Read Мукъаддес Китап къырымтатар тилинде, Матта 28 Bible Online

Матта 28 - Мукъаддес Китап къырымтатар тилинде, bible

Матта 28

¹Раатлыкъ куню кечкен сонъ, афтанынъ биринджи кунюнде [23], саба танъда магдалалы Мерьемнен башкъа Мерьем къабирни бакъмагъа бардылар.

²Бирден кучьлю зельзеле олды. Бу Алланынъ мелеги коктен энди ве къабирнинъ янына барып, ташны четке авдарды ве устюне отурды.

³Онынъ корюниши яшынгъа ошай, урбалары исе къар киби бем-беяз эди.

⁴Къобаны къаравуллагъан аскерлер къоркъудан къалтырадылар ве ольген киби олдылар.

⁵Мелек исе къадынларгъа: — Къоркъманъыз! Хачкъа мыхлангъан Исаны къыдыргъанынъызны билем.

⁶О бу ерде ёкъ. Сизлерге айткъаны киби, О тирильди. Келинъиз, Раббинъиз яткъан ерини бакъынъыз.

⁷Энди тез барынъыз да, Онынъ шегиртлерине: «Иса тирильди! О сизлерден эвель Галилеягъа бара. Сиз Оны анда корерсиз», — денъиз. Энди Мен сизлерге эписини айттым, — деди.

⁸Къадынлар тез-тез къабирден чыкъып, буюк къуванч ве къоркъу иле Онынъ шегиртлерине хабер этмеге чаптылар.

⁹Апансыздан Исанынъ Озю оларнынъ къаршысына чыкъып: — Мерабанъыз! — деди. Къадынлар Онынъ янына чапып бардылар ве аякъларыны къучакълап, теменна эттилер.

¹⁰Иса оларгъа: — Къоркъманъыз! Барып, къардашларыма айтынъыз, Галилеягъа барсынлар. Анда олар Мени корерлер, — деди.

¹¹Къадынлар ёлда олгъанда, къабирни къоругъан бир къач къаравул барып, баш руханийлерге олгъан шей акъкъында хабер эттилер.

¹²Олар акъсакъалларнен топланып, акъыл таныштылар ве аскерлерге чокъ пара берип:

¹³— Биз гедже юкълагъан маальде Онынъ шегиртлери келип, джеседини хырсызлап кеттилер, — денъиз, — деп оларны огреттилер.

¹⁴— Эгер де бу иш акимнинъ къулагъына етсе, бизлер оны ишандырырмыз ве сизлерни белядан къуртарырмыз.

¹⁵Аскерлер акъчаны алып, баш руханийлер оларны огреткени киби яптылар. Бу хабер еудийлер арасында кенъ даркъалып, бугуньки куньлергедже яшап кельмекте.

¹⁶Он бир шегирт исе Галилеягъа, Иса оларгъа буюргъан дагъгъа кеттилер.

¹⁷Олар Исаны корип, Онъа табындылар. Базылары исе шубелендилер.

¹⁸Иса оларгъа якъынлашып, лафыны башлады: — Манъа кокте де, ерде де бутюн акимиет берильди.

¹⁹[19-20] Шунынъ ичюн барынъыз! Эписи халкълардан адамларны Меним шегиртлерим япынъыз! Оларны Коклердеки Баба, Огъул ве Мукъаддес Рух адынен сувгъа батырып чыкъарынъыз ве Мен сизлерге буюргъан эр шейни тутмагъа оларгъа огретинъиз! Мен исе эр вакъыт, дюньянынъ сонъунадже сизлернен!