Read Мукъаддес Китап къырымтатар тилинде, Матта 3 Bible Online

Матта 3 - Мукъаддес Китап къырымтатар тилинде, bible

Матта 3

¹Шу куньлерде Еудиенинъ сахрасында Сувгъа Батырыджы Ягъя пейда ола. О адамларгъа:

²— Тёвбе этинъиз, чюнки Кок Падишалыгъы энди пек якъын! — деп илян эте.

³Ешая пейгъамбер о, Ягъя акъкъында шойле айткъан: «Сахрада бир адам къычыра: „Раббининъ ёлуны азырланъыз, кечеджек ерлерини тюм-тюз этинъиз!”»

⁴Ягъянынъ озю деве юнюнден орюльген урба кийип, белине мешин къушакъ багълап юре эди. Онынъ ашагъан ашы исе чегертки ве кийик бал эди.

⁵Ерусалим, бутюн Еудие ве Иордан озенининъ этрафында яшагъанлар онынъ алдына келе эдилер.

⁶Олар озь гуналарыны айта эдилер, Ягъя исе кельгенлерни Иордан озенинде сувгъа батырып чыкъара эди.

⁷Онынъ алдына чокъ ферисе ве саддукий де сувгъа батырылып чыкъмагъа кельгенлерини корип, Ягъя оларгъа: — Эй йылан союндан олгъанлар! Башынъызгъа келеяткъан Алланынъ гъазабындан къачып къуртуладжагъынъызны сизге ким огретти? — деди.

⁸— Тёвбе эткенинъизни озь ишлеринъизнен исбат этинъиз!

⁹Лякин ичинъизден: «Ибраим бизим бабамыз!» — деп, ич тюшюнменъиз. Мен сизлерге шуны айтам: Алланынъ мына бу ташлардан Ибраимге бала япмагъа къудрети бар.

¹⁰Шимди тереклернинъ тамырлары янында балта азыр ята. Яхшы мейва бермеген эр бир терекни кесип, атешке ташлайлар.

¹¹Мен сизни сувгъа батырам. Бу — тёвбе бельгисидир. Амма артымдан Келеяткъан менден къудретлидир. Мен Онынъ аякъкъапларыны котерип, пешинден кетмеге биле ляйыкъ дегилим. О сизни Мукъаддес Рухкъа ве атешке батыраджакъ.

¹²О энди Озюнинъ махсус курегинен богъдайны кепектен айырмагъа азыр. О, Озь арманыны темизлейджек: богъдайны анбаргъа топлап, кепекни исе сёнмез атеште якъаджакъ.

¹³О вакъыт Ягъянынъ янына, сувгъа батырылмакъ ичюн, Галилеядан Иордан озени боюна Иса келе.

¹⁴Ягъя башта Оны токътатмагъа истеп: — Мен озюм Санъа барып сувгъа батырылмакъ керегим. Сен исе манъа кельгенсинъ! — деди.

¹⁵Иса онъа джевап берип: — Шимди шай олсун, бизге Алланынъ истегенини япмакъ керек, — деди. Ве Ягъя разы олды.

¹⁶Батырылгъан сонъ, Иса аман сувдан чыкъты. Шу ань Онынъ огюнде кок ачылды да, Иса Алланынъ Рухуны корьди: О, гогерджин киби ашагъа энип, Онъа къонды.

¹⁷Коклерден: — Бу — Меним севимли Огълумдыр! Мен Ондан разым! — деген сес эшитильди.