буюк янълышларны бастырыр.

⁵Ер юзюнде бир даа яманлыкъны корьдим: укюмдар япкъан янълышны.

⁶Джаиллик юкъары котериле, зенгинлер исе ашагъы отуралар.

⁷Къуллар ат аркъасында кеткенлерини, мырзалар исе къуллар киби, джаяв кеткенлерини корьдим.

⁸Чукъур къазгъан онъа тюшмек мумкюн, диварны йыкъкъан адамны йылан чакъмакъ мумкюн.

⁹Ташлар ташыгъан адам озюне зарар кетирмек мумкюн, одун парлагъан адам да телюкеге къалмакъ мумкюн.

¹⁰Балтанынъ агъзы токъалланып да къайралмаса, чалышмагъа зор олур, лякин икмет буны догъурлап олур.

¹¹Йылан ырымдан эвель чакъса, ырымджынынъ файдасы олмаз.

¹²Икметли адамнынъ агъзындан чыкъкъан сёзлери онъа мерамет кетирир, ахмакънынъ сёзлери озь башыны ашар.

¹³Агъзындан чыкъкъан сёзюнинъ башы — ахмакълыкъ, сонъу — яман акъылсызлыкъ,

¹⁴ве ахмакъ чокъ лаф этер. Кимсе келеджекте не оладжагъыны бильмез. Ондан сонъ не оладжагъыны онъа ким айтып олур?

¹⁵Ахмакънынъ замети оны ёрулта, чюнки о, шеэрге кеткен ёлны биле бильмез.

¹⁶Эгер бир де бир мемлекетнинъ падишасы яш огълан олса ве мырзалары сабадан зияфет этселер, шу мемлекетнинъ алы фена!

¹⁷Падишасы асылзаде табакъасындан олгъан, мырзалары да, саргъуш олмакъ ичюн дегиль де, такъатланмакъ ичюн вакътына ашаса, не бахтлыдыр бу мемлекет!

¹⁸Тенбелликтен таван асылып къалыр, къол къавуштырып отурмакътан эвнинъ дамы акъар.

¹⁹Зияфет зевкъ ичюн япылыр, шарап яшайышны шенъ этер, акъча исе эписине джевап берир.

²⁰Падишаны ичинъден биле къаргъама, яткъан оданъда биле байны къаргъама, чюнки кокте учкъан къушлар сёзюнъни еткизмек мумкюн, къанаты олгъан сою лафынъны айтып берир.