Read Мукъаддес Китап къырымтатар тилинде, Матта 17 Bible Online

Матта 17 - Мукъаддес Китап къырымтатар тилинде, bible

Матта 17

¹Алты кунь кечкен сонъ, Иса Пётрны, Якъупны ве онынъ къардашы Юханны янына алды ве тек оларнен юксек бир дагъгъа котерильди.

²Исанынъ бутюн корюнюши оларнынъ козьлери огюнде денъишти: Онынъ бети кунеш киби парылдады, урбасы исе козь къамаштырып бем-беяз олды.

³Ве мына, оларнынъ огюнде Муса ве Ильяс пейда олдылар да, Исанен субетлешип башладылар.

⁴Пётр Исагъа: — Раббим, бу ерде бизге не яхшы я! Эгер истесенъ, мен мында учь чалаш къурайым: бириси Санъа, бириси Мусагъа ве бириси Ильяскъа олур, — деди.

⁵Пётр бу сёзлерни даа айткъанда, бирден бир нур сачкъан булут пейда олып, оларны кольгесинен къапатты. Шу булут ичинден бир сес чыкъты: — Бу — Меним севимли Огълумдыр, Мен Ондан разым! Оны динъленъиз!

⁶Бу сесни эшиткен шегиртлер буюк бир къоркъуда ерге йыкъылдылар.

⁷Иса, оларнынъ янына келип, оларгъа тийди де: — Къоркъманъыз, турунъыз! — деди.

⁸Шегиртлер козьлерини котерип, янларында Исадан гъайры кимсени корьмедилер.

⁹Дагъдан тюшкенде, Иса шегиртлерине: — Инсан Огълу олюлерден тирильмегендже, мында корьген шейлерни кимсеге айтманъыз, — деп буюрды.

¹⁰Шегиртлери Ондан: — Не ичюн Къанун оджалары: «Башта Ильяс кельмек керек», — дейлер? — деп сорадылар.

¹¹Иса оларгъа джевап берип: — Бу керчек, башта Ильяс келип, эр шейни азырламакъ керек, — деди.

¹²— Мен сизлерге айтам: Ильяс энди кельди, амма оны танымадылар ве онен истеген шейлерни яптылар. Шойле де Инсан Огълу оларнынъ къолларындан чокъ азап чекмеге меджбур.

¹³О вакъытта шегиртлер, Иса оларгъа Сувгъа Батырыджы Ягъя акъкъында айткъаныны анъладылар.

¹⁴Олар халкъкъа къайтып кельгенде, бир адам, Исагъа якъынлашып, тиз чёкти де:

¹⁵— Эфендим, огълума мерамет эт! Онда тутарыкъ хасталыгъы бар, о пек чекише. Сыкъ-сыкъ де атешке, де сувгъа дала, — деди.

¹⁶— Баламны Сенинъ шегиртлеринъе кетирдим, амма олар оны тедавийлеп оламадылар.

¹⁷— Эй имансыз ве бозукъ адамлар! Мен сизнен даа чокъ вакъыт оладжаммы?! Сизни даа чокъ вакъыт чыдайджаммы?! Баланы бу ерге, Меним алдыма кетиринъиз! — деди Иса.

¹⁸Иса джинге чыкъмагъа эмир берди, ве джин чыкъты, бала исе шу ань тедавийленди.

¹⁹Сонъ шегиртлер, Иса бир Озю къалгъанда, Онъа якъынлашып: — Биз джинни не ичюн къувып чыкъаралмадыкъ? — деп сорадылар.

²⁰[20-21] Иса оларгъа: — Чюнки сизинъ иманынъыз аз. Сизге догърусыны айтам: сизинъ бир хардал урлугъы къадар иманынъыз олгъанда, сиз мына бу дагъгъа: «Бу ерден о ерге кочь», — дейджексиз, ве о кочеджек. Сонъ сиз япалмайджакъ шей олмайджакъ, — деди.

²²Иса шегиртлеринен Галилеяда олгъанда, О, оларгъа: — Инсан Огълуны адамларнынъ къолуна тутып береджеклер

²³ве ольдюреджеклер, амма учюнджи куню тириледжек, — деди. Сонъ шегиртлерни буюк бир гъам басты.

²⁴Олар Кафарнаумгъа кельгенлеринде, Алла Сарайынынъ салымыны [11] топлайыджылары Пётрнынъ алдына келип: — Сизлернинъ Оджанъыз Сарай салымыны береми? — деп сорадылар. Пётр: — Бере! — деди.

²⁵О эвге кирген сонъ, Иса биринджи лаф ачты: — Симон, сенинъ фикиринъ насыл? Бу дюнья падишалары салым я да ясакъны кимден алалар? Озь огъулларынданмы я да ябанджыларданмы?

²⁶— Ябанджылардан, — деди Онъа Пётр. — Ойле олса, озь огъуллары салымдан азат экен де, — деди Иса.

²⁷— Амма салым топлайыджыларынынъ джаныны агъыртмамакъ ичюн, сен гольге барып балыкъ таягъы ташла. Биринджи тутулгъан балыкъны алып, агъзыны ачсанъ, бир акъча [12] тапарсынъ. Акъчаны алып, экимиз ичюн оларгъа салым бер, — деди Иса.