Read Мукъаддес Китап къырымтатар тилинде, Матта 5 Bible Online

Матта 5 - Мукъаддес Китап къырымтатар тилинде, bible

Матта 5

¹Бир кунь Иса, адамларнынъ чокълугъыны корип, дагънынъ тёпесине чыкъып отурды. Шегиртлери Онынъ янына кельдилер.

²Иса оларны огретип башлады:

³— Не де бахтлыдыр, озюнде кучьлю руху олмайып, Аллагъа ишангъанлар, чюнки Кок Падишалыгъы оларнынъки!

⁴Не де бахтлыдыр агълагъанлар, чюнки олар теселли тападжакълар!

⁵Не де бахтлыдыр ювашлар, чюнки оларгъа ер юзю мирас оладжакъ!

⁶Не де бахтлыдыр акъикъаткъа ач олгъан ве сувсагъанлар, чюнки олар тояджакълар!

⁷Не де бахтлыдыр мераметлилер, чюнки оларгъа мерамет эйленеджек!

⁸Не де бахтлыдыр саф юреклилер, чюнки олар Алланы кореджеклер!

⁹Не де бахтлыдыр барыштырыджылар, чюнки олар Алланынъ огъуллары дениледжеклер!

¹⁰Не де бахтлыдыр акъикъат ичюн къувулгъанлар, чюнки Кок Падишалыгъы оларнынъки!

¹¹Мен ичюн адамлар сизни къувгъанда-къаралагъанда, сиз акъкъынъызда яман яланлар айткъанда, бахтлы оладжакъсыз!

¹²Къуванынъыз ве шенъленинъиз, чюнки коклерде сизинъ мукяфатынъыз буюктир! Сизден эвель яшагъан пейгъамберлер де шойле къувулгъан эдилер.

¹³Сиз — дюньянынъ тузусынъыз. Амма туз тузлугъыны джойса, онынъ лезетини насыл къайтараджанъ? О артыкъ ич бир шейге ярамаз, оны кельген-кеткенлернинъ аякълары астына аталар!

¹⁴Сиз — дюньянынъ нурусынъыз. Дагъ тёпесинде ерлешкен шеэр гизли оламаз.

¹⁵Чыракъ якъкъанда, онынъ устюни савутнен къапатмайлар, аксине, оны шамдан устюне ерлештирелер, ве о, ярыгъыны эвдекилернинъ эписине бере.

¹⁶Ойле де, сизинъ нурунъыз инсанлар огюнде парылдасын, олар исе яхшы ишлеринъизни корип, Коклердеки Бабанъызны шуретлесинлер.

¹⁷Мени, Алланынъ Къануныны я да Пейгъамберлернинъ Языларыны ёкъ этмек ичюн кельди, деп тюшюнменъиз. Мен оларны ёкъ этмек ичюн дегиль, беджермек ичюн кельдим.

¹⁸Сизге айткъаным догърудыр: ернен кок джоюлмагъандже, Къанундан не бир юфакътан-юфакъ ариф, арифнинъ чызычыгъы биле ёкъ олмаз. Бу шейлернинъ эписи оладжакъ.

¹⁹Ким бу эмирлернинъ энъ юфагъыны бозып, башкъаларны да буны япмагъа огретсе, Кок Падишалыгъында эписинден кучюк оладжакъ. Лякин ким бу эмирлерни беджерип, башкъаларгъа огретсе, Кок Падишалыгъында буюк оладжакъ.

²⁰Сизлерге шуны айтайым: эгер сизлер фериселер ве Къанун оджаларындан инсафлы олмасанъыз, Кок Падишалыгъына кирип оламазсыз.

²¹Баба-деделерге: «Адамнынъ джаныны алма! Ким адам ольдюрсе исе, махкемеде къабаатлы сайыладжакъ», — денильгенини эшиттинъиз.

²²Мен исе сизге айтам: ким агъа-къардашына кин тутса биле, махкемеде къабаатлы сайыладжакъ. Ким бирисине «къабакъ баш» десе, Юксек Шура огюнде къабаатлы сайыладжакъ. Ким бирисине «акъылсыз кяфир» десе, джеэннем атешине огърамагъа ляйыкъ оладжакъ.

²³Бойледже, сен къурбан чалынгъан ерге бахшыш кетиргенде, анда къардашынънынъ санъа джаны агъыргъаны акъылынъа кельсе,

²⁴бахшышынъны о ерде къалдыр ве барып, къардашынънен муаббетлеш. Бундан сонъ келип, бахшышынъны бер.

²⁵Эгер бириси сени къадыгъа джевап бермек ичюн алып кетсе, даванъызны даа вакъыт олгъанда, ёл бою чезинъиз. Чюнки ракъибинъ сени къадыгъа, къады исе апсхане аскерине береджек. Сонъ сени зиндангъа ташларлар.

²⁶Санъа догърусыны айтам: о ерден сонъки капигинъни бермегендже чыкъып оламазсынъ!

²⁷Сиз: «Аиле садыкълыгъыны бозма», — денильгенини эшиттинъиз.

²⁸Мен исе сизге айтам: ким бир къадынгъа бозукъ ниетнен бакъса биле, гонълюнде о къадыннен гуна ичине энди баткъан ве садыкълыгъыны бозгъан.

²⁹Эгер онъ козюнъ сени ёлдан урса, оны чыкъарып ал да, озюнъден узакъча ташла. Бир къысмынъ гъайып олса да, бу сен ичюн бутюн беденинъ джеэннемге ташлангъанындан яхшыдыр.

³⁰Эгер онъ къолунъ сени ёлдан урса, оны кесип, озюнъден узакъча ташла. Бир къысмынъ гъайып олса да, бу сен ичюн бутюн беденинъ джеэннемге огърагъанындан яхшыдыр.

³¹Даа шойле айтылгъан: «Ким апайындан айырылса, онъа айырув кягъытыны берсин».

³²Лякин Мен сизге айтам: ким апайындан, аиле садыкълыгъы бозувындан башкъа себеп тапып, айырылса, онынъ апайы исе башкъасына акъайгъа чыкъса, о, апайыны аиле садыкълыгъыны бозув гунасына ёллай. Айырылгъан къадынгъа эвленген адам да шу гунагъа огърай.

³³Даа баба-деделерге: «Берген антынъны бозма. Раббинъ алдында ант эткенинъни ерине кетир», — денильгенини эшиттинъиз.

³⁴Лякин Мен сизге айтам: ич бир вакъыт ич бир шейнен ант этменъиз! Кокнен ант этме, чюнки о — Алланынъ тахтыдыр.

³⁵Ернен де ант этме, чюнки о — Алланынъ аякъ баскъан ери. Ерусалимнен де ант этме, чюнки о — Улу Падишанынъ шеэридир.

³⁶Озь башынънен де ант этме, чюнки сен бир сачынъны биле беяз я да къара этип оламазсынъ.

³⁷Сенинъ айткъан сёзюнъ тек «эбет» ве «ёкъ» олсун. Эбет олса — эбет олсун, ёкъ олса — ёкъ олсун. Бундан башкъасы — яман Иблистен келе.

³⁸Сиз: «Козь ичюн козь ве тиш ичюн тиш», — денильгенини эшиттинъиз.

³⁹Мен исе сизге айтам: сизге япылгъан яманлыкъкъа къаршы яманлыкъ къайтарманъыз. Кимде-ким сенинъ сагъ янагъынъа урса, онъа сол янагъынъны къой.

⁴⁰Ким де сени махкемеге чекип, кольмегинъни тутып алмагъа истесе, онъа усть урбанъны да чыкъарып бер.

⁴¹Ким де, озюни озгъарып, сени бинъ адым кечмеге меджбур этсе, онен эки бинъ адым кеч.

⁴²Сенден сорагъангъа бер, сенден борджкъа алмакъ истегенден де юзь чевирме.

⁴³Сиз: «Якъынынъны сев ве душманынъдан нефретлен», — денильгенини эшиттинъиз.

⁴⁴Мен исе сизге айтам: душманларынъызны севинъиз эм сизни къувалагъанлар огъруна дувалар окъунъыз.

⁴⁵Ана ондан сонъ Коклердеки Бабанъызнынъ огъуллары олурсынъыз. Чюнки О Озь кунешине эмир эте ве кунеш эм яхшы адамлар, эм яман адамлар устюне догъа. Алла инсафлылар ве инсафсызлар устюне ягъмур ягъдыра.

⁴⁶Эгер сиз тек сизни севген адамларны севсенъиз, Алладан мукяфат беклемек олурмы? Салым топлайыджылар да бойле этмейлерми?

⁴⁷Эгер сиз тек дин къардашларынъызгъа селям берсенъиз, бунен буюк иш яптынъызмы? Аллагъа инанмагъанлар да бойле япмайлармы?

⁴⁸Бойледже, Коктеки Бабанъыз киби, сиз де мукеммель олунъыз.