Read Мукъаддес Китап къырымтатар тилинде, Матта 16 Bible Online

Матта 16 - Мукъаддес Китап къырымтатар тилинде, bible

Матта 16

¹Фериселер ве саддукийлер Исаны сынамакъ макъсадынен Онынъ алдына келип, коктен бельги косьтергенини талап эттилер.

²Иса исе оларгъа джевап берип: — Акъшам тюшкенде, сиз: «Кок къырмызы тюсте, ава ачыкъ оладжакъ», — дейсиз.

³Саба эрте исе: «Кок къою къырмызы тюсте ве оны булутлар къапаткъан, бугунь фуртуна оладжакъ», — дейсиз. Сиз кок юзюне бакъып, оладжакъ аваны айта билесиз, заманнынъ аляметлерини исе айырып оламайсызмы?

⁴Ярамай ве ороспу несиль бельги къыдыра, лякин Юнуснынъ бельгисинден гъайры оларгъа бельги берильмейджек, — деди ве оларны къалдырып кетти.

⁵Башкъа ялыгъа етип кельген шегиртлер янларына отьмек алмагъа унуткъанлар.

⁶Иса оларгъа: — Бакъынъыз, фериселернен саддукийлернинъ маясындан сакъынынъыз! — деди.

⁷Олар исе озьара: «Буны отьмек алмагъанымыз ичюн айтты», — дедилер.

⁸Иса, бу акъта билип, оларгъа: — Эй иманы аз олгъанлар! Сиз не ичюн озьара, янымызда отьмек ёкъ, дейсиз?

⁹Буны даа анъламайсынъызмы? Беш дане отьмекни беш бинъ адам ашап, даа не къадар сепет отьмек парчаларыны джыйып алгъанынъыз акъылынъыздамы?

¹⁰Я еди отьмек дёрт бинъ адам ичюн? О вакъыт къач буюк сепет джыйдынъыз?

¹¹Мен сизлерге: «Фериселер ве саддукийлернинъ маясындан сакът олунъыз», — дегеним отьмек акъкъында олмагъаныны насыл анъламайсынъыз? — деди.

¹²Шундан сонъ шегиртлер, Иса оларгъа отьмек маясындан дегиль, фериселер ве саддукийлернинъ огретювинден сакът олмакъ кереклигини айткъаныны анъладылар.

¹³Филипнинъ Кайсареясы этрафларына кельген Иса, Озь шегиртлеринден: — Адамлар Инсан Огълуны ким деп саялар? — деп сорады.

¹⁴— Базылары Сени Сувгъа Батырыджы Ягъя, башкъалары — Ильяс, дигерлери исе — Йирмея, я да пейгъамберлерден бириси деп саялар, — деди шегиртлер.

¹⁵Иса олардан: — Я сизлер Мени ким деп саясыз? — деп сорай.

¹⁶Симон Пётр джевап берип: — Сен — Месихсинъ, Тири Алланынъ Огълусынъ! — деди.

¹⁷Иса онъа: — Сен бахтлы адамсынъ, Симон Бар-йона! Чюнки бу сырны санъа къан ве беден дегиль, Меним Коклердеки Бабам ачты.

¹⁸Шунынъ ичюн Мен санъа айтам: сен — Пётрсынъ [9] ве бу къаянынъ устюнде Мен Озь Топлашувымны [10] къураджам. Оны олюлер дюньясынынъ кучьлери биле енъип оламайджакълар.

¹⁹Кок Падишалыгъынынъ анахтарларыны санъа береджем. Ер юзюнде сен нени ясакъ этсенъ, коклерде де шуны ясакъ этеджеклер. Ер юзюнде сен нени рухсет этсенъ, коклерде де шуны рухсет этеджеклер, — деди.

²⁰Сонъ Иса шегиртлерине Озюни Месих олгъаны акъкъында кимсеге айтмагъа кесен-кес ясакъ этти.

²¹Шу вакъыттан башлап, Иса шегиртлерине Онъа Ерусалимге бармагъа кереклигини, анда акъсакъаллар, баш руханийлер ве Къанун оджалары къолунда чокъ азап чекип, ольдюриледжегини, амма учюнджи куню тириледжегини ачыкъ-айдын айтып башлады.

²²Пётр Оны четке чекип: — Алла сакъласын, Раббим! Сеннен бойле шей ич бир вакъыт олмаз! — деп, Оны азарлап башлады.

²³Иса исе айланып: — Ёкъ ол козюмден, Иблис! Сен Мени ёлдан урасынъ! Сен Алланынъ ишлерини дегиль, адам ишлерини тюшюнесинъ, — деди Пётргъа.

²⁴Сонъ Иса Озь шегиртлерине: — Эгер ким Меним артымдан кетмеге истесе, озюнден вазгечсин, озь хачыны котерсин ве пешимден юрсюн! — деди.

²⁵— Ким озь джаныны къуртармагъа истесе, оны джояджакъ. Лякин ким Мен ичюн джаныны берсе, о, джаныны тападжакъ.

²⁶Эгер инсан бутюн дюньяны басып алса да, озь джанына зарар кетирсе, бунынъ файдасы не олур? Инсан, озь джаныны къуртармакъ ичюн, не берир?

²⁷Инсан Огълу Озь Бабасы шанынынъ нурунда, Онынъ мелеклеринен берабер келеджек ве эр кимни япкъанына коре мукяфатлайджакъ.

²⁸Сизге догърусыны айтам: бу ерде тургъанлардан базылары даа олюм корьмегендже, Инсан Огълунынъ Озь Падишалыгъынен берабер кельгенини кореджеклер.