Read Мукъаддес Китап къырымтатар тилинде, Матта 18 Bible Online

Матта 18 - Мукъаддес Китап къырымтатар тилинде, bible

Матта 18

¹О вакъытта шегиртлер, Исанынъ алдына келип: — Кок Падишалыгъында энъ буюк адам ким оладжакъ? — деген суальни бердилер.

²Иса янына бир баланы чагъырып, оны оларнынъ арасына къойды ве:

³— Сизлерге догърусыны айтам: эгер сиз денъишмесенъиз ве балалар киби олмасанъыз, Кок Падишалыгъына кирмезсиз.

⁴Ким бу бала киби озюни ашада тутып юрсе, Кок Падишалыгъында энъ муим оладжакъ, — деди.

⁵— Ким бу бала киби бир баланы Мен ичюн къабул этсе, о Мени къабул эте.

⁶Ким исе Манъа инангъан бу кучюклерден бирисини ёлдан урса, онынъ бойнуна эшек айландыргъан дегирмен ташыны асып денъизнинъ чукъур еринде богъсалар, о ичюн яхшыджа олур эди.

⁷Бу дюньянынъ алына беля, чюнки инсанны гунагъа тюшюрген шейлер чокъ! Бойле шейлер олмакъ керек. Амма гунагъа себепчи олгъан адамнынъ алына беля!

⁸Эгер къолунъ я да аягъынъ сени ёлдан урса, оны кесип, озюнъден узакъча ташла. Сен чолакъ я да топал олсанъ да, эбедий аяткъа киреджексинъ. Бу, эки къолнен, эки аякънен эбедий атешке ташлангъанынъдан яхшыдыр.

⁹Эгер козюнъ сени ёлдан урса, оны чыкъарып ал да, озюнъден узакъча ташла. Сен бир козьнен олсанъ да, эбедий аяткъа киреджексинъ. Бу, эки козьнен джеэннем атешине ташлангъанынъдан яхшыдыр.

¹⁰[10-11] Бакъынъыз, бу кучюклерден бирисине биле нефретлеменъиз. Мен сизге айтам: оларнынъ мелеклери эр вакъыт Меним Коктеки Бабамнынъ огюнде туралар.

¹²Сизлернинъ фикиринъиз насыл? Эгер бир адамнынъ юз баш къою олып, олардан бириси адашса, о, докъсан докъузыны дагъларда къалдырып, адашкъан союны къыдырмагъа бармазмы?

¹³Оны тапкъанда исе, сизге догърусыны айтам: адашмагъан докъсан докъузындан зияде, шу бир къой ичюн къуванаджакъ.

¹⁴Ойле де Коклердеки Бабанъыз бу кучюклерден бирисининъ биле ольгенини истемей.

¹⁵Эгер сенинъ дин къардашынъ санъа къаршы гуна япса, онынъ алдына барып, тек юзьге-юзь лаф этип, къабаатыны онъа косьтер. О сени динълесе, сен агъанъны озюнъе къайтардынъ.

¹⁶Эгер сени динълемесе, озюнънен даа бир я да эки адамны алып бар, чюнки «эр бир олгъан шей эки я да учь шаатнен тасдыкъланмакъ керек».

¹⁷Эгер оларгъа да къулакъ асмаса, иманлыларнынъ топлашувына айт. Эгер иманлыларнынъ топлашувына да къулакъ асмаса, сен ичюн о, Аллагъа инанмагъан я да салым топлайыджысы киби олсун.

¹⁸Сизге догърусыны айтам: ер юзюнде сизлер нени ясакъ этсенъиз, кокте де ясакъ этиледжек. Ер юзюнде нени рухсет этсенъиз, кокте де рухсет этиледжек.

¹⁹Сизге даа айтам: эгер экинъиз берабер бир шей акъкъында дува окъумагъа мында, бу дюньяда келишсенъиз, Меним Коктеки Бабам буны беджерир.

²⁰Чюнки эки я да учь адам Меним ичюн топланса, Мен шу ерде оларнынъ арасында олурым.

²¹Шу вакъытта Пётр келип Исагъа: — Раббим, эгер дин къардашым манъа къаршы гуна япса, мен къач кере оны багъышлайджам? Еди кереми? — деди.

²²Иса онъа: — Ёкъ, еди кере дегиль, етмиш кере едишер, — деди.

²³— Бунынъ ичюн Кок Падишалыгъы бунъа ошай: бир падиша озь хызметчилеринден борджларыны алмагъа истеген.

²⁴Пара сайып башлангъанда, онъа он бинъ чувал алтын [13] борджу олгъан бир адамны онынъ алдына кетирдилер.

²⁵Борджуны одемеге бир шейи олмагъаны ичюн, падиша онъа озюни, апайыны, балаларыны ве бутюн мал-мулькюни сатып, борджуны бермесини буюрды.

²⁶Хызметчи исе ерге йыкъылып, падишагъа ялварды: «Сабыр этинъ, мен сизге эписини къайтарырым!» — деди.

²⁷Озь хызметчисини аджып, падиша оны йиберди ве борджуны багъышлады.

²⁸О хызметчи исе кетип, озюне юз динар борджу олгъан бир аркъадашыны тапты ве онынъ богъазына япышып: «Менден алгъан борджунъны къайтар!» — деп богъып башлады.

²⁹Аркъадашы исе онынъ аякълары янына ерге йыкъылып: «Сабыр эт, мен санъа эписини къайтарырым!» — деп ялварды.

³⁰Амма о бунъа разы олмады, барып, борджуны къайтармагъандже аркъадашыны зиндангъа къапаттырды.

³¹Бу вакъианы корьген башкъа хызметчилернинъ джанлары пек агъырды, ве олар барып, падишагъа олгъан шейни айттылар.

³²О вакъыт падиша хызметчисини алдына чагъырып: «Эй ярамай къул! Манъа ялваргъанынъ ичюн, мен сенинъ бутюн борджунъны багъышладым.

³³Мен сени аджыгъаным киби, сен де аркъадашынъны аджысанъ олмаз эдими?» — деди.

³⁴Сонъ ачувлангъан падиша, бутюн борджуны тёлемегендже хызметчисини апсхане джезалайыджыларнынъ къолуна берди.

³⁵Бойледже, эгер сизлернинъ эр биринъиз озь аркъадашынъызны джан-юректен багъышламасанъыз, Меним Коктеки Бабам да сизлернен ойле япар.