Read Мукъаддес Китап къырымтатар тилинде, Марк 13 Bible Online

Марк 13 - Мукъаддес Китап къырымтатар тилинде, bible

Марк 13

¹Иса Алланынъ Сарайындан чыкъаяткъанда, шегиртлеринден бириси: — Оджам, бакъ, не къадар дюльбер ташлар ве биналар! — деди.

²Иса онъа джевап берип: — Бу буюк биналарны коресинъми? Амма бу ерде таш устюнде таш къалмайджакъ, — деди.

³Иса Зейтюн дагъында, Алла Сарайынынъ къаршысында отургъан вакъытта Пётр, Якъуп, Юхан ве Андрей бир озьлери къалып, Ондан сорадылар:

⁴— Бизлерге айт, бу шейлер не вакъыт оладжакъ? Эм буларнынъ эписининъ биткенини насыл бельги бильдиреджек? — дедилер.

⁵Иса лафыны бойле башлады: — Ич кимсе сизлерни алдатмасын деп, сакът олунъыз!

⁶Чокъ адамлар Меним адым иле келип: «Мен Месихим», — деп, чокъ адамларны алдатаджакълар.

⁷Сиз якъын дженк шаматасыны ве узакъ дженк акъкъында хаберлерни эшитирсиз. Амма къоркъманъыз: ойле олмакъ керек. Лякин бу даа сонъу дегиль.

⁸Халкъ халкъкъа къаршы, падишалыкъ падишалыкъкъа къаршы котериледжек. Тюрлю топракъларда ер тепренювлери ве ачлыкълар оладжакъ. Лякин булар тек буюк азапларнынъ башланувыдыр.

⁹Сизлер исе козь-къулакъ олунъыз. Чюнки сизни махкемеге береджеклер, синагогаларда котеклейджеклер. Мен ичюн сизни акимлер ве падишаларнынъ алдына турсатып, Мен акъкъымда шаатлыкъ яптыраджакълар.

¹⁰Башта эписи халкълар Къуванчлы Хаберни эшитмек кереклер.

¹¹Сизни махкемеге берген вакъытта, не айтаджагъым экен, деп тюшюнменъиз. Шу саатте сизлерге не берильсе, оны айтынъыз. Чюнки анда сиз дегиль, Мукъаддес Рух джевап береджек.

¹²Агъасы — къардашыны, бабасы — баласыны олюм панджасына береджеклер. Балалар озь ана-бабаларына къаршы чыкъып, оларны ольдюреджеклер.

¹³Мен ичюн, эр кес сизлерден нефретленеджек. Лякин сонъунадже сабыр эткен адам къуртарыладжакъ.

¹⁴Эгер «арам эткен бир пис шей» ляйыкъ олмагъан ерде тургъаныны корьсенъиз (окъугъан адам озю анъласын!), Еудиеде олгъан адамлар дагъларгъа къачсынлар.

¹⁵Дам устюнде тургъан адам ашагъа тюшип, бир шей алмакъ ичюн эвине кирмесин.

¹⁶Тарлада олгъан адам исе усть урбасыны алмагъа къайтып бармасын.

¹⁷О куньлерде юклю ве бала эмиздирген къадынларгъа беля оладжакъ!

¹⁸Къачувынъыз къышта олмасын деп, дувалар окъунъыз.

¹⁹Чюнки шу куньлерде, Алла дюньяны яраткъан вакъыттан башлап бу куньлерге къадар олмагъан ве даа бир кере олмайджакъ буюк белялар оладжакъ.

²⁰Эгер Алла о куньлернинъ сайысыны азлаштырмагъан олса, ич бир джан къуртулып оламаз эди. Лякин О, сайлагъан адамларнынъ хатыры ичюн, шу куньлерни азлаштырды.

²¹Эгер о вакъыт кимдир сизге: «Бакъынъыз, Месих мында!» я да: «О, анда!» — десе, инанманъыз.

²²Чюнки ялан месихлер ве ялан пейгъамберлер пейда олып, имкяны олса, сайлангъанларны биле ёлдан урмакъ ичюн, аджайип шейлер япаджакълар ве бельгилер косьтереджеклер.

²³Сизлер исе сакът олунъыз. Мен буны сизлерге эвельден айтып бердим.

²⁴Амма шу куньлерде, шу буюк мусибетинден сонъ «Кунеш къара оладжакъ, ай да ярыкъ бермейджек.

²⁵Йылдызлар коктен тюшеджеклер ве коклердеки кучьлер сарсыладжакълар».

²⁶О вакъытта булутлар устюнде, буюк къудрет ве шан-шурет иле келеяткъан Инсан Огълуны кореджеклер.

²⁷Сонъ О, мелеклерни ёллап, дюньянынъ дёрт тарафындан, кокнинъ четинден ернинъ четинедже олгъан, Озю сайлагъан адамларыны топлайджакъ.

²⁸Инджир тереги сизге кинаели дерс олсун: онынъ пытагъы къабарып, япракълары ачылгъанда, яз якъынлашкъаныны билесиз.

²⁹Сиз де, буларнынъ эписи мейдангъа кельгенини корсенъиз, билинъиз: О энди якъын, босагъада тура.

³⁰Сизлерге догърусыны айтам: шимдики несиль ёкъ олмаздан эвель, буларнынъ эписи оладжакъ.

³¹Кок ве ер из къалдырмайып кечерлер, лякин Меним сёзлерим кечмез.

³²Бу къайсы куню ве саат къачта оладжагъы акъкъында не Огъул, не коктеки мелеклер бильмейлер. Тек Баба биле.

³³Сакът олунъыз! Козь-къулакъ олып турунъыз, чюнки бу заман не вакъыт келеджегини бильмейсиз.

³⁴Бу бойле шейге ошай. Бир адам, сеферге кетип, озь эвини къулларына къалдырып, эр бирине махсус вазифе бере. Къапу къаравулына исе козь-къулакъ олмакъны буюрып, ёлгъа чыкъа.

³⁵Бунынъ ичюн эр заман азыр олунъыз, чюнки эв саиби не вакъыт келеджегини — акъшаммы, яры геджедеми, хоразлар къычыргъандамы, я да саба эртеми — бильмейсиз.

³⁶О, апансыздан келип, сизлерни юкълап къалгъанынъызны тапмасын!

³⁷Сизлерге не айткъан олсам, эписине де шуны айтам: козь-къулакъ олунъыз!