Read Мукъаддес Китап къырымтатар тилинде, Джемаат башы 12 Bible Online

Джемаат башы 12 - Мукъаддес Китап къырымтатар тилинде, bible

Джемаат башы 12

¹[1-2] Агъыр куньлер кельмезден, «Оларда бир къуванч ёкъ», — дейджек йыллар башынъа тюшмезден, кунеш, ай, ярыкъ ве йылдызлар сёнмезден, ягъмур артындан янъы булутлар кельмезден, яшлыгъынъда Яратыджынъны акъылынъда тут.

³Бир кунь эвни къаравуллагъанлар къалтырар, кучьлю акъайлар къатланыр, ун чеккенлер токътар, чюнки олар артыкъ аз къалыр, пенджереге бакъкъанлар да агъыр кореджеклер.

⁴Сокъакъкъа бакъкъан къапулар япыладжакъ, дегирменнинъ сеси тынаджакъ. Адам хораз къычыргъанда тураджакъ, амма къушларнынъ тюркюлерини эшитип оламайджакъ.

⁵Тёпеликлерден къоркъаджакъ, ёлнынъ дешетлеринден де къоркъар. Бадем ачаджакъ, чегертки агъырлашаджакъ, истек де гъайып оладжакъ, чюнки адам озь эбедий эвине кетеджек, такъмакъчылар да сокъакъ бою юреджек.

⁶Кумюш йип йыртылмаздан, алтын савут патламаздан, чокъракъ башындаки бардакъ парланмаздан, къуюнынъ макъарасы къырылмаздан, Алланы унутма.

⁷Сонъ тоз топракътан келип, топракъкъа чевирилир, джан исе оны берген Аллагъа къайтыр.

⁸«Бош, бош! — деди Джемаат Башы. — Эр шей бошуна!»

⁹Джемаат Башы икметли олгъанындан гъайры, халкъкъа бильги бере эди. О, эр шейни сынап огренди ве чокъ икметли сёзлер къалдырды.

¹⁰Джемаат Башы гузель сёзлерни тапмагъа тырышты ве акъикъат сёзлерини о догъру язып алды.

¹¹Икметлининъ сёзлери — инелер ве къакъылгъан мыхлар дайын, оларны топлагъанлар да — бир чобандандыр.

¹²Бундан артыкъ олгъан шейлерден сакъын, огълум! Чокъ китап язмакънынъ сонъу олмаз, чокъ окъумакъ да — беден къыйнамакътыр.

¹³Бутюн эшиткенлернинъ нетиджеси бойледир: Алладан къоркъ ве эмирлерини тут. Будыр адамнынъ боюн-борджу.

¹⁴Чюнки яхшымы-яманмы, эр бир сырлы ишни, эр бир япылгъан шейни Алла укюм этер.