Read Мукъаддес Китап къырымтатар тилинде, Матта 27 Bible Online

Матта 27 - Мукъаддес Китап къырымтатар тилинде, bible

Матта 27

¹Саба эрте баш руханийлер ве халкънынъ акъсакъаллары, Исаны ольдюрмек къарарыны чыкъармакъ ичюн, бирлешип топландылар.

²Оны багъладылар ве аким Пилатнынъ [18] огюне алып бардылар.

³Исаны саткъан Иуда исе, Онынъ олюмге укюм этильгенини билип, пешман этти ве отуз кумюшни баш руханийлер ве акъсакъалларгъа къайтарып:

⁴— Мен гуна яптым, къабаатсыз адамны саттым, — деди. Олар исе: — Бундан бизлерге не? О сенинъ ишинъ! — дедилер.

⁵Иуда исе, акъчаларны Сарайда котерип атты, ве о ерден кетип, озюни асты.

⁶Баш руханийлер акъчаны алып: «Бу парада къан бар, оны хазинеге къоймагъа Къанун рухсет этмей», — дедилер.

⁷Озьара анълашып, бу акъчагъа чет адамлар комюледжек мезарлыкъ ичюн чёльмекчининъ тарласыны сатын алдылар.

⁸Шунынъ ичюн о тарла бу куньлерге къадар «Къан Тарласы» деп адлана.

⁹Шунынънен Йирмея пейгъамбернинъ агъзындан айтылгъаны беджерильди: «Исраиль огъуллары Онъа фият къойгъан отуз кумюшни алды.

¹⁰Алла манъа буюргъан киби, чёльмекчининъ тарласыны сатын алдылар».

¹¹Иса исе акимнинъ огюнде турды. Аким Ондан: — Сен еудийлернинъ Падишасы оласынъмы? — деп сорады. — Сен озюнъ Манъа «Падиша» дейсинъ, — деди онъа Иса.

¹²Баш руханийлер ве акъсакъаллар Оны къабаатлагъанда, О ич бир шей айтмады.

¹³Пилат Онъа: — Эшитмейсинъми, Санъа къаршы не къадар шаатлыкъ япалар! — деди.

¹⁴Лякин Иса бу лафларгъа бир сёз биле джевап къайтармады. Аким пек шашты.

¹⁵Эр Песах Байрамында акимнинъ халкъ истеген бир мабюсны азат эткен адети бар эди.

¹⁶Бу сефер зинданда намлы бир айдут бар эди, онынъ ады Иса Барабба эди.

¹⁷Халкъ топлангъанда, Пилат олардан: — Сизлер кимни азат эткенимни истейсиз? Иса Бараббаны, я да Месих деп адлангъан Исанымы? — деп сорады.

¹⁸О, олар Исаны пахыллап теслим эткенлерини анълай эди.

¹⁹Пилат, къады курсюсине отургъанда, апайындан хабер кельди: «О инсафлы адамгъа ич бир шей япма, чюнки бугунь мен тюшюмде О ичюн пек азап чектим».

²⁰Амма баш руханийлер ве акъсакъаллар халкъны къандырдылар, Бараббаны азат этмесини ве Исаны ольдюрильмесини талап эттилер.

²¹Аким олардан: — Сизлер экисинден къайсы бирини азат эткенимни истейсиз? — деп сорады. — Бараббаны! — деп джевап бердилер.

²²Пилат оларгъа: — Я Месих деп адлангъан Исанен не япайым? — деди. — Хачкъа мыхлансын! — деди олар.

²³— О не яманлыкъ япты? — деп сорады аким. Лякин олар даа зияде багъырып: — Хачкъа мыхлансын! — дедилер.

²⁴Пилат ич бир шей ярдым этмегенини, аксине исьян котериледжегини корип: — Мен бу адамнынъ къаны тёкюледжегинде къабаатлы дегилим. Бу ишни озьлеринъиз бакъынъыз! — деди де, халкънынъ козю огюнде сув кетиртип, эллерини ювды.

²⁵Бутюн халкъ бунъа джевап берип: — Онынъ къаны бизим ве балаларымызнынъ башында олсун! — деди.

²⁶Бундан сонъ Пилат Бараббаны чыкъарып йиберди, Исаны исе къамчылап хачкъа мыхламагъа эмир берди.

²⁷Сонъ акимнинъ аскерлери Исаны преториягъа [19] алып бардылар. Онынъ этрафында бутюн арбий болюкни [20] топладылар.

²⁸Онынъ урбаларыны чыкъарып, устюне къырмызы тюслю урба [21] кийдирдилер.

²⁹Тикенлерден тадж орип, башына такътылар. Онъ къолуна таякъ берип, Онынъ алдында тиз чёктилер ве: — Яшасын еудийлернинъ Падишасы! — деп масхара эттилер.

³⁰Сонъ Онынъ устюне тюкюрип, таякъ алып башына урдылар.

³¹Масхаралап тойгъан сонъ, устюнден урбаны чыкъарып, Озюнинъ урбаларыны кийдирдилер ве хачкъа мыхламакъ ичюн алып кеттилер.

³²Олар чыкъып кетеяткъанларда, киренели Симон деген бир адамны расткетирдилер. Оны Исанынъ хачыны котерип бармагъа меджбур эттилер.

