Read Мукъаддес Китап къырымтатар тилинде, Джемаат башы 4 Bible Online

Джемаат башы 4 - Мукъаддес Китап къырымтатар тилинде, bible

Джемаат башы 4

¹Сонъ мен ер юзюнде чешит тюрлю зулумлыкъларны корьдим. Мазлумларнынъ тёккен козьяшларыны ве оларгъа кимсе теселли бермейджегини корьдим. Кучь зулум эткенлернинъ къолунда, теселли береджек исе ёкъ.

²Сонъ мен ольгенлернинъ сагъ олгъанлардан бахтлы олгъаныны бильдим.

³Амма оларгъа коре даа дюньягъа асыл кельмегенининъ, ер юзюндеки яман ишлерни даа корьмегенининъ алы яхшыдыр.

⁴Сонъ мен корьдим ки, эр бир замет ве эр бир уста ишнинъ янында пахыллыкъ пейда ола. Бу да бошуна ве ель къувалавдыр.

⁵Ахмакъ къол къавуштырып отура ве озь башыны ашай.

⁶Раатлыкъта къазанылгъан бир авуч, замет этип ель къувалап, къазанылгъан къошавучтан хайырлыдыр.

⁷Ер юзюнде олгъан даа бир бош шейни корьдим:

⁸Янъгъыз бир адам бар эди, янында не огълу бар эди, не агъа-къардашы. Заметине сонъу олмагъан, зенгинлигине исе козю ич бир вакъыт тоймай эди. «Мен ким ичюн замет этем, джанымны яхшылыкътан марум этем?» Бу да — бош шей ве фена иштир.

⁹Бир адамгъа коре эки адамгъа яхшыдыр, чюнки оларнынъ заметлери ичюн яхшы мукяфат аладжакълар.

¹⁰Бири йыкъылса, башкъасы достуна ярдым этер. Амма бири йыкъылса, оны котермеге кимсе олмагъанынынъ алы — фенадыр.

¹¹Эки адам ятса, бири-бирини къыздырыр, янъгъыз яткъан исе насыл этип къызынсын?

¹²Эгер бирев бирине къаршы котерильсе, экиси онъа къаршы чыкъып олурлар, ве учь къатлы йип къолайлыкънен узюльмез.

¹³Ёкъсул, амма акъыллы огълан, къарт ве акъылы етмеген, огютке къулакъ асмагъан падишадан яхшыдыр.

¹⁴Чюнки онынъ падишалыгъында ёкъсул догъгъан огълан, зиндандан чыкъып падишалыкъкъа юкселе.

¹⁵Мен корьдим ки, ер юзюнде эписи яшагъанлар, падишанынъ ерине отургъан огъланнынъ янына турдылар.

¹⁶Халкъны ве эвель яшагъанларны саймагъа чаре ёкъ эди, амма артындан кельген несиллер оларнен разы олмаз, чюнки бу да — бошуна ве ель къувалавдыр.

¹⁷Алланынъ эвине кеткенинъде аягъынъа мукъайт ол. Динълемек ичюн якъынлаш, ахмакънынъ къурбаныны кетирмек ичюн якъынлашма. Олар яманлыкъ япсалар да, бунъа акъыллары етмей.