Read Мукъаддес Китап къырымтатар тилинде, Марк 11 Bible Online

Марк 11 - Мукъаддес Китап къырымтатар тилинде, bible

Марк 11

¹Ерусалимге якъынлашып, Зейтюн дагъынынъ этегинде ерлешкен Бетфаге ве Бетания койлерине кельгенде, Иса шегиртлеринден экисини ёллап:

²— Къаршынъыздаки койге барынъыз. О ерге киргенинъизнен, ич кимсе минмеген, багълы тургъан яш эшекни тапарсыз. Оны чезип, мында кетиринъиз.

³Эгер сизлерден: «Не япасыз?» — деп сорасалар, «О, Раббиге керек, О, оны тез къайтараджакъ»,— деп джевап беринъ, — деди.

⁴Олар барып, сокъакъта къапугъа багълы тургъан эшекни таптылар. Оны чезип алгъанда,

⁵шу ерде тургъан бир къач адам оларгъа: — Сиз не япасыз? Не ичюн бу эшечикни чезесиз? — дедилер.

⁶Шегиртлер Иса буюргъаны киби джевап берген сонъ, адамлар оларны йибердилер.

⁷Яш эшекни Исанынъ алдына алып кельдилер. Шегиртлер онынъ аркъасына озь урбаларыны къойдылар, Иса да устюне минди.

⁸Чокъ адамлар озь кийимлерини ёлгъа тёшедилер. Башкъалары исе, тарладаки тереклерининъ пытакъларыны кесип, ёлгъа ташладылар.

⁹Онынъ огюнде ве артында юргенлер: — Аллагъа шукюр! Раббининъ ады иле Келеяткъанны шуретленъиз!

¹⁰Бабамыз Давутнынъ якъынлашкъан Падишалыгъыны шуретленъиз! Коклерде Аллагъа бинъ шукюрлер! — деп къычыра эдилер.

¹¹Иса Ерусалимге келип, Алланынъ Сарайына кирди. Эр шейни козьден кечирип, вакъыт энди кеч олгъанда, он эки шегиртинен берабер Бетаниягъа къайтып кельди.

¹²Эртеси куню Бетаниядан чыкъкъанларында, Иса ач олды.

¹³О, узакъта япракъларынен къаплангъан бир инджир терегини корьди. Бир де бир емиш тапылырмы, деп, терекнинъ янына кельгенде, япракълардан гъайры бир шей тапмады, чюнки инджир джыймагъа даа вакъыт кельмеген эди.

¹⁴Иса терекке бакъып: — Энди сенинъ мейваларынъны ашагъанлар эбедиен олмасын! — деди. Шегиртлери де бу сёзлерни эшиттилер.

¹⁵Сонъ олар Ерусалимге кельдилер. Алланынъ Сарайынынъ азбарына киргенде, Иса анда алыш-веришнен огърашкъанларны къувмагъа башлады. Акъча алмаштырыджыларнынъ масаларыны, гогерджин сатыджыларнынъ курсюлерини авдарып йиберди.

¹⁶Сарайнынъ азбары ичинден бир шейни котерип кечмеге биле рухсет бермеди.

¹⁷Иса огретип: — Языда: «Меним Эвим эписи халкълар ичюн Ибадет Эви деп адлансын», — деп язылмагъанмы? — деди. — Сизлер исе оны айдутлар къобасына чевирдинъиз!

¹⁸Баш руханийлер ве Къанун оджалары буны эшитип, Исаны ольдюрмек ичюн чаресини къыдыра эдилер. Бутюн халкъ Онынъ огретювине шашкъаны ичюн, олар Ондан къоркъа эдилер.

¹⁹Акъшам устю Иса шегиртлеринен берабер, шеэрден чыкъып кетти.

²⁰Саба олар кене инджир тереги янындан кечтилер. Бакъсалар, шу терек тамырындан башлап бутюнлей къурып къалгъан.

²¹Пётр, эвельки вакъианы хатырлап, Исагъа: — Равви! Бакъса, Сен къаргъагъан инджир тереги къурып къалгъан, — деди.

²²Иса оларгъа джевап берип: — Аллагъа инанынъыз!

²³Сизлерге догърусыны айтам: эгер бириси мына бу дагъгъа: «Еринъден котерилип, денъизге атыл!» — десе, озь къальбинде ич шубеленмейип, айткъаны беджериледжегине инанса, айткъаны оладжакъ!

²⁴Шунынъ ичюн сизге Мен айтам: сиз дуваларынъызда не сорасанъыз, оны аладжагъынъызгъа инанынъыз ве истегинъиз ерине келир.

²⁵[25-26] Дува окъуп тургъанынъызда, биревге ачувлы олсанъыз, оны багъышланъыз. Сонъ Коктеки Бабанъыз да сизлернинъ гуналарынъызны багъышлар.

²⁷Олар кене Ерусалимге кельдилер. Иса, Сарайынынъ азбарында айланып юргенде, Онынъ янына баш руханийлер, Къанун оджалары ве акъсакъаллар келип,

²⁸суаль бердилер: — Бу ишлерни япмагъа Сенинъ акъкъынъ бармы? Шуны япмагъа Санъа бу акъны ким берди? — дедилер.

²⁹Иса оларгъа шойле джевап берди: — Мен де сизлерге бир суаль береджем. Манъа джевап берсенъиз, Мен де бу ишлерни япмагъа насыл акъкъым олгъаныны сизлерге айтарым.

³⁰Ягъя халкъны сувгъа батырып чыкъаргъаны Алладан я да адамларданмы? Манъа джевап беринъ, — деди.

³¹Олар озьара давалаша эдилер: «Эгер „Алладан”, — десек, О: „Не ичюн Ягъягъа инанмадынъыз?” — деп сорайджакъ.

³²„Адамлардан”, — десек исе...?» Амма олар халкътан къоркъа эдилер, чюнки эписи адамлар Ягъяны пейгъамбер деп сая эдилер.

³³Онынъ ичюн олар Исагъа: — Бильмеймиз, — дедилер. Иса да оларгъа: — Мен де буларны япмагъа насыл акъкъым олгъаныны сизлерге айтмам, — деп джевап берди.