Read Мукъаддес Китап къырымтатар тилинде, Матта 23 Bible Online

Матта 23 - Мукъаддес Китап къырымтатар тилинде, bible

Матта 23

¹Ондан сонъ Иса халкъкъа ве шегиртлерине шойле деди:

²— Къанун оджалары ве фериселер Мусанынъ ерине отурдылар.

³Шунынъ ичюн олар сизге не беджермекни эмир этселер, беджеринъиз. Айткъанларыны япынъыз, лякин япкъанларыны япманъыз! Чюнки олар озь айткъанларыны беджермейлер.

⁴Олар агъыр ве ташымагъа къолайсыз олгъан юкни юк устюне юклеп, инсанларнынъ омузларына ташлайлар, лякин озьлери онъа бир пармакънен биле тиймейлер.

⁵Олар бутюн ишлерни, инсанларгъа корюнмек ичюн япалар. Олар дува къутуларыны кенъдже ве урбаларынынъ пускюллерини [15] узунджа япалар.

⁶Олар зияфетлерде тёрде ве синагогаларда энъ сайгъылы ерде отурмакъны,

⁷базар мейданларында урьметнен селям бермесини ве адамлар тарафындан «Равви» [16] дегенлерини истейлер.

⁸Сизлерге исе «Равви» демесинлер, чюнки сизинъ бир Оджанъыз бар. Сиз исе бир-биринъизге — агъа-къардашсынъыз.

⁹Ер юзюнде кимсеге «Баба» деменъиз, чюнки сизинъ тек бир Коклердеки Бабанъыз бар.

¹⁰Кимсе сизге «Ёлбашчы» демесин, чюнки сизинъ бир Ёлбашчынъыз бар — Алланынъ Месихи.

¹¹Аранъыздаки энъ буюк сою сизлерге хызмет этсин.

¹²Ким озюни юксек тутса, алчакъта оладжакъ. Ким озюни алчакъ тутса, о юксельтиледжек.

¹³[13-14] Эй Къанун оджалары ве фериселер! Экиюзьлюлер! Алынъызгъа беля! Чюнки Кок Падишалыгъыны инсанларнынъ огюнде къапатып, озьлеринъиз де кирмейсиз, кирмеге истегенлерни де йибермейсиз.

¹⁵Эй Къанун оджалары ве фериселер! Экиюзьлюлер! Алынъызгъа беля! Сизлер тек бир адамны озь дининъизге дёндюрмек ичюн денъизлер ве топракъларны айланып чыкъасыз. Лякин оны дёндюрген сонъ, озюнъизден эки къат бетер джеэннемнинъ огълу япасыз.

¹⁶Эй сокъур етекчилер! Алынъызгъа беля! Сизлер: «Алланынъ Сарайынен ант этсенъиз, бунынъ эмиети ёкъ олур, лякин Алланынъ Сарайындаки алтыннен ант этсенъиз, берильген сёзни беджермек керексиз», — дейсиз.

¹⁷Кёр акъылсызлар! Къайсы бири къыйметлидже: Сарайнынъ алтынымы, я да алтынны азиз япкъан Сарайнынъ озюми?

¹⁸Шунынънен, сизлер кене: «Къурбан чалынгъан еринен ант этсенъиз, бунынъ эмиети ёкъ олур, лякин къурбан чалынгъан ериндеки бахшышнен ант этсенъиз, оны беджермек керексиз», — дейсиз.

¹⁹Сокъурлар! Къайсы бири къыйметлидже: бахшышмы я да бахшышны азиз япкъан къурбан чалынгъан ерми?

²⁰Бойледже, къурбан чалынгъан ернен ант эткен адам, эм къурбан еринен, эм ондаки эписи шейлернен ант эте.

²¹Алланынъ Сарайынен ант эткен адам исе, эм Сарайнынъ озю, эм анда яшагъан Алланен ант эте.

²²Кокнен ант эткен адам исе, эм Алланынъ тахтынен, эм де онынъ устюнде Отургъанынен ант эте.

²³Эй Къанун оджалары ве фериселер! Экиюзьлюлер! Алынъызгъа беля! Сиз нане, таракъот ве зиранынъ ондан бир пайыны бересиз, лякин Къануннынъ энъ муимини: адалетлик, мераметлик ве садыкълыкъны — котерип атасыз. Буны исе беджермек ве башкъасыны да унутмамакъ керек.

²⁴Эй кёр етекчилер! Сизлер чиркийни ичимлигинъизден сюзип ташлап, девени ютасыз!

²⁵Эй Къанун оджалары ве фериселер! Экиюзьлюлер! Алынъызгъа беля! Сизлер пиала ве табакънынъ тышыны темизлейсиз, амма оларнынъ ичи хырсызлыкъ ве къызгъанчлыкъкъа толып таша.

²⁶Эй кёр ферисе! Сен башта пиаланынъ ичини темизле, о вакъыт онынъ тышы да темиз олур.

²⁷Эй Къанун оджалары ве фериселер! Экиюзьлюлер! Алынъызгъа беля! Сизлер сыланылгъан дюрбелер киби: олар тыштан дюльбер корюнелер, лякин ичи олю кемиклерге ве тюрлю арам шейлерге толу.

²⁸Сиз де ойле: тыштан адамларгъа инсафлы корюнесиз, ичинъиз исе экиюзьлюлик ве адалетсизлик толу.

²⁹Эй Къанун оджалары ве фериселер! Экиюзьлюлер! Алынъызгъа беля! Сизлер пейгъамберлерге дюрбелер къурып, азиз-эвлияларнынъ дефн этильген ерлерини донатып юресиз.

³⁰«Эгер бабаларымыз девринде яшагъан олсакъ, биз пейгъамберлернинъ къаныны тёкювинде иштирак этмез эдик», — дейсиз.

³¹Бунен сиз озюнъизге къаршы шаатлыкъ бересиз, пейгъамберлерни ольдюргенлернинъ огъуллары экенинъизни озюнъиз тасдыкълап турасыз.

³²Къана, бабаларынъыз башлагъан ишни битиринъиз!

³³Сиз йыланлар ве йылан союндансыз! Сиз джеэннем джезасындан къуртуламазсынъыз!

³⁴Динъленъиз: Мен сизге пейгъамберлерни, акъыллы адамларны ве Къанун оджаларыны ёллайджам. Сизлер исе олардан кимни ольдюрирсиз, кимни хачкъа мыхларсыз, кимни исе синагогаларынъызда къамчылап, шеэрден шеэрге къуварсыз.

³⁵Бойледже, инсафлы адам Хабильнинъ къанындан башлап, Алланынъ Сарайы ве къурбан ери арасында сизлер ольдюрген Барахиянынъ огълу Зекарьянынъ къанынадже, ер юзюнде тёкюльген бутюн гунасыз адамларнынъ къаны сизинъ бойнунъызда!

³⁶Сизге догърусыны айтам: буларнынъ эписи шу несильнинъ бойнуна тюшеджек.

³⁷Эй Ерусалим, Ерусалим! Пейгъамберлерни ольдюрген ве онъа ёлланылгъан адамларны ташларнен ургъан шеэр! Тавукъ озь чипчелерини къанатлары астында насыл топласа, Мен де къач кере сенинъ балаларынъны Озь яныма топламагъа истедим, сизлер исе истемединъиз.

³⁸Мына, сизинъ эвинъиз сизге къалдырылгъан ве бош тура!

³⁹Сизге айтам: «Раббининъ ады иле Келеяткъанны шуретленъиз!» — демегендже, Мени корьмейджексиз.