³³«Къафа Ери» манасыны анълаткъан, Голгофа деген ерге кельдилер.

³⁴Анда Исагъа ичмек ичюн оть къарыштырылгъан шарап [22] бердилер. Иса оны къапып бакъты, амма ичмеге истемеди.

³⁵Сонъ Оны хачкъа мыхлап къойдылар. Урбалары ичюн джереп чекип, озьара пайлаштылар

³⁶ве отурып, Оны къаравулладылар.

³⁷Онынъ башы тёпесинде: «Бу — еудийлернинъ Падишасы Иса», — деп, къабаатыны косьтерген языны къойдылар.

³⁸Исанен даа эки айдутны — бирисини Онынъ онъ тарафында, экинджисини исе сол тарафында хачкъа мыхлап къойдылар.

³⁹Кечип кетеяткъанлар башларыны саллап, Исагъа куфюр сёзлер айта эдилер:

⁴⁰— Эй, Сен, Алланынъ Сарайыны йыкъкъан ве учь кунь ичинде къургъан адам! Озюнъни Озюнъ къуртарса! Эгер Сен Алланынъ Огълу олсанъ, хачтан тюшсе!

⁴¹Баш руханийлер, Къанун оджалары ве акъсакъаллар да Оны мыскъыллай эдилер:

⁴²— Башкъаларны къуртара эди, Озюни исе къуртарып оламай! О — Исраильнинъ Падишасы! Хачтан тюшсюн, о вакъытта биз Онъа инанырмыз!

⁴³О, Аллагъа ишанды. Эгер Алла Оны истесе, Оны къуртарсын! О: «Мен Алланынъ Огълу олам», — деген!

⁴⁴Исанен берабер хачкъа мыхлангъан айдутлар да Оны шойле сёге эдилер.

⁴⁵Уйледен башлап саат учьке къадар бутюн дюньяны къаранлыкъ басты.

⁴⁶Саат учьлерде Иса къатты сеснен къычырып: — Эли, Эли, лема савахтани? — деди. Бу сёзлернинъ терджимеси: «Аллам, Аллам! Сен не ичюн Мени къалдырып кеттинъ?» — демектир.

⁴⁷О ерде тургъанлардан базылары буны эшитип: — О, Ильясны чагъыра, — дедилер.

⁴⁸Олардан бириси тез-тез чапып барып, сарувлы сюнгерни экши шарапкъа батырып, таякъ уджуна илиштирди де, Исагъа узатты.

⁴⁹Башкъалары исе: — Токъта бакъайыкъ, Ильяс келип Оны къуртараджакъмы? — дедилер.

⁵⁰Иса исе даа бир кере къатты сеснен къычырып, сонъки нефесини чыкъарды.

⁵¹Шу ань Алла Сарайындаки перде тёпеден ашагъадже йыртылып, экиге болюнди. Ер титреди, къаялар ярылды.

⁵²Къабирлер ачылды ве чокъ раметли азизлер тирильди.

⁵³Олар къабирлеринден чыкъып, Иса тирильген сонъ мукъаддес шеэрге кирдилер ве чокъ адамларгъа корюндилер.

⁵⁴Исаны къаравуллагъан юзбашы ве онынъ аскерлери, ер титрегенини ве башкъа вакъиаларны корип, пек къоркътылар ве: — Акъикъатен О — Алланынъ Огълу экен! — дедилер.

⁵⁵Анда чокъ къадынлар да узакътан бакъып тура эдилер. Олар, Галилеядан башлап Исанынъ пешинден кетип, Онъа хызмет эткен эдилер.

⁵⁶Оларнынъ арасында магдалалы Мерьем, Якъупнен Юсуфнынъ анасы Мерьем эм де Зебедай огъулларынынъ анасы бар эди.

⁵⁷Акъшам Ариматея шеэринден олгъан Юсуф адлы бир зенгин адам кельди. О да Исанынъ шегирти эди.

⁵⁸Пилатнынъ огюне барып, Исанынъ беденини сорады. Пилат беденни онъа берильмесини буюрды.

⁵⁹Юсуф джесетни алып, темиз кетен безге сарды

⁶⁰ве озюнинъ къаяда оюлгъан янъы къабринде дефн этти. Къабирнинъ агъзыны балабан бир ташнен къапатып, кетти.

⁶¹Магдалалы Мерьемнен башкъа Мерьем исе къабирнинъ къаршысында отура эдилер.

⁶²Эртеси куню — раатлыкъ куню — баш руханийлер ве фериселер Пилаткъа кельдилер ве:

⁶³— Эфендимиз, биз О яланджы даа сагъ олгъанда: «Мен учь куньден олюлер арасындан турарым», — дегенини хатырладыкъ.

⁶⁴Шунынъ ичюн сен учюнджи куню кечмегендже Онынъ мезарыны къорумагъа эмир эт. Ёкъсам Онынъ шегиртлери келип джеседини хырсызлар да, сонъра халкъкъа: «О олюлер арасындан тирилип турды», — дерлер. Эм бу ялан биринджисинден де бетер олур, — дедилер.

⁶⁵Пилат оларгъа: — Сизде сакъчылар бар. Барып, бильгенинъиз киби къабирни къаравулланъыз, — деди.

⁶⁶Олар барып, къабир ташына муурь бастылар ве къабирни къорумагъа къаравулларны къойдылар.