Read Мукъаддес Китап къырымтатар тилинде, Марк 3 Bible Online

Марк 3 - Мукъаддес Китап къырымтатар тилинде, bible

Марк 3

¹Иса кене синагогагъа кире. Анда бир къолу къуругъан адам бар экен.

²Раатлыкъ куню бу сакъатны тедавийлер экенми, деп, Оны къабаатламакъ ичюн, артындан бакъып тура эдилер.

³Иса, къолу сакъат олгъан адамгъа: — Ортагъа чыкъ! — деди.

⁴Сонъ оларгъа бойле суаль берди: — Раатлыкъ куню яхшылыкъ я да яманлыкъ япмакъ мумкюнми? Къанун нени рухсет эте? Джан къуртармакъмы я да ольдюрмекми? Олар индемедилер.

⁵Иса адамларнынъ о къадар таш юрекли олгъанларына къайгъырып, этрафына кедер ве ачувнен бакъты. Къолу сакъат адамгъа исе: — Къолунъны узат! — деди. О, сакъат къолуны узаткъанынен, къолу тюзельди.

⁶Фериселер исе кетип, шу саат Ироднынъ тарафдарларынен бирликте топлашып, Исаны насыл этип ольдюрмеге акъыл таныштылар.

⁷Иса шегиртлеринен берабер голь тарафкъа ёл алды. Онынъ артындан Галилея ве Еудиеден пек чокъ адам юре эди.

⁸Онынъ япкъанларыны эшитип, тап Ерусалим, Идумея, Иордан аркъасындан, Тир ве Сидон виляетлеринден адам акъынтысы келип етти.

⁹Къалабалыкъта сыкъылып къалмамакъ ичюн, Иса шегиртлерине бир къайыкъ азырламакъ керегини айтты.

¹⁰Чокъ адамны тедавийлегенини билип, чешит хасталыкъларгъа огърагъанлар бир-бирини итеклеп Онъа токъунмакъ истей эдилер.

¹¹Джинлер Оны корьгенде, ерге йыкъылып: — Сен — Алла-Таалянынъ Огълусынъ, — деп къычырдылар.

¹²Амма Иса, Озю ким олгъаныны бильдирмеге кесен-кес ясакъ этти.

¹³Ондан сонъ Иса дагъ устюне чыкъып, шегиртлеринден Озю сайлап алгъанларыны чагъырды. Олар Исанынъ янына кельдилер.

¹⁴[14-15] Иса, янында бутюн вакъыт олсунлар, Алла Сёзюни даркъатсынлар ве инсанлар ичинден джин къувмакъ къудретини алсынлар деп, Озюне он эки эльчи сайлап алды.

¹⁶О, он эки шегирт сайлагъанларнынъ адлары: Симон (Иса онъа Пётр адыны берди),

¹⁷Зебедай огълу Якъуп, онынъ къардашы Юхан (Иса оларгъа Боанергес, я да «Гурюльдюнинъ огъуллары» адыны берди),

¹⁸Андрей, Филип, Бартоломай, Матта, Тома, Алфейнинъ огълу Якъуп, Фадда, Симон Ветанпервер

¹⁹ве сонъундан Исагъа хаинлик япкъан Иуда Искариот.

²⁰Бундан сонъ Иса эвине къайта. Анда кене о къадар адам топланды ки, оларгъа бир тилим отьмек ашамагъа биле вакъыт олмады.

²¹Исанынъ якъын адамлары буны эшитип: — О акъылдан азды, — деп, Оны алып кетмеге кельдилер.

²²Ерусалимден кельген Къанун оджалары исе: — Онынъ ичинде Беэльзебул шейтан бар! Шунынъ ичюн О, джинлерни джинлер башлыгъы къуветинен къувып чыкъара! — дедилер.

²³Иса исе, оларны янына чагъырып, кинаели икяелер айтып башлады: — Иблис Иблисни насыл къувып чыкъараджакъ?

²⁴Эгер бир падишалыкъ озь ичинден болюнсе, о падишалыкъ аякъта туралмаз.

²⁵Эгер бир эв озь ичинден болюнсе, о эв де аякъта туралмаз.

²⁶Эгер Иблис озюне къаршы чыкъса, о, аякъ устюнде туралмаз, амма онынъ сонъки куню якъынлашты.

²⁷Кимсе, кучьлю адамнынъ эвине кирип, онынъ малыны хырсызламаз. Амма башта кучьлю адамны багъласа, бутюн мал-мулькюни хырсызлап кетер.

²⁸Сизге догърусыны айтам: адамларнынъ япкъан гуналары ве айткъан куфюрликлери багъышланаджакъ.

²⁹Амма Мукъаддес Рухкъа айтылгъан куфюр сёзлер эбедий багъышланмайджакъ, о эбедий джезагъа махкюм этиледжек.

³⁰Иса бу сёзлерни айткъанынынъ себеби шунда ки, базылары: — Оны джин урды, — дей эдилер.

³¹Исанынъ анасынен къардашлары келип чыкътылар. Озьлери эвге кирмейип, Оны чагъырмакъ ичюн адам ёлладылар.

³²Исанынъ этрафында пек чокъ адам бар эди. Олар Онъа: — Ананънен къардашларынъ ве къыз-къардашларынъ тышарыда турып, Сени чагъыралар, — дедилер.

³³Иса оларгъа: — Меним анам ве къардашларым кимдир? — деди.

³⁴Сонъ этрафында отургъанларгъа бакъып: — Мына, булар Меним анам ве къардашларым!

³⁵Ким Алланынъ ирадесини беджерсе, о Меним къардашым, къыз-къардашым ве анам, — деди.