Read Мукъаддес Китап къырымтатар тилинде, Марк 8 Bible Online

Марк 8 - Мукъаддес Китап къырымтатар тилинде, bible

Марк 8

¹Шу куньлерде кене чокътан-чокъ адам топлангъан эди. Ашамагъа бир шей къалмагъаны ичюн, Иса шегиртлерини янына чагъырып:

²— Халкъны аджыйым, чюнки учь кунь Меним алдымда туралар, ашамагъа исе ич бир шейлери ёкъ.

³Эгер оларны эвлерине ач къалдырып йиберсем, ёлда такъаттан кесилирлер, чюнки базылары узакъ ерлерден кельгенлер, — деди.

⁴Шегиртлери бунъа: — Оларны тойдурмакъ ичюн бу сахрада ким, къайдан шу къадар отьмек аладжакъ? — деп, джевап бердилер.

⁵— Не къадар отьмегинъиз бар? — деп сорады Иса. — Еди дане, — деди шегиртлер.

⁶Сонъ Иса халкъкъа ерге отурмакъны буюрды. Еди отьмекни алып, шукюр этип парчалады ве даркъатмакъ ичюн шегиртлерине берди. Шегиртлер халкъкъа даркъаттылар.

⁷Оларда бир къач балыкъ да бар эди. Иса шукюр дувасыны окъуп, оларны да даркъаттырды.

⁸Халкъ ашап тойды. Артып къалгъан кесеклерни джыйып, еди сепет толдурдылар.

⁹Шу ерде дёрт бинъге якъын адам бар эди. Сонъ Иса адамларны йиберип,

¹⁰Озю шегиртлеринен берабер тез-тез къайыкъкъа отурып, Далманута юртуна кельди.

¹¹Фериселер чыкъып, Онен давалашып башладылар. Оны сынамакъ ичюн, коктен бир бельги косьтермесини истей эдилер.

¹²Лякин Иса, агъыр нефес алып, оларгъа: — Не ичюн бу несиль бельги талап эте? Сизлерге догърусыны айтам: бу несильге ич бир бельги косьтерильмейджек! — деди.

¹³Сонъ, оларны къалдырып, кене къайыкъкъа минди ве къаршы ялыгъа ёл алды.

¹⁴Исанынъ шегиртлери ёлгъа отьмек алмагъа унуткъанлар. Къайыкъта бир отьмектен башкъа бир шей къалмагъан.

¹⁵Шу арада Иса, шегиртлерине эмирлер берип: — Манъа бакъынъыз, фериселер ве Ироднынъ маясындан сакъынынъыз! — деди.

¹⁶Олар исе бир-бирине: — Буны айтты, чюнки бизим отьмегимиз ёкъ, — дедилер.

¹⁷Иса, буны билип, оларгъа: — Сиз не ичюн озьара, янымызда отьмек ёкъ, дейсиз? Даа бир шей анъламайсынъызмы? Бунъа акъылынъыз етмейми? Юреклеринъиз даа кёрмы?

¹⁸Козьлеринъиз бар, амма корьмейсизми? Къулакъларынъыз бар, амма эшитмейсизми? — деди. — Сиз хатырлап оламайсызмы?

¹⁹Мен беш отьмекни парчалап, беш бинъ адамгъа болип бергенимде, сизлер ашап битирильмеген отьмекни къач сепетке джыйдынъыз? — Он эки сепет, — деди олар.

²⁰— Мен еди отьмекни парчалап, дёрт бинъ адамгъа болип бергенимде, къач сепет отьмек къалды? — Еди сепет, — дедилер.

²¹— Ондан сонъ да анъламайсынъызмы? — деди оларгъа Иса.

²²Иса Бетсайда коюне кельгенде, Онынъ алдына бир кёр адамны кетирип, онъа тийгенини истедилер.

²³Иса, сокъурнынъ къолундан тутып, койнинъ ичинден алып чыкъты. Козьлерини тюкюриклеп, къолларыны онынъ башына къойды да: — Бир шейлер коресинъми? — деп сорады.

²⁴Сокъур башыны котерип: — Адамларны корем, олар тереклерге ошайлар, амма юрелер, — деди.

²⁵Иса даа бир кере кёрнынъ козьлерине къолларыны тийгизди. О, дикъкъатнен бакъып, эр шейни ачыкъ корьди, чюнки бутюнлей тедавийленди.

²⁶Иса оны эвине ёллагъанда: — Койге кирме, — деди.

²⁷Иса озь шегиртлеринен берабер Филипнинъ Кайсареясы этрафындаки койлерге кетти. Ёлда шегиртлеринден: — Адамлар Мени ким деп саялар? — деп сорады.

²⁸Шегиртлери: — Базылары Сени Сувгъа Батырыджы Ягъя, башкъалары — Ильяс, дигерлери исе — пейгъамберлерден бириси деп саялар, — дедилер.

²⁹Иса олардан: — Я сиз Мени ким деп саясыз? — деп сорады. Пётр Онъа: — Сен Месихсинъ, — деди.

³⁰Бундан сонъ Иса шегиртлерине Озю акъкъында кимсеге айтмагъа кесен-кес ясакъ этти.

³¹Инсан Огълу чокъ азап чекеджеги, акъсакъаллар, баш руханийлер ве Къанун оджалары тарафындан ред этилип, ольдюриледжеги, амма учюнджи куню тириледжеги акъкъында Иса шегиртлерине огретип башлады.

³²Иса буны ачыкъ-айдын айта эди. Буны эшиткен Пётр, Исаны четке чекип, Оны азарлап башлады.

³³Амма Иса, айланып, шегиртлерине бакъты да, Пётрнынъ сёзюни болип: — Ёкъ ол козюмден, Иблис! Сен Алланынъ ишлерини дегиль, адам ишлерини тюшюнесинъ, — деди.

³⁴Сонъ Иса халкъны ве шегиртлерини янына чагъырып: — Ким Меним артымдан кетмеге истесе, озюнден вазгечип, озь хачыны котерип, Меним артымдан юрсюн.

³⁵Ким джаныны къуртармагъа истесе, оны джояджакъ. Ким Мен ве Къуванчлы Хабер ичюн джаныны берсе, джаныны къуртараджакъ.

³⁶Эгер инсан бутюн дюньяны запт этип, озь джанына зарар кетирсе, онъа бундан файда бармы?

³⁷Инсан, озь джаныны къуртармакъ ичюн, не берир?

³⁸Ким бу ороспу ве гунакяр несиль арасында Менден ве Меним сёзлеримден утанса, Инсан Огълу да, Алланынъ мукъаддес мелеклеринен берабер Бабасынынъ шерефи иле кельгенде, ондан утаныр, — деди.