Read Мукъаддес Китап къырымтатар тилинде, Матта 1 Bible Online

Матта 1 - Мукъаддес Китап къырымтатар тилинде, bible

Матта 1

¹Ибраимнинъ ве Давутнынъ союндан олгъан Иса Месих акъкъында ривает. Мына Онынъ баба-деделери:

²Ибраим Исхакънынъ бабасы эди. Исхакъ — Якъупнынъ бабасы. Якъуп — Ехуда ве онынъ агъа-къардашларынынъ бабасы.

³Ехуда ве онынъ апайы Тамардан Парец ве Зерах догъулдылар. Парец — Хецроннынъ бабасы. Хецрон — Рамнынъ бабасы.

⁴Рам — Амминадавнынъ бабасы. Амминадав — Нахшоннынъ бабасы. Нахшон — Салмоннынъ бабасы.

⁵Салмон ве онынъ апайы Рахавдан Боаз догъулды. Боаз ве онынъ апайы Руттан Овед догъулды. Овед — Йишайнынъ бабасы.

⁶Йишай — Давут падишанынъ бабасы. Давут падиша ве Уриянынъ сабыкъ апайындан Сулейман догъулды.

⁷Сулейман — Реховоамнынъ бабасы. Реховоам — Авиянынъ бабасы. Авия — Асанынъ бабасы.

⁸Аса — Ехошафатнынъ бабасы. Ехошафат — Ёрамнынъ бабасы. Ёрам — Уззиянынъ бабасы.

⁹Уззия — Ётамнынъ бабасы. Ётам — Ахазнынъ бабасы. Ахаз — Хизкиянынъ бабасы.

¹⁰Хизкия — Менашшенинъ бабасы. Менашше — Амоннынъ бабасы. Амон — Ёшиянынъ бабасы.

¹¹Исраиллилер Вавилонгъа сюргюн этильгенде, Ёшиядан Екония ве онынъ агъа-къардашлары догъулды.

¹²Вавилонгъа сюргюн этильгенден сонъ Екониядан Шеалтиэль догъулды. Шеалтиэльден Зеруббавел догъулды.

¹³Зеруббавелден Авиуд догъулды. Авиуддан Эльяким догъулды. Эльякимден Азор догъулды.

¹⁴Азордан Цадок догъулды. Цадоктан Ахим догъулды. Ахимден Элиуд догъулды.

¹⁵Элиуддан Элеазар догъулды. Элеазардан Маттан догъулды. Маттандан Якъуп догъулды.

¹⁶Якъуптан Мерьемнинъ акъайы Юсуф догъулды. Мерьемден исе Иса догъулды. О, Месих деп адлангъан эди.

¹⁷Бойледже, Ибраимден Давуткъа къадар эписи олып он дёрт несиль, Давуттан, Вавилонгъа сюргюн этильмезден эвель — он дёрт несиль, ве Вавилон сюргюнинден сонъ Месих догъгъандже — он дёрт несильдир.

¹⁸Иса Месих бойле догъды: Онынъ анасы Мерьем Юсуфкъа нишанлы эди. Амма оларнынъ никяхларындан эвель Мерьемнинъ Мукъаддес Рухтан бала беклегени белли олды.

¹⁹Онынъ киеви Юсуф инсафлы адам олгъаны себебинден, Мерьемден айырылмакъ ниетине келе, лякин гизли, чюнки къадынны масхара этмеге истемей.

²⁰Бойле фикирге кельген вакъытта, гедже онынъ тюшюнде Раббиден бир мелек келип: — Эй, Давутнынъ огълу Юсуф! Сен Мерьемге эвленмектен асыл къоркъма, чюнки онынъ къарнындаки Бала — Мукъаддес Рухтандыр.

²¹Мерьем огъул догъаджакъ, ве сен Онынъ адыны Иса [1] къояджакъсынъ, чюнки О, Озь халкъыны гуналардан къуртараджакъ, — деди.

²²Буларнынъ эписи, Раббининъ пейгъамбер ярдымынен айткъан сёзлери ерине кельмеси ичюн олды:

²³«Къыз юклю олып, Огъул догъаджакъ, Онынъ адыны Иммануэл къояджакълар». Иммануэл — «Алла бизнен» демектир.

²⁴Юсуф уянгъанынен, Раббининъ мелеги онъа буюргъаныны япты ве Мерьемге эвленди,

²⁵амма апайы Огъул тапмагъандже онен ятмады. Догъгъан Огълунынъ адыны Иса къойды.