Read Мукъаддес Китап къырымтатар тилинде, Марк 2 Bible Online

Марк 2 - Мукъаддес Китап къырымтатар тилинде, bible

Марк 2

¹Бир къач куньден сонъ Иса кене Кафарнаум шеэрине кельди. О, энди эвде олгъаныны эшитип,

²о къадар чокъ адам топланды ки, къапунынъ огюнде, азбарда биле ер ёкъ эди. Иса оларгъа Алланынъ Сёзюни анълата эди.

³Шу арада дёрт адам Онъа паралич ургъан бир инсанны котерип кельдилер.

⁴Адам чокълугъындан Исагъа якъынлашмакъ имкяныны тапалмай, олар Онынъ тёпесинде эвнинъ дамыны ачып, хастаны яткъан тёшеги устюнде яваштан Исанынъ янына тюшюрдилер.

⁵Иса, оларнынъ иманыны корип, хастагъа: — Огълум, гуналарынъ багъышланды! — деди.

⁶Бу ерде бир къач Къанун оджалары да отура эдилер. Олар ичинден шойле тюшюндилер:

⁷«Бу адамнынъ айткъанлары недир? Бойле сёзлер куфюрдир! Гуналарны Алладан башкъа ким багъышлай биле?»

⁸Иса бир кереден Озь рухунен оларнынъ фикирлерине далды да, оларгъа шойле деди: — Сизинъ юреклеринъиздеки тюшюнджелер недир!

⁹Хастагъа айтыладжакъ сёзлерден къайсы къолайджа: «Гуналарынъ багъышланды», — я да «Тур, тёшегинъни ал да, бар», — демекми?

¹⁰Амма, Инсан Огълунынъ ер юзюнде гуналарны багъышламагъа къудрети олгъаныны да билинъиз! — деди. Сонъ хастагъа:

¹¹— Санъа айтам: еринъден тур, тёшегинъни ал да, эвинъе кет! — деди.

¹²Адам шу дакъкъасы турды, тёшегини котерди ве эписининъ козю огюнде чыкъып кетти. Буны корьгенлер шашып къалдылар. — Биз бойле шейлерни ич бир вакъыт корьмедик! — деп, Аллагъа шукюрлер эттилер.

¹³Иса кене Галилея голю боюна кетти. Халкъ Онынъ янында топлана эди, Иса оларны огретип юрди.

¹⁴Шу ерлерден кечкенде, Иса салым топлангъан еринде отургъан Алфейнинъ огълу Левийни корьди. — Меним артымдан юр! — деди онъа Иса. Левий турып, Исанынъ артындан кетти.

¹⁵Сонъ Иса Левийнинъ эвинде эди. Бир софра башында Онен ве Онынъ шегиртлеринен берабер чокъ салым топлайыджылары ве гунакярлар да ашап-ичип отура эдилер. Онынъ артындан юргенлернинъ сайысы ёкъ эди.

¹⁶Исанынъ салым топлайыджылары ве гунакярларнен отурып ашап-ичкенини корьген фериселер ве Къанун оджалары Онынъ шегиртлерине: — Бу насыл шей? О салым топлайыджылары ве гунакярнен ашап-ичип отура да! — дедилер.

¹⁷Буны эшиткен Иса оларгъа шойле деди: — Эким сагъламларгъа дегиль, хасталаргъа керек. Мен инсафлы адамларны дегиль, гуналыларны чагъырмагъа кельдим.

¹⁸Бир кунь Ягъянынъ шегиртлери ве фериселер урф-адет боюнджа аштан-сувдан вазгече эдилер. Адамлар, Исагъа келип, бойле суаль бердилер: — Ягъянынъ ве фериселернинъ шегиртлери аштан-сувдан вазгечкенде, Сенинъ шегиртлеринъ ашап-ичип юргенлери недир?

¹⁹Иса оларгъа шойле джевап берди: –Тойгъа чагъырылгъан киевнинъ мусафирлери, киев оларнен олгъанда, ашны ред этерлерми? Ёкъ, киев оларнен олгъандже, ашап-ичерлер!

²⁰Амма ойле куньлер келеджек ки, киевни араларындан аладжакълар, иште о вакъыт олар аштан вазгечеджеклер.

²¹Кимсе эски урбагъа янъы парчадан ямав къоймаз, чюнки янъы ямав эски урбадан йыртылып, тешикни даа бетер алгъа кетирир.

²²Эм, кимсе яш шарапны эски мешин торбаларына толдурмай, чюнки яш шарап джарты торбаны да йыртаджакъ, шарап да бозуладжакъ, торба да гъайып оладжакъ. Яш шарапны янъы мешин торбаларгъа толдуралар.

²³Раатлыкъ куньлерининъ биринде Иса богъдай тарласындан кечип кетеяткъан. Онынъ шегиртлери ёл бою башакъларны къопарып башлайлар.

²⁴Буны корьген фериселер Исагъа: — Бакъ сен оларны! Раатлыкъ куню ясакъ этильген шейлерни не ичюн япалар?

²⁵Иса оларгъа шойле джевап берди: — Сиз Давут падиша ве онынъ адамлары ач ве мухтадж олгъанда не япкъанлары акъкъында окъумадынъызмы?

²⁶О, Авиатар баш руханий олгъан заманда Алланынъ Эвине кирип, тек руханийлерге ашамагъа мумкюн олгъан теклиф пителерини ашагъан ве адамларына да берген.

²⁷Сонъ Иса шойле дей: — Инсан раатлыкъ куню ичюн дегиль, раатлыкъ куню инсан ичюн яратылгъан.

²⁸Шунынъ ичюн Инсан Огълу — раатлыкъ кунюнинъ де Раббисидир.