Read Мукъаддес Китап къырымтатар тилинде, Матта 20 Bible Online

Матта 20 - Мукъаддес Китап къырымтатар тилинде, bible

Матта 20

¹Бойледже, Кок Падишалыгъы бунъа ошай: бир эфенди саба эрте озь юзюм багъына ыргъатларны кирагъа тутмакъ ичюн кете.

²О ыргъатларнен кунюне бир динар бермеге келишип, оларны озюнинъ юзюм багъына йиберди.

³Саат докъузларда о кене чыкъып, базар мейданында ишсиз тургъан башкъа адамларны корип,

⁴оларгъа: «Сизлер де меним юзюм багъыма барынъыз, мен сизлерге ляйыкъ акъкъынъызны беририм», — деди. Олар бардылар.

⁵Саат он экиде ве уйледен сонъ саат учьте о чыкъып, кене шойле япты.

⁶Саат бешлерде де, акъшам устю даа бир кере мейдангъа чыкъып, анда ишсиз тургъан адамларны корьди де: «Не ичюн сизлер бу ерде кунь бою ишсиз турасыз?» — деп сорады.

⁷Олар исе: «Бизлерни кимсе чалышмакъ ичюн кирагъа тутмады да», — дедилер. О оларгъа: «Сизлер де меним юзюм багъыма барынъыз», — деди.

⁸Акъшам олгъанда, багънынъ саиби озюнинъ идаре хызметчисине: «Ыргъатларны чагъырып, оларгъа, сонъкилерден башлап биринджилеринедже иш акъларыны бер», — деп буюрды.

⁹Саат бешлерде иш башлагъанлар келип бирер динар алдылар.

¹⁰Биринджи кельгенлер исе чокъча аладжамыз, деп тюшюндилер. Амма олар да бирер динар алдылар.

¹¹Олар иш акъкъыны алып, багъ саибине наразылыкъ бильдире башладылар:

¹²«Бу сонъунда кельгенлер бир саат ишледилер, сен исе оларны, бутюн кунь кучьлю кунеш тюбюнде чалышкъан бизлернен тенъ корьдинъ».

¹³Бунъа джевап берип багъ саиби олардан бирисине: «Достум, мен сени алдатмайым. Сен меннен бир динаргъа келишкен эдинъми?

¹⁴Энди акъкъынъны алып кет. Мен исе санъа бергеним къадар бу сонъки кельген адамгъа да бермеге истейим.

¹⁵Озь парамны истегенимдже масраф этмеге акъкъым ёкъмы? Я да мен бойле мераметли олгъанымны пахыллайсынъмы?» — деди.

¹⁶Бойлеликнен, сонъундакилер биринджи ве биринджилер исе сонъунда оладжакълар.

¹⁷Иса Ерусалимге ёл алгъанда, тек он эки шегиртини четке чагъырып, оларгъа:

¹⁸— Шимди биз Ерусалимге келип киреятамыз. Анда Инсан Огълуны баш руханийлер ве Къанун оджаларынынъ къолуна тутып береджеклер. Олар Оны олюмге укюм этеджеклер.

¹⁹Масхара этмек, къамчыламакъ ве хачкъа мыхламакъ ичюн Оны Аллагъа инанмагъан адамларгъа береджеклер. Учюнджи куню исе О, тириледжек, — деди.

²⁰Сонъ Якъуп ве Юханнынъ анасы, Зебедайнынъ къадыны озь огъулларынен берабер Исанынъ янына кельди. Бир шей истемек ниетинен, Онъа бель букти.

²¹Иса ондан: — Сен не истейсинъ? — деп сорады. — Сен Падиша олгъанда, бу меним эки огълумнынъ бириси онъ тарафынъда, экинджиси сол тарафынъда отураджакъларына сёз бер, — деди Онъа къадын.

²²Иса агъа-къардашкъа джевап берип: — Сизлер не истегенинъизни бильмейсиз. Мен ичеджек къадени ичип олурсызмы? — деди. — Ичермиз! — деди олар.

²³Иса исе: — Керчектен де, сизлер Мен ичеджек къадени ичеджексиз, амма Меним онъ ве сол тарафымда отурмагъа разылыкъ бермек Меним къолумда дегиль. Бабам бу ерни кимлерге азырлагъан олса, оларгъа береджек, — деди.

²⁴Башкъа он шегирти буны эшитип, эки агъа-къардашкъа ачувландылар.

²⁵Иса исе оларны янына чагъырып: — Сиз билесиз, башкъа миллетлернинъ башлыкълары оларгъа башлыкъ олалар, ве буюк адамлары оларнынъ устюнде укюм сюрелер.

²⁶Амма сизлернинъ аранъызда бойле олмасын. Ким сизде буюк олмагъа истесе, сизге хызметчи олсун.

²⁷Ким исе сизлернинъ аранъызда биринджи олмагъа истесе, сизинъ къулунъыз олсун.

²⁸Шойле де Инсан Огълу, Озюне хызмет эттирмек ичюн кельмеди, Озю хызмет этмек ве Озь джаныны къурбан этип, чокътан-чокъларны къуртармакъ ичюн кельди, — деди.

²⁹Олар Ерихон шеэринден чыкъкъанда, Исанынъ артындан чокъ адам кетти.

³⁰Ёл четинде эки кёр отура эди. Иса оларнынъ огюнден кечип кеткенини эшитип: — Я Рабби! Давутнынъ Огълу, бизге мерамет эт! — деп багъыра башладылар.

³¹Адамлар оларнынъ агъызларыны къапатмагъа меджбур этмеге истеселер де, олар даа зияде къычырып: — Я Рабби! Давутнынъ Огълу, бизге мерамет эт! — деп ялвардылар.

³²Иса токътап, оларны янына чагъырды да: — Сизлер Менден не истейсиз? Сизге не япайым? — деп сорады.

³³Олар: — Рабби, козьлеримиз ачылсын! — дедилер.

³⁴Иса оларны аджып, козьлерине къол тийдирди. Шу ань оларнынъ козьлери ачылды ве олар Исанынъ артындан кеттилер.