Read Мукъаддес Китап къырымтатар тилинде, Матта 10 Bible Online

Матта 10 - Мукъаддес Китап къырымтатар тилинде, bible

Матта 10

¹Иса Озюнинъ он эки шегиртини янына чагъырып, оларгъа джинлернинъ устюнден укюм этмеге къудрет берди, буны, адамлардан джинлерни къувып чыкъармакъ, чешит хасталыкъларны ве дертлерни тедавийлемек ичюн япты.

²Бу он эки эльчининъ адлары шойле: биринджиси Пётр адынен белли олгъан Симон ве онынъ къардашы Андрей, сонъ Зебедайнынъ огъуллары Якъуп ве онынъ къардашы Юхан,

³Филип, Бартоломай, Тома, салым топлайыджы Матта, Алфейнинъ огълу Якъуп ве Фадда,

⁴Ветанпервер Симон ве сонъундан Исагъа хаинлик япкъан Иуда Искариот.

⁵Иса бу он экини ёллап, оларгъа бойле насиат берди: — Башкъа миллетлернинъ топракъларына барманъыз ве самариелилернинъ шеэрлерине кирменъиз.

⁶Лякин ёлуны джойгъан къойларгъа — Исраиль халкъынынъ алдына барынъыз.

⁷Кетинъиз ве: «Кок Падишалыгъы якъынлашты», — деп илян этинъиз.

⁸Хасталарны тедавийленъиз, олюлерни тирильтинъиз, лепра хасталыгъына огърагъанларны эляллап тедавийленъиз, джинлерни къувып чыкъарынъыз. Бедава алдынъыз — бедава беринъиз.

⁹Кушагъынъызгъа алтын, кумюш ве бакъыр акъча биле алманъыз.

¹⁰Ёлгъа не торба, не эки дане урба, не аякъкъап ве таякъ биле алманъыз. Чалышкъан адам озь отьмегини къазаныр.

¹¹Шеэр я да къасабагъа келип, о ерде ляйыкъ бир адам тапынъ ве шу ерден чыкъмагъандже онынъ эвинде къалынъыз.

¹²Эвге киргенде, селям беринъиз.

¹³Эгер о эв бунъа ляйыкъ олса, тилеген барышыгъынъыз анда кирсин, ляйыкъ олмаса исе, сизге къайтып кельсин.

¹⁴Ким исе сизни къабул этмесе ве сёзлеринъизге къулакъ асмаса, о эвден я да шеэрден чыкъып кетеяткъанда аякъларынъыздан тозны биле къакъып кетинъиз.

¹⁵Сизге айтам: Ахирет кунюнде бойле шеэрнинъ алына коре, Содом ве Гоморанынъ алы енгиль олур.

¹⁶Мына, Мен сизлерни къашкъыр сюрюсине къойлар киби ёллайым. Сиз йыланлар киби акъыллы ве гогерджинлер киби саде олунъ.

¹⁷Инсанлардан сакът олунъыз, чюнки сизлерни акъсакъаллар шурасында махкеме этеджеклер, синагогаларда къамчылайджакълар.

¹⁸Меним адым ичюн сизни акимлер ве падишаларнынъ алдына алып бараджакълар, сиз исе олар ве Алланы бильмеген халкълар огюнде Меним шаатларым оладжакъсыз.

¹⁹Сизнен бу шейлерни япкъанларда не айтайым ве насыл айтайым, деп къасевет этменъиз. Айтыладжакъ сёзлеринъиз о вакъытта сизге белли оладжакъ.

²⁰Чюнки озьлеринъиз дегиль, ичинъиздеки Бабанъызнынъ Руху айтаджакъ.

²¹Агъасы — къардашыны, бабасы — огълуны олюмге береджеклер. Балалар озь ана-бабаларына къаршы баш котерип, оларны ольдюреджеклер.

²²Меним адым ичюн, эписинде сизлерни кореджек козю олмаз. Лякин сонъунадже сабыр эткен адам къуртуладжакъ.

²³Эгер сизлерни бир шеэрде къувсалар, башкъасына къачынъ. Сизге догърусыны айтам: сиз Исраильнинъ эписи шеэрлерини айланып чыкъкъандже, Инсан Огълу ер юзюне къайтып келеджек.

²⁴Шегирт озюнинъ оджасындан юкъары олмаз, хызметчи исе — озюнинъ эфендисинден.

²⁵Шегирт озюнинъ оджасы киби, хызметчи эфендиси киби олсалар да, етерлик. Эгер эв саибини Беэльзебул адынен адландырсалар, эв сакинлери акъкъында даа бетер сёзлер айтмазлармы?

²⁶Амма олардан къоркъманъыз! Чюнки Эр бир сакъландыргъан шей озь вакътында ачыладжакъ, ве эр бир сыр белли олур.

²⁷Сизге къаранлыкъта айткъанларымны ярыкъта айтынъыз. Къулагъынъызгъа фысылдап айткъанларымны эвлернинъ дамлары устюнден илян этинъиз.

²⁸Беденини ольдюрип, джаныны исе ольдюрип оламагъанлардан къоркъманъыз. Амма джаныны да, беденини де джеэннемде гъайып этмеге кучю еткен Алладан къоркъунъыз.

²⁹Эки торгъай бир капикке сатылмаймы? Лякин Бабанъыз разы олмаса, оларнынъ бириси биле ерге тюшмез.

³⁰Сизлерде исе, башынъыздаки сачларынъыз эписи сайылгъан.

³¹Шунынъ ичюн къоркъманъыз, сизлер чокъ торгъайдан паалысынъыз!

³²Ким адамларнынъ алдында Мени таныса, Мен де Коклердеки Бабамнынъ алдында оны таныйджам.

³³Ким исе инсанлар алдында Менден вазгечсе, Мен де Коклердеки Бабамнынъ алдында ондан вазгечеджем.

³⁴Мени ер юзюне барышыкъ кетирмек ичюн кельген, деп тюшюнменъиз. Мен барышыкъ дегиль, къылыч кетирмек ичюн кельдим.

³⁵«Огълуны бабасындан, къызыны анасындан, келинни къайнанасындан» айырмакъ ичюн кельдим.

³⁶«Адамгъа озь эвдекилери душман оладжакъ».

³⁷Бабасыны я да анасыны Менден зияде севген Манъа ляйыкъ дегиль! Огълу я да къызыны Менден зияде севген, Манъа ляйыкъ дегиль!

³⁸Ким озь хачыны [5] алмаса ве Меним артымдан кетмесе, о Манъа ляйыкъ дегиль.

³⁹Озь джаныны къуртармагъа истеген адам оны джояджакъ. Мен ичюн джаныны берген адам исе оны тападжакъ.

⁴⁰Сизни къабул эткен адам Мени де къабул эте. Мени къабул эткен исе Мени Ёллагъанны къабул эте.

⁴¹Ким пейгъамберни, о — пейгъамбер олгъаны ичюн, къабул этсе, о, пейгъамбер киби, мукяфатланаджакъ. Ким инсафлы адамны, о — инсафлы олгъаны ичюн, къабул этсе, о, инсафлы адам киби, мукяфатланаджакъ.

⁴²Ве ким, бу адий ве кучюк адамларнынъ бирисине, о — Меним шегиртим олгъаны ичюн, бир мешребе сув берсе, сизге догърусыны айтам: о, мукяфатсыз къалмаз.