Read Мукъаддес Китап къырымтатар тилинде, Матта 4 Bible Online

Матта 4 - Мукъаддес Китап къырымтатар тилинде, bible

Матта 4

¹Сонъ Рух Исаны, Иблиснинъ сынавындан кечмек ичюн, сахрагъа алып барды.

²О къыркъ кунь ве къыркъ гедже аштан вазгечип, пек ач олды.

³Онынъ янына Сынавджы кельди де: — Эгер Сен Алланынъ Огълу олсанъ, айтчы, бу ташлар отьмек олсунлар! — деди.

⁴Иса онъа джевап берип, шойле деди: — Алланынъ Китабында: «Инсангъа яшамакъ ичюн тек бир отьмек дегиль, онъа Алланынъ агъзындан чыкъкъан эр бир сёз керек ола», — деп язылгъан.

⁵Сонъ Иблис Исаны Ерусалимге, Мукъаддес Шеэрге кетирте ве Оны Алланынъ Сарайы тёпесине къойып,

⁶Исагъа: — Эгер Сен Алланынъ Огълу олсанъ, Озюнъни ашагъа ташлачы. Чюнки Алланынъ Китабында шойле язылгъан: «О, Сен акъкъынъда Озь мелеклерине эмир этеджек» ве «Олар Сени къолларында котерип кетеджеклер, аягъынъ ташкъа сюрюнмейджек».

⁷Иса онъа: — Анда даа язылгъан: «Раббинъни, сенинъ Алланъны сынама», — деди.

⁸Сонъ Иблис Исаны пек юксек къая устюне чыкъартты. Дюньянынъ бутюн падишалыкъларыны ве оларнынъ шуретини Онъа косьтерип:

⁹— Эгер тиз чёкип, манъа ибадет этсенъ, буларнынъ эписини Санъа беририм, — деди.

¹⁰Иса исе: — Козюмден ёкъ ол, Иблис! Алланынъ Китабында: «Раббинъе Алланъа белинъни бук, тек Онъа ибадет эт», — деп язылгъан, — деди.

¹¹Бундан сонъ Иблис Исадан кетти. Шу ань мелеклер келип, Онъа хызмет эттилер.

¹²Иса Ягъянынъ апске алынгъаныны эшитип, Галилеягъа къайтып кельди.

¹³О, Назарет шеэринден кетип, Зевулун ве Нафтали топракъларында, Галилея голю янындаки Кафарнаум шеэринде ерлешти.

¹⁴Бойледже, Ешая пейгъамбернинъ сёзю эда олунды:

¹⁵«Эй Зевулун топрагъы ве Нафтали топрагъы, голь ёлунда, Иордан аркъасы! Чокъ миллетнинъ юрту Галилея!

¹⁶Къаранлыкъта яшагъан халкъ буюк ярыкъ корьди! Олюм топрагъында, олюм саесинде яшагъан адамлар ичюн айдын ярыкъ танъ атты».

¹⁷О вакъыттан сонъ Иса: — Тёвбе этинъиз, чюнки Кок Падишалыгъы якъын кельди, — деп, адамларгъа Алланынъ шейлерини огретип башлады.

¹⁸Галилея голю боюндан кечеяткъанда, Иса эки агъа-къардашны: Пётр деп адлангъан Симонны ве онынъ къардашы Андрейни корьди. Олар балыкъчы эди ве сувгъа сачмаларыны атып тура эдилер.

¹⁹Иса оларгъа: — Меним артымдан юрюнъиз. Сиз балыкъ дегиль де, инсан тутаджакъсынъыз, — деди.

²⁰Агъа-къардаш шу ань балыкъ сачмаларыны ташлап, Исанынъ пешинден кеттилер.

²¹Бираз юрген сонъ, Иса башкъа эки агъа-къардашны: Зебедайнынъ огълу Якъупны ве онынъ къардашы Юханны корьди. Олар бабасы Зебедайнен къайыкъ ичинде балыкъ сачмаларыны тюзете эдилер. Иса оларны да чагъырды.

²²Олар да, шу ань къайыкъны ве бабасыны къалдырып, Онынъ артындан кеттилер.

²³Иса бутюн Галилеяны айланып чыкъты. О синагогаларда халкъны огретип, Алланынъ Падишалыгъы акъкъында хабер этти, адамларны тюрлю хасталыкълардан ве дертлерден тедавийлеп юрди.

²⁴Онынъ шурети бутюн Суриеге даркъалды. Тюрлю хасталыкълар ве агъыр дертлернен чекишип юргенлерни, джин ургъанларны, паралич ургъанларны ве тутарыкъ хасталарыны, эписини Исанынъ алдына кетире эдилер. О исе оларны тедавийлей эди.

²⁵Галилея, Он Шеэр, Ерусалим, Еудие ве Иордан аркъасы тарафындан чокъ олып кельген адамлар Онынъ артындан юре эдилер.