Read Мукъаддес Китап къырымтатар тилинде, Марк 15 Bible Online

Марк 15 - Мукъаддес Китап къырымтатар тилинде, bible

Марк 15

¹Саба танъ аткъанынен, баш руханийлер, акъсакъаллар, Къанун оджалары ве бутюн Юксек Шура топланып, мушавере яптылар. Сонъ, Исанынъ къолларыны багълап, Пилатнынъ [7] огюне алып бардылар.

²Пилат Исадан: — Сен еудийлер Падишасы оласынъмы? — деп сорады. Иса онъа: — Сен озюнъ Манъа «Падиша» дейсинъ, — деп джевап берди.

³Баш руханийлер Оны чокъ шейлерде къабаатлай эдилер.

⁴Пилат Онъа даа бир кере: — Сенинъ ич бир джевабынъ ёкъмы? Бакъса, Санъа къаршы къабаатлавлар пек чокъ! — деди.

⁵Лякин Иса ич бир джевап бермеди. Бу, Пилатны пек шашырды.

⁶Эр Песах Байрамында Пилат халкъ истеген бир мабюсны азат эткен.

⁷О вакъыт Барабба ве башкъа исьянджылар зинданда отура экен. Олар исьян котерип, бир адам ольдюрген эдилер.

⁸Халкъ, Пилаткъа келип, ондан, эр даим япкъан ишни олар ичюн эда эткенини сорай башлады.

⁹Пилат олардан: — Истейсизми, еудийлернинъ Падишасыны сизге азат этейим? — деп сорады.

¹⁰О, баш руханийлер Исаны пахыллап теслим эткенлерини анълай эди.

¹¹Баш руханийлер исе, Онынъ ерине Бараббаны азат эткенини талап этинъ деп, халкъны къозгъалап тура эдилер.

¹²Пилат олардан кене: — Сизлер еудийлернинъ Падишасы деп адландыргъан адамнен не япайым? — деп текрарлап сорады.

¹³— Оны хачкъа мыхлап къой! — деп къычырды олар.

¹⁴Пилат исе: — О не яманлыкъ япты? — деди. Амма олар даа бетер багъырып: — Оны хачкъа мыхлап къой! — дедилер.

¹⁵Халкънынъ козюне кирмеге истеген Пилат оларнынъ огюне Бараббаны чыкъарып йиберди. Исаны исе къамчылап, хачкъа мыхламакъ ичюн аскерлерге берди.

¹⁶Аскерлер Исаны преториягъа [8] алып бардылар ве бутюн арбий болюкни [9] анда топладылар.

¹⁷Исанынъ устюне мор тюслю урба [10] кийдирдилер ве башына тикенден орюльген тадж кечирдилер.

¹⁸Сонъ: — Яшасын еудийлернинъ Падишасы! — деп къычырдылар.

¹⁹Таякъларнен Онынъ башына урып, бетине тюкюрип ве алдында тиз чёкип, седжде эттилер.

²⁰Оны шойле масхара эткен сонъ, мор тюслю урбасыны чыкъарып, Озюнинъ урбаларыны кийдирдилер ве хачкъа мыхламакъ ичюн алып кеттилер.

²¹Эскендер ве Руфнынъ бабасы, киренели Симон адлы бир адам тарладан келип, шу ерден кечип кетеяткъан эди. Бу адамны Исанынъ хачыны котерип бармагъа меджбур эттилер.

²²Исаны «Къафа Ери» манасыны анълаткъан, Голгофа деген ерге алып кельдилер.

²³Онъа мюр [11] къошулгъан шарап бердилер, лякин О ичмеди.

²⁴Бундан сонъ Исаны хачкъа мыхлап астылар ве, джереп чекип, ким не аладжакъ деп, Онынъ урбаларыны пайлаштырдылар.

²⁵Оны хачкъа мыхлап аскъанда, саба саат докъуз эди.

²⁶Хачта: «Бу — еудийлернинъ Падишасы» — деп, Онынъ къабаатыны косьтерген язы бар эди.

²⁷[27-28] Исанен берабер эки айдутны — бирисини Онынъ онъ тарафында, башкъасыны сол тарафында хачкъа мыхладылар.

²⁸

²⁹Кечип кетеяткъанлар башларыны саллап, Исагъа куфюр сёзлер айта эдилер: — Эй, Сен, Алланынъ Сарайыны йыкъкъан ве учь кунь ичинде къургъан адам! — дедилер.

³⁰— Озюнъни Озюнъ къуртарса, хачтан тюшсе!

³¹Баш руханийлер ве Къанун оджалары да, оларгъа къошулып, Оны мыскъыллай эдилер. Олар бир-бирине: — Башкъаларны къуртара эди, Озюни исе къуртарып оламай!

³²Бу Месих, Исраильнинъ Падишасы, хачтан тюшсюн. О вакъыт биз буны корип, инанырмыз! — дей эдилер. Исанен берабер хачларгъа мыхлангъанлар да Оны сёге эдилер.

³³Уйле вакътындан саат учьке къадар бутюн дюньяны къаранлыкъ басты.

³⁴Саат учьте исе Иса къатты сеснен: — Элои, Элои, лема савахтани? — деп къычырды. Бу сёзлернинъ терджимеси: «Аллам, Аллам! Сен не ичюн Мени къалдырып кеттинъ?» — демектир.

³⁵О ерде тургъанларнынъ базылары, буны эшитип: — Бакъынъыз, О, Ильясны чагъыра, — дедилер.

³⁶Бириси исе, чапып барып, сарувлы сюнгерни экши шарапкъа батырып, таякъ уджуна илиштирди де, Исагъа узатты. Сонъ: — Токътанъыз, бакъайыкъ, Ильяс келип, Оны хачтан тюшюрир экенми? — деди.

³⁷Амма Иса, даа бир кере къычырып, сонъки нефесини чыкъарды.

³⁸Шу ань Алла Сарайындаки перде тёпеден ашагъадже йыртылып, экиге болюнди.

³⁹Исанынъ къаршысында тургъан юзбашы, Онынъ джан бергенини корип: — Акъикъатен бу Адам — Алланынъ Огълу экен! — деди.

⁴⁰О ерде узакътан бакъып тургъан къадынлар бар эди. Олар арасында магдалалы Мерьем, кучюк Якъупнен Йосенинъ анасы Мерьем ве Саломе бар эдилер.

⁴¹Иса Галилеяда олгъанда, олар Онъа хызмет этип, пешинден юре эдилер. О ерде Исанен Ерусалимге кельген башкъа къадынлар да бар эди.

⁴²Энди акъшам олгъан эди. Бу — азырланув куню, яни раатлыкъ кунюнинъ арфеси эди.

⁴³Шуранынъ итибарлы азасы, Алла Падишалыгъыны беклеген ариматеялы Юсуф, бутюн джесюрлигини топлап, Пилатнынъ огюне барды ве Исанынъ джеседини сорады.

⁴⁴Пилат Онынъ бойле тез ольгенине шашты. Юзбашыны чагъырып: — О, чокътан ольдими? — деп сорады.

⁴⁵Юзбашыдан джевап алгъан сонъ, джеседини Юсуфкъа берди.

⁴⁶Юсуф кетен без сатын алды ве, Исаны хачтан тюшюрип, Онынъ тенини темиз безнен сарды. Сонъ къаяда оюлгъан къабирде Исаны дефн этти ве, бир ташны юварлатып кетирип, къабирнинъ агъзыны къапатты.

⁴⁷Магдалалы Мерьем ве Йосенинъ анасы Мерьем Исанынъ дефн этильген ерини корьдилер.