Read Мукъаддес Китап къырымтатар тилинде, Матта 8 Bible Online

Матта 8 - Мукъаддес Китап къырымтатар тилинде, bible

Матта 8

¹Иса дагъдан тюшкен сонъ, Онынъ артындан чокъ адам кетти.

²Шу арада лепра хасталыгъынен чекишкен бир адам Онъа якъынлашып, тиз чёкти де: — Эфендим, эгер истесенъ, мени эляллап тедавийлерсинъ, — деди.

³Иса къолуны узатты ве онъа тийдирип: — Мен истейим, элял ол, — деди. Шу дакъкъасы лепра хасталыгъы ёкъ олып, о, элял олды.

⁴Иса онъа: — Сакъын, буны кимсеге айтма! Лякин барып, озюнъни руханийге косьтер ве Муса буюргъан бахшышны кетирип бер, о, эписине шаатлыкъ олсун, — деди.

⁵Иса Кафарнаум шеэрине кельгенде, Рим ордусынынъ бир юзбашы Онынъ алдына кельди ве ялварып:

⁶— Эфендим, меним хызметчим эвде пек къыйналып ята, оны паралич урды, — деди.

⁷Иса онъа: — Мен барып оны тедавийлерим, — деди.

⁸Юзбашы джевап берип: — Эфендим! Меним эвиме келип киргенинъе ляйыкъ дегилим. Сен бир сёзнен буюрсанъ биле, хызметчим тедавийленир.

⁹Чюнки мен де бойсунам, манъа да бойсунгъан аскерлер бар. Бирисине: «Кет», — десем, кете. Башкъасына: «Кель мында», — десем, келе. Хызметчиме: «Шуны яп», — десем, япа, — деди.

¹⁰Иса буны эшитип, шашты ве артындан юргенлерге: — Сизге догърусыны айтам: Мен о къадар буюк иманны Исраильде ич бир кимседе тапмадым.

¹¹Сизге шуны айтам: шаркътан ве гъарптан чокъ адам келип, Кок Падишалыгъында Ибраим, Исхакъ ве Якъупнен берабер софра башында ер аладжакълар.

¹²Исраиллилер ичюн Падишалыкъ азырлангъан эди, амма олар тышкъа, къаранлыкъкъа къувуладжакълар. Анда агълап, тишлерини гъыджырдатаджакълар, — деди.

¹³Сонъ Иса юзбашыгъа: — Эвинъе бар, сенинъ иманынъа коре олсун, — деди. Юзбашынынъ хызметчиси исе шу ань тюзельди.

¹⁴Иса Пётрнынъ эвине кельгенде, онынъ къайнанасы юксек сыджакънен яткъаныны корьди.

¹⁵Иса онынъ къолуна тийгенинен, къадыннынъ сыджагъы тюшти. О турып, Онъа софраны донатты.

¹⁶Акъшам устю, джин ургъан бир талай адамларны Исанынъ алдына кетирдилер. О, Озь сёзюнен арам рухларны къувып чыкъарды ве эписи хасталарны тедавийледи.

¹⁷Бойледже, Ешая пейгъамбер ярдымынен айтылгъан сёзлери беджерильди: «О хасталыкъларымызны Озюне алды ве дертлеримизни алып кетти».

¹⁸Сонъ Иса этрафында чокъ адам топлангъаныны корип, шегиртлерине гольнинъ къаршы ялысына кечмесини буюрды.

¹⁹Шу вакъытта бир Къанун оджасы Онъа якъынлашып: — Оджа! Къайда барсанъ да, мен Сенинъ артынъдан юрмеге азырым, — деди.

²⁰Иса онъа: — Тилькилернинъ къобалары бар, коктеки къушларнынъ ювалары бар. Лякин Инсан Огълунынъ башыны ястыкъкъа къойып ятмагъа ери ёкъ, — деди.

²¹Сонъ шегиртлеринден бири Исагъа: — Эфендим, башта барып бабамны дефн этмеге разылыкъ бер, — деди.

²²Лякин Иса онъа: — Сен Меним артымдан юр. Олюлер озь олюлерини дефн этсинлер, — деди.

²³Иса къайыкъкъа мингенде, Онынъ пешинден шегиртлери де чыкътылар.

²⁴Апансыздан гольде кучьлю фуртуна къопты, юксек далгъалар къайыкъны толдура башладылар. Иса исе юкъугъа далгъан эди.

²⁵Шегиртлери Онынъ янына барып, уяттылар ве: — Раббим! Бизни къуртар, богъулып оледжекмиз! — деп къычырдылар.

²⁶Иса исе: — Не ичюн сиз бойле къоркъакъсынъыз, аз иманлылар? — деди оларгъа. Сонъ еринден турып, фуртуна ве гольни тынчландырды. Шу вакъыт эр шей бутюнлей тынды.

²⁷Адамлар шашып къалдылар ве бир-бирлерине: — Кимдир бу я? Ель де, голь де Онъа бойсуналар! — дедилер.

²⁸Иса гольнинъ башкъа ялысына, гадаралыларнынъ юртуна етип кельгенде, къабирлернинъ арасындан Онынъ къаршысына джин ургъан эки адам чыкъты. Олар пек ачувлы олгъанлары ичюн, о ердеки ёлдан кимсе кечип оламагъан.

²⁹— Эй Алланынъ Огълу, бизде не ишинъ бар? Бу ерге бизни, вакъты кельмезден эвель, чекиштирмеге кельдинъми? — деп къычырды олар.

³⁰Узакъта буюк бир домуз сюрюси отлап юре эди.

³¹Джинлер Исагъа ялвардылар: — Эгер бизлерни къувып чыкъараджакъ олсанъ, анавы домуз сюрюсине ёлла, — дедилер.

³²Иса оларгъа: — Барынъыз! — дегени киби, джинлер адамлардан чыкъып, домузларгъа кирдилер. Шу ань бутюн домуз сюрюси тик къаядан гольге атылды ве сувда богъулып ольди.

³³Домузларны бакъкъанлар исе къачып кеттилер. Шеэрге барып, олып кечкен адисени ве джин ургъанларгъа не олгъаныны эписине айтып бердилер.

³⁴Онынъ ичюн, бутюн шеэр сакинлери Исанынъ къаршысына чыкъты. Оны корьгенлеринен, юртларындан чыкъып кетсин деп, риджа эттилер.