Read Мукъаддес Китап къырымтатар тилинде, Матта 7 Bible Online

Матта 7 - Мукъаддес Китап къырымтатар тилинде, bible

Матта 7

¹Кимсени укюм этменъиз, сизни де укюм этмезлер.

²Сизлер насыл укюм этсенъиз, сизге де шойле укюм этеджеклер. Сизлер насыл ольчювнен ольчесенъиз, Алла да сизге шойле ольчеп берир.

³Сен не ичюн къардашынънынъ козюндеки чёпке бакъасынъ, озь козюнъде исе агъачны корьмейсинъ?

⁴Насыл этип, къардашынъа: «Бер, козюнъдеки чёпни чыкъарып алайым», — дейсинъ? Бакъса, сенинъ козюнъде агъач бар!

⁵Эй экиюзьлю! Башта озь козюнъден агъачны чыкъарып ал да, сонъ къардашынънынъ козюнден чёпни насыл чыкъараджагъынъны корерсинъ.

⁶Мукъаддес олгъан шейни копеклерге берменъиз — олар устюнъизге атылып, сизни парчаларлар. Инджилеринъизни домузлар огюне сепменъиз — олар оны таптап ташларлар.

⁷Соранъыз — сизге бериледжек. Къыдырынъыз — тападжакъсыз. Такъырдатынъыз — сизге ачыладжакъ.

⁸Чюнки эр бир сорагъан ала, къыдыргъан тапа, такъырдаткъангъа къапуны ачалар.

⁹Огълу бабасындан отьмек сорагъанда, онъа таш берген адам сизинъ аранъызда тапылырмы?

¹⁰Балыкъ сораса исе, онъа йылан берген сою бармы?

¹¹Эгер сиз, яман адамлар, балаларынъызгъа яхшы бир шей берип бильсенъиз, Коклердеки Бабанъыз Ондан сорагъангъа яхшы шейлерни багъышлар.

¹²Шунынъ ичюн, адамлар сизге не япкъаныны истесенъиз, сиз де оларгъа шуны япынъыз. Бунда бутюн Къанун ве Пейгъамберлернинъ Язылары тура.

¹³Тар къапудан киринъиз! Чюнки олюмнинъ къапусы кенъ, ве анда алып баргъан ёл пек бол. Шу ёлдан юргенлер де чокъ.

¹⁴Омюр къапусы исе пек тарашлыкъ, ёлу да тар. Ве бу ёлны тапкъанлар аз.

¹⁵Ялан пейгъамберлерден сакът олунъыз! Олар сизинъ алдынъызгъа къозу терисинен къапланып келелер, лякин ичинде йыртыджы къашкъырлардыр.

¹⁶Оларны, япкъан ишлери мейваларындан танырсыз. Когемден юзюм, я да тикенектен инджир джыялармы?

¹⁷Эр бир яхшы терек яхшы мейва бере, ярамай терек исе ярамай мейва бере.

¹⁸Яхшы терек ярамай мейва бермей, ярамай терек исе яхшы мейва бермей.

¹⁹Яхшы мейва бермеген эр бир терекни пычып, атешке ташлайлар.

²⁰Бойледже, ялан пейгъамберлерни ишлерининъ мейваларындан танырсыз.

²¹Манъа: «Раббим, Раббим!» — дегенлернинъ эписи Кок Падишалыгъына кирип оламаз. Анда тек Меним Коклердеки Бабамнынъ ирадесини беджергенлер киреджеклер.

²²Шу куню чокъ адамлар Манъа: «Раббим, Раббим! Биз Сенинъ адынънен пейгъамберлик этмедикми? Сенинъ адынънен джинлерни къувып чыкъармадыкъмы? Сенинъ адынънен чокъ аджайип шейлер япмадыкъмы?» — дейджеклер.

²³О вакъыт Мен оларгъа: «Мен сизни бир вакъыт бильмеген эдим. Эй Къанунны бозгъанлар, Меним янымдан кетинъиз!» — деп джевап береджем.

²⁴Энди, ким Меним бу сёзлеримни эшитип, оларны беджерсе, озь эвини таш устюнде къургъан акъыллы адамгъа ошаттыраджам.

²⁵Ягъмур ягъып, озенлер ташып, еллер эсип, о эвнинъ устюне тюшселер биле, таш устюнде къурулгъаны ичюн, о бозулмаз.

²⁶Ким Меним сёзлеримни эшитип, оларны беджермесе, озь эвини къум устюнде къургъан акъылсыз адамгъа ошайджакъ.

²⁷Ягъмур ягъып, озенлер ташып, еллер эсип, о эвнинъ устюне тюшселер, о эшилип, дагъылып кетеджек.

²⁸Иса бу сёзлерни айтып битиргенинен, адамлар Онынъ огреткенине шаштылар.

²⁹Чюнки Иса оларны Къанун оджалары киби дегиль, буюк къудрет берильген адам киби огрете эди.