Read Мукъаддес Китап къырымтатар тилинде, Матта 2 Bible Online

Матта 2 - Мукъаддес Китап къырымтатар тилинде, bible

Матта 2

¹Иса, Еудие виляетининъ Вифлеем шеэринде догъгъан сонъ, шаркътан Ерусалимге тылсымджы алимлер кельдилер. О девирде Еудиенинъ падишасы Ирод эди.

²Тылсымджы алимлер: — Янъы догъгъан еудийлернинъ Падишасы къаерде? Биз шаркъта Онынъ йылдызыны корьдик, шунынъ ичюн Онъа бель букмеге кельдик, — дедилер.

³Буны эшиткен Ирод падиша ве онен берабер бутюн Ерусалим де буюк къасеветке тюшти.

⁴О, халкънынъ эписи баш руханийлерини ве Къанун [2] оджаларыны топлап, олардан Месихнинъ не ерде догмакъ керегини сорады.

⁵Олар онъа: — Еудиенинъ Вифлеем шеэринде, — деп джевап бердилер. — Чюнки пейгъамбер шойле язгъан:

⁶«Сен де, Вифлеем, Ехуда топрагъы, Ехуданынъ баш шеэрлеринден эксик дегильсинъ. Сенинъ ичинъден Башлыкъ чыкъаджакъ. О, Меним Исраиль халкъыма чобанлыкъ япаджакъ».

⁷О вакъытта Ирод, тылсымджыларны гизлиден озюне чагъырып, олардан йылдызнынъ пейда олгъан догъру вакътыны билип алды

⁸ве оларны Вифлеемге ёллап: — Барынъыз, Балачыкъ акъкъында эр шейни сораштырып билинъиз. Оны тапкъан сонъ манъа хабер этинъиз. Мен де анда барып, Онъа бель букерим, — деди.

⁹Тылсымджы алимлер падишанынъ сёзлерини динълеп, ёлгъа чыкътылар. Шу ань оларгъа шаркъта корюнген йылдыз тылсымджыларнынъ огюне чыкъты ве Бала яткъан ер устюне келип токътады.

¹⁰Тылсымджы алимлер йылдызны корип пек къувандылар, оларнынъ къуванчы сынъырсыз эди.

¹¹Эвге кирип, Баланы ве Онынъ анасы Мерьемни корьдилер де, тиз чёкип, Онъа бель буктилер. Сонъ хазинелерини ачып, Онъа алтын, либан ве мюр [3] багъышладылар.

¹²Гедже тылсымджылар тюшлеринде Алладан: «Ироднынъ алдына къайтманъыз», — деген эмир алдылар ве озь юртларына башкъа ёлнен къайтып кеттилер.

¹³Тылсымджы алимлер кеткен сонъ, Раббининъ бир мелеги Юсуфкъа тюшюнде келип: — Еринъден тур! Баланен анасыны алып, Мысыргъа къач ве, мен санъа айтмагъанымдже, о ерде къал. Чюнки Ирод Баланы къыдырып тапып, Оны ольдюрмеге истей, — деди.

¹⁴Юсуф турды ве шу геджеси Баланен анасыны алып, Мысыргъа ёл алды.

¹⁵Олар, Ирод ольгендже, анда къалдылар. Бойледже, бу шей, Раббининъ: «Мен Огълумны Мысырдан чагъырып алдым», — деп, пейгъамбер аркъалы айткъан сёзю беджерильмеси ичюн олды.

¹⁶Ирод исе, тылсымджы алимлер оны алдаткъанларыны корип, пек ачувланды ве, олардан билип алгъан вакъыткъа коре, Вифлеемде ве онынъ этрафында эки яшына етмеген эписи огълан балаларны ольдюрмек ичюн аскер ёллады.

¹⁷Бойледже, Йирмея пейгъамбер ярдымынен айтылгъан сёзлер ерине кельди:

¹⁸«Рама шеэринде бир сес эшитиле, — агълавлар ве буюк фигъанлар. Балалары ичюн Рахель агълай, — тынчланмагъа истемей бу къадын, чюнки онынъ балалары ёкъ энди».

¹⁹Ирод падиша ольген сонъ, Мысырда Юсуфкъа тюшюнде Алланынъ мелеги корюне ве:

²⁰— Еринъден тур, Баланы ве Онынъ анасыны ал да, Исраиль мемлекетине къайт. Чюнки Баланы ольдюрмеге истегенлер озьлери ольдилер, — деди.

²¹Шу ань Юсуф турды, Баланы ве Онынъ анасыны алып, Исраильге кельди.

²²Амма Еудиеде Ироднынъ ерине онынъ огълу Архелай тахткъа отургъаныны бильген сонъ, Юсуф анда бармагъа къоркъты. Тюшюнде эмир алып, о Галилея виляетине кетти.

²³Анда барып, Назарет шеэринде ерлешти. Бойлеликнен: «Онъа „назаретли” дейджеклер», — деген пейгъамбер сёзю ерине кельди